ၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ – 19 တီႈၵဵင်းတုင် ၵေႃႉထူၼ်ႈ 64 ၼၼ်ႉ ႁၢႆၶႅၼ်းလီငၢမ်းယဝ်ႉသေ လႆႈၶႂၢင်ႉလူင်းႁူင်းယႃယဝ်ႉ။
ဝၼ်းတီႈ 14/6/2020 ယၢမ်းၵၢင်ၼႂ် မွၵ်ႈ 10 မူင်းၼႆႉ ၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ – 19 ၵေႃႉထူၼ်ႈ 64 ဢၼ်ယူတ်းယႃတူဝ်ဝႆႉတီႈႁူင်းယႃလူင် ၵဵင်းတုင် ၸိုင်ႈတႆးပွတ်းဢွၵ်ႇၶူင်းၼၼ်ႉ လႆႈၶႂၢင်ႉလူင်းႁူင်းယႃယဝ်ႉ။ ၵူၺ်းၵႃႈ တေလႆႈၵုမ်းတူဝ်ယူႇၼႂ်းႁိူၼ်းယေး Home Quarantine တႃႇၶၢဝ်းတၢင်း ၼိုင်ႈဝူင်ႈ ဝႃႈၼႆ။
ၻွၵ်ႊတိူဝ်ႊလႃႉထေးမိၼ်း ၽူႈၵွၼ်းႁူင်းယႃလူင် ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ ၵေႃႉထူၼ်ႈ 64 ၼႆႉ လႆႈသူင်ႇၵူတ်ႇထတ်းတၢင်းပဵၼ် မွၵ်ႈ 7 ပွၵ်ႈ 8 ပွၵ်ႈၼႆႉ ၸင်ႇဢွၵ်ႇ Negative မႃးလႄႈ ဝၢႆးၼၼ်ႉ လႆႈၵုမ်းတူဝ်ပႂ်ႉတူၺ်းတီႈႁူင်းယႃဝႆႉ 14 ဝၼ်းယဝ်ႉ ၸင်ႇပၼ်ၶႂၢင်ႉလူင်းႁူင်းယႃ” ဝႃႈၼႆ။
ၵူၼ်းပဵၼ်ၵေႃႉထူၼ်ႈ 64 ၼႆႉ ၵႂႃႇတိတ်းၸပ်းၸိူဝ်ႉမႅင်းတၢင်းပဵၼ် တီႈ ပၢင်ပွႆးသႃသၼႃ ၶရိတ်ႉ တီႈတႃႈၵုင်ႈ မႃး သေၶဝ်ႈယူတ်းယႃတူဝ်တီႈ ႁူင်းယႃၵဵင်းတုင် ၸဵမ်မိူဝ်ႈဝၼ်းတီႈ 11/4/2020 ။ ယူႇတီႈႁွင်ႈၵၢၼ်ပၢႆးယူႇလီ ပိုၼ်ၽၢဝ်ႇဢွၵ်ႇမႃးမိူဝ်ႈဝၼ်းတီႈ 15/4/2020 ၼၼ်ႉ ထူပ်းႁၼ် ၸိူဝ်ႉမႅင်းပဵၼ်ၵေႃႉႁႅၵ်ႈ ၼႂ်းၸိုင်ႈတႆးပွတ်းဢွၵ်ႇၶူင်း။ သူင်ႇၵူတ်ႇထတ်းတၢင်းပဵၼ် 6 ပွၵ်ႈၵေႃႈ ဢွၵ်ႇပဵၼ် Positive မႃးတင်း 6 ပွၵ်ႈ၊ ၸင်ႇႁႃ ဢမ်ႇမီးမႅင်းမိူဝ်ႈၵူတ်ႇထတ်းမိူဝ်ႈ ဝၼ်းတီႈ 25/5/2020 ၼႆယဝ်ႉ။
ၻွၵ်ႊတိူဝ်ႊ လႃႉထေးမိၼ်း သိုပ်ႇလၢတ်ႈဝႃႈ “ ယၢမ်းလဵဝ် တီႈႁူင်းယႃၵဵင်းတုင်ၼႆႉ မီးၵူၼ်းထၢင်ႇထိူမ် ပႂ်ႉတူၺ်းငဝ်းလၢႆးတၢင်းပဵၼ်ဝႆႉ 3 ၵေႃႉ။ ၵူၺ်းၵႃႈ ၵူၼ်းပဵၼ် Positive တႄႉ ဢမ်ႇမီး” ဝႃႈၼႆ။
ၼႂ်းမိူင်းတႆးၼႆႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၼႆႉ တင်းမူတ်းမီး 10 ၵေႃႉ။ ၼႂ်း 10 ၵေႃႉၼၼ်ႉ တႃႇ 7 ၵေႃႉ လႆႈၶႂၢင်ႉလူင်းႁူင်းယႃယဝ်ႉ။ တႃႇ 3 ၵေႃႉတႄႉ ပႆႇလူင်းႁူင်းယႃ။ ၼႂ်း 3 ၵေႃႉၼၼ်ႉသမ်ႉ ယူတ်းယႃဝႆႉတီႈႁူင်းယႃလူင် မူႇၸေႊ 1 ၵေႃႉ။ ႁူင်းယႃလူင်ၸဝ်ႈၸၢမ်ႇထုၼ်း 2 ၵေႃႉ ၼႆယဝ်ႉ။
တေႃႈလဵဝ် ၵူၼ်းတိတ်းၸပ်းၸိူဝ်ႉမႅင်းၼႂ်းမိူင်းႁူမ်ႈတုမ် တင်းမူတ်းမီး 262 ၵေႃႉ။ လူႉတၢႆ 6 ၵေႃႉ၊ ယူတ်းယႃဝႆႉ 81 ၵေႃႉလႄႈ ယႃၶႅၼ်း 175 ၵေႃႉ ယူႇတီႈႁွင်ႈၵၢၼ်ပၢႆးယူႇလီ ပိုၼ်ၽၢဝ်ႇဢွၵ်ႇဝႆႉ။
