ၵေႃႉယၢမ်ႈပဵၼ်ၸၼ်ႉၽူႈၼမ်း ၼႂ်းတပ်ႉသိုၵ်းဝႃႉ ဝိူၺ်ႉသႅဝ်ႇလူင် လူႉသဵင်ႈသုတ်းမုၼ်၊ ၽူႈၼမ်းဝႃႉ ႁူဝ်ပဝ်ႈလူင် ပဝ်းယဵဝ်ႇသျႅင် ဢွၼ်ႁူဝ်ၼမ်းၼႃႈ ၸတ်းပၢင်ၸႃပၼ လုမ်းလႃးပူၼ်ႉၶၢပ်ႈတူဝ်။

မိူဝ်ႈဝၼ်းတီႈ 13/11/2020 ၼၼ်ႉ ယူႇတီႈ ပႃႇတီႇမိူင်းဝႃႉၽွမ်ႉႁူမ်ႈ / တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSP, UWSA) ပိုၼ်ၽၢဝ်ႇဝႃႈ -ဝိူၺ်ႉသႅဝ်ႇလူင် (ဝိူၺ်ႉသႄႂလူင်) လူႉသဵင်ႈသုတ်းမုၼ်ၵႂႃႇ လူၺ်ႈတၢင်းပဵၼ် မိူဝ်ႈဝၼ်းတီႈ 12/11/2020 ယၢမ်း 19:45 မူင်း ၽွင်းဢႃႇယု 85 ပီ ၼႆယဝ်ႉ။

ပၢင်ၸႃပၼ (မႃႇသႃႇ)မၼ်းၸဝ်ႈၼႆႉ တူဝ်ႁူဝ်ပဝ်ႈလူင် ပဝ်းယဵဝ်ႇသျႅင် ၽူႈၼမ်းတပ်ႉသိုၵ်းမိူင်းဝႃႉ ၽွမ်ႉႁူမ်ႈ ပဵၼ်ၵဝ်ႉပဵၼ်ၵၼ်းသေ ၸတ်းႁဵတ်း၊ မီးၽူႈယႂ်ႇၵူၼ်းလူင် ၸၼ်ႉၽူႈၼမ်းၸုမ်းဝႃႉ ၶဝ်ႈႁူမ်ႈတင်းၼမ်-ၼႆယဝ်ႉ။ ၵူၺ်းၵႃႈ မၼ်းၸဝ်ႈလူႉတီႈလႂ်/မိူင်းလႂ်၊ ပၢင်ၸႃပၼ မၼ်းၸဝ်ႈ ၸတ်းတီႈလႂ်၊ ပူၼ်ႉၶၢပ်ႈတူဝ်မိူဝ်ႈလႂ်ၸိူဝ်းၼႆႉ ယူႇတီႈႁွင်ႈၵၢၼ်သိုဝ်ႇၶၢဝ်ႇၸုမ်းဝႃႉ ဢမ်ႇပိုတ်ႇလၢတ်ႈ။ ၽူႈလဵပ်ႈႁဵၼ်းၵမ်ႈၽွင်ႈတႄႉဝႃႈ လူႉသဵင်ႈၵႂႃႇၼႂ်းမိူင်းၶႄႇ ၼႆယဝ်ႉ။

ဝိူၺ်ႉသႅဝ်ႇလူင်ၼႆႉ ပဵၼ်ၸၢဝ်းၶိူဝ်းၶႄႇ၊ ၵိူတ်ႇမိူဝ်ႈဝၼ်းတီႈ 25/09/1936 ၊ ၶဝ်ႈႁၢပ်ႇၵိုတ်ႉၵၢၼ်သိုၵ်း ၼႂ်းတပ်ႉသိုၵ်းဝႃႉ မိူဝ်ႈ 24/10/1984 သေ လႆႈပဵၼ်ထိုင်ၸၼ်ႉၽူႈၵွၼ်းသိုၵ်း ၼႃႈလိၼ်သိုၵ်း 171 ၊ ပဵၼ်ၽူႈၸွႆႈၵၢၼ် ႁွင်ႈၵၢၼ်လူင်ၾၢႆႇပၢႆးမၢၵ်ႈမီး မိူင်းဝႃႉ ၵေႃႉႁႅၵ်ႈ၊ ပဵၼ်ၽူႈပွင်ၵၢၼ်ၵူႈလွင်ႈလွင်ႈ ႁူင်းႁဵၼ်း ၸိူဝ်းၼႆႉ။

လိူဝ်သေၼၼ်ႉ ၶဝ်ႈပဵၼ်လုၵ်ႈၸုမ်း ပႃႇတီႇမိူင်းဝႃႉၽွမ်ႉႁူမ်ႈ (UWSP) မိူဝ်ႈ 20/01/1992 ၊ ဢိင်ၼိူဝ်ပၢႆးယူႇလီၸုတ်ႈယွမ်းသေ ထွၼ်တူဝ်ဢွၵ်ႇပႃႇတီႇမိူဝ်ႈ 12/12/2014 ပူၼ်ႉမႃး ၼႆယဝ်ႉ။

ဝိူၺ်ႇသႅဝ်ႇလူင်ၼႆႉ ၼင်ႇတင်းၼမ်ႁူႉၸၵ်းဝႆႉၼႆႉမီး 3 ၵေႃႉပီႈၼွင်ႉ။ ဝိူၺ်ႉသႅဝ်ႇလူင် ပဵၼ်ပီႈဢၢႆႈလူင်၊ ၵေႃႉၵၢင်ဝိူၺ်ႉသႅဝ်ႇၵင်း၊ ၵေႃႉၼွင်ႉသုတ်းတွင်ႉ ပဵၼ်ဝိူၺ်ႉသႅဝ်ႇယႂိၼ် ၼႆယဝ်ႉ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းလုမ်း PI ၽူႈၵမ်ႉၸွႆႈၼႃႈၵၢၼ်ငမ်းယဵၼ် မိူင်းႁူမ်ႈတုမ် လၢတ်ႈဝႃႈ-“ၶဝ်သၢမ်ၵေႃႉပီႈၼွင်ႉၼႆႉ ၸဵမ်မိူဝ်ႈၵူႈပွၵ်ႈ/ ဢွၼ်တၢင်းယူႇၼႂ်း တပ်ႉသိုၵ်းတႆးႁူမ်ႈပွင်း (SUA) ဢၼ်ၸဝ်ႈၶုၼ်သႃႇဢွၼ်ႁူဝ်၊ ၵမ်ႉၸွႆႈပၼ်ၵၢၼ်တႆးတီႈၼႆႈ။ ၵူၺ်းၵႃႈ ဝၢႆးၼႆႉမႃးၶဝ်မီးလွင်ႈတႅၵ်ႇယၢႆႈ ၵၼ်သေ တင်းသၢမ်ၵေႃႉပီႈၼွင်ႉၼႆႉ ၵႂႃႇထိုင်ၼႂ်းတပ်ႉသိုၵ်းဝႃႉ UWSA ။ ၸဝ်ႈၼႃႈတီႈၶႄႇၵမ်ႈၽွင်ႈဝႃႈ ႁိူၼ်းမၼ်းၸဝ်ႈမီးတီႈမိူင်းၶွၼ် (ၶႄႇႁွင်ႉဝႃႈ မင်ႇသျိူဝ်)ၼႂ်းမိူင်းၶႄႇ။ မိူဝ်ႈပီ 2014 ၼၼ်ႉ မၼ်းၸဝ်ႈဢမ်ႇယူႇလီသေ ပွၵ်ႈမိူဝ်းႁိူၼ်း ၸၢင်ႈမိူဝ်းတီႈမိူင်းၶွၼ်၊ ၵွပ်ႈၼၼ် ၸၢင်ႈလူႉတီႈမိူင်းၶွၼ် ၵေႃႈပဵၼ်လႆႈ” ဝႃႈၼႆ။  

မၼ်းၸဝ်ႈၼႆႉ ယူႇတီႈသိုဝ်ႇၸုမ်းဝႃႉ ယွင်ႈယေႃးဝႆႉဝႃႈ ပဵၼ်လုၵ်ႈၸုမ်းလီၶွင် ပႃႇတီႇမိူင်းဝႃႉၽွမ်ႉႁူမ်ႈ၊ ပဵၼ်ၽူႈၼမ်းလီၶွင် တပ်ႉသိုၵ်းမိူင်းဝႃႉၽွမ်ႉႁူမ်ႈ၊ ပဵၼ်ၵေႃႉသိုၵ်းလီၶွင် လူင်ပွင်ၸိုင်ႈမိူင်းဝႃႉ လႄႈပဵၼ်လုၵ်ႈၸၢႆးလီၶွင်ၸၢဝ်းၶိူဝ်းဝႃႉ။ မၼ်းၸဝ်ႈလူႉသဵင်ႈၵႂႃႇၼႆႉ ပဵၼ်လွင်ႈလူႉယႂ်ႇသုမ်းလူင်ၶွင် လူင်ပွင်ၸိုင်ႈမိူင်းဝႃႉလႄႈ ၸၢဝ်းၶိူဝ်းဝႃႉ -ၼႆယဝ်ႉ။

ၸုမ်းဝႃႉၼႆႉ မိူဝ်ႈ 20/04/1989 ၽိုၼ်ႉဝၢႆႇၽၢတ်ႇဢွၵ်ႇ ပႃႇတီႇၶွမ်ႊမိဝ်ႊၼိတ်ႉမိူင်းမၢၼ်ႈ CPB သေ ပူၵ်းတင်ႈ ပႃႇတီႇၽွမ်ႉႁူမ်ႉၸိူဝ်ႉၸၢတ်ႈမိူင်းမၢၼ်ႈ BNUP ၊ ဝၢႆးမႃးလႅၵ်ႈလၢႆႈပဵၼ် ပႃႇတီႇမိူင်းဝႃႉၽွမ်ႉႁူမ်ႈ UWSP ၊ ၸိုဝ်ႈတပ်ႉသိုၵ်းပဵၼ် တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ။ ၵိုတ်းတိုၵ်း ဢဝ်လွင်ႈငမ်းယဵၼ် တင်းလူင်ပွင်ၸိုင်ႈ ၸုမ်းသိုၵ်းမၢၼ်ႈ မိူဝ်ႈပီ 1989 သေ လႆႈၼႃႈလိၼ်ၶိုၵ်ႉတွၼ်းမၢႆ (2) ။

တွၼ်ႈၵၢၼ်ငမ်းယဵၼ်ၼၼ်ႉ ဝၢႆးမႃးဢုပ်ႇဢူဝ်းၵၼ်တင်း လူင်ပွင်ၸိုင်ႈမၢၼ်ႈထႅင်ႈလၢႆမိူဝ်ႈလၢႆၵမ်း။ ယၢမ်းလဵဝ် ႁပ်ႉပဵၼ်ႁူဝ်ပဝ်ႈ FPNCC ဢၼ်မီးလုၵ်ႈၸုမ်း ၸုမ်းဢူၺ်းလီသိုၵ်းပွတ်းႁွင်ႇ 7 ၸုမ်းဝႆႉ။