ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 တီႈမူႇၸေႊၼၼ်ႉ တေႃႈလဵဝ် လႆႈယူတ်းယႃတူဝ်ဝႆႉတီႈ မူႇၸေႊသေယၢမ်းလဵဝ် ပၢႆးယူႇလီၶႅမ်ႉလႅပ်ႈယူႇ ဝႃႈၼႆ။

မိူဝ်ႈဝၼ်းတီႈ 2/6/2020 ယၢမ်းၵၢင်ၶမ်ႈ 8 မူင်းၼၼ်ႉ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႃႈ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ – 19 ၼႂ်းမိူင်းႁူမ်းတုမ် မီး 4 ၵေႃႉၼႂ်းၼၼ်ႉ 2 ၵေႃႉ ပဵၼ်ၵူၼ်းၼႂ်းမိူင်းတႆး ၵူၼ်းၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်းၵေႃႉၼိုင်ႈလႄႈ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၵေႃႉၼိုင်ႈ ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် တီႈယွမ်ႇၵူၼ်းပဵၼ်ယူႇ ပွၵ်ႉႁူဝ်မူၼ်ႇ ၼၼ်ႉ လႆႈ Lockdown ဝႆႉၸူဝ်ႈၶၢဝ်းယဝ်ႉ ဢမ်ႇၸႂ်ႈတင်းပွၵ်ႉ ပဵၼ်ယွမ်ႇၶဝ်ယူႇၼၼ်ႉၵူၺ်း။ ယၢမ်းလဵဝ် ၵူၼ်းပဵၼ်ၼၼ်ႉ ယူတ်းယႃဝႆႉတီႈ ႁူင်းယႃမူႇၸေႊ ၼႆႉ။ ပၢႆးယူႇလီမၼ်းၼၢင်းတႄႉ ၶႅမ်ႉလႅပ်ႈလီယူႇ၊ မေႃယႃတီႈႁူင်းယႃမူႇၸေႊ လၢတ်ႈ ” ဝႃႈၼႆ။

ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် တီႈမူႇၸေႊၼႆႉ ပဵၼ်ၼၢင်းယိင်း ဢႃယု 30 ပီ ပဵၼ်ၼၢင်းမေႃယႃ Nurse ။ ၵူၼ်းပဵၼ် တီႈၸႄႈဝဵင်းယႂႃႇငၢၼ်ႇၼၼ်ႉတႄႉ ပဵၼ်ၽူႈၸၢႆး ဢႃယု 31 ပီ တိုၵ်ႉပွၵ်ႈ မိူင်းၶႄႇမႃးၵူၺ်း ဝႃႈၼႆ။

ၸၢႆးႁိၼ်လဵၵ်း သိုပ်ႇလၢတ်ႈဝႃႈ “တေႃႈလဵဝ် တီႈမူႇၸေႊၼႆႉ ၵူၼ်းမိူင်း ယူႇမဝ်ၵိၼ်မၢင်မႃး။ၽႃႈတူမ်းသူပ်း (Mask) ၵေႃႈဢမ်ႇသႂ်ႇၵၼ်။ ႁၢၼ်ႉၶၢႆၶူဝ်းၵေႃႈ မိူဝ်ႈၵူႈပွၵ်ႈတႄႉ ဢမ်ႇပၼ်ၶဝ်ႈၼႂ်းႁၢၼ်ႉ လႆႈယူႇၼွၵ်ႈႁၢၼ်ႉသေ သိုဝ်ႉ ။ တေႃႈလဵဝ်ၼႆႉ ဢမ်ႇၸႂ်ႈၸိူင်ႉၼၼ်ယဝ်ႉ ၶဝ်ႈဢွၵ်ႇသိုဝ်ႉၶၢႆတေႃႇၵၼ် လွတ်ႈလႅဝ်းလီၼႃႇယဝ်ႉ မႆႈၸႂ်ၵူဝ်တိတ်းၸပ်းတၢင်းပဵၼ် ၵၼ်ၼၼ်ႉၵူၺ်းယဝ်ႉ။ ၶဝ်းၶႃႈယင်းဢမ်ႇၸၢင်ႈႁူႉဝႃႈ ၽႂ်/ ၵေႃႉလႂ်ပဵၼ်ဢမ်ႇပဵၼ် ဢၼ်ဝႃႈၼၼ်ႉ” ဝႃႈၼႆ။

မိူဝ်ႈဝၼ်းတီႈ 24/4/2020 ထဝ်ႈယိင်း ဢႃယု 87 ပီ ၵူၼ်းပွၵ်ႉၵၢတ်ႇ ၸႄႈဝဵင်းမူႇၸေႊ ၼၼ်ႉၵေႃႈ ထူပ်းႁၼ်တိတ်း ၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 ၼင်ႇၵဝ်ႇ၊ လႆႈယူတ်းယႃတူဝ်တီႈႁူင်းယႃမူႇၸေႊသေ ထိုင်မႃး ဝၼ်းတီႈ 9/5/2020 မၼ်းၼၢင်းယူႇလီ ဢမ်ႇမီးမႅင်းယဝ်ႉလႄႈ ပွၵ်ႈမိူဝ်းႁိူၼ်းၶိုၼ်းယဝ်ႉ ဝႃႈၼႆ။

တေႃႈလဵဝ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ်ၼႆႉ တင်းမူတ်းမီးၵႂႃႇ 233 ၵေႃႉ၊ လူႉတၢႆ 6 ၵေႃႉ၊ ယူတ်းယႃဝႆႉ 82 ၵေႃႉလႄႈ ယႃၶႅၼ်း 145 ၵေႃႉ။

လိူဝ်ၼၼ်ႉ တွၼ်ႈတႃႇ ၼႂ်းမိူင်းတႆးသမ်ႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်းမီးၵႂႃႇ 9 ၵေႃႉယဝ်ႉ၊ ယႃၶႅၼ်း 5 ၵေႃႉယဝ်ႉ တိုၵ်ႉသိုပ်ႇ ယူတ်းယႃဝႆႉယူႇ 4 ၵေႃႉ။ ၼႂ်း 4 ၵေႃႉၼၼ်ႉ တီႈႁူင်းယႃလူင် ၵဵင်းတုင် 2 ၵေႃႉလႄႈ ႁူင်းယႃလူင် မူႇၸေႊ 1 ၵေႃႉ ဢိၵ်ႇ ႁူင်းယႃလူင် ၸဝ်ႈၸၢမ်ႇထုၼ်း 1 ၵေႃႉ ၼႆယဝ်ႉ။