ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 တီႈတူၼ်ႈတီး ၵိုတ်းၵေႃႉၼိုင်ႈၼၼ်ႉယူတ်းယႃႁၢႆၶႅၼ်းယဝ်ႉသေ လႆႈၶႂၢင်ႉလူင်းႁူင်းယႃယဝ်ႉ။
မၼ်းၼၢင်းၼႆႉ ပဵၼ်ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 ၵေႃႉထူၼ်ႈ 121 ၼႂ်းမိူင်းႁူမ်ႈတုမ်၊ ယူတ်းယႃတူဝ် တီႈႁူင်းယႃလူင် ၸဝ်ႈၸၢမ်ႇထုၼ်း လႆႈ 28 ဝၼ်း သေ ၶႅၼ်းၸိုၼ်ႈယူႇလီမႃးယဝ်ႉလႄႈ လႆႈလူင်းႁူင်းယႃမိူဝ်ႈဝၼ်းတီႈ 16/5/2020 မိူဝ်ႈသိုၼ်းၼၼ်ႉယဝ်ႉဝႃႈၼႆ။
ၻွၵ်ႊတိူဝ်ႊၼိၼ်းဢိၽိဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ၾၢႆႇၽဵဝ်ႈမူၺ်ႉတၢင်းပဵၼ်ၸပ်းငၢႆႈ ၸႄႈမိူင်းတႆး လၢတ်ႈတီႈ ၽူႈတွႆႇႁွၵ်ႈဝႃႈ “ၸႂ်ႈယဝ်ႉၶႃႈ လႆႈလူင်းႁူင်းယႃယဝ်ႉ၊ တေႃႈလဵဝ်လႆႈၵႂႃႇယူႇဝႆႉတီႈ ႁူမ်ႈယဵၼ် ပၢႆးယူႇလီၸႄႈမိူင်း (ပြည်နယ်ကျန်းမာရေး ဧည့်ရိပ်သာ) Facility Quarantine ၵုမ်းတူဝ်ဝႆႉတႃႇ 7 ဝၼ်း။ ယဝ်ႉၵေႃႈ တေလႆႈၵုမ်းတူဝ်ယူႇဝႆႉတီႈ Home Quarantine ထႅင်ႈ 7 ဝၼ်း” ဝႃႈၼႆ။
ၵူၼ်းပဵၼ် ၵေႃႉထူၼ်ႈ 121 ၼႆႉ ပဵၼ်မေႃယႃၼင်ႇၵဝ်ႇ၊ လုၵ်ႉမိူင်းဢိင်ႇၵလၼ်ႇပွၵ်ႈမႃးယူႇႁိူၼ်းလႆႈ 10 ဝၼ်းပၢႆ ၸင်ႇႁူႉဝႃႈမီးၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19။
“မၼ်းၼၢင်းၼႆႉ တႄႇၶိုၼ်ႈႁူင်းယႃ မိူဝ်ႈဝၼ်းတီႈ 21 လိူၼ်ဢေႊပရိူဝ်ႊ။ လႆႈလူင်းႁူင်းယႃမိူဝ်ႈ ဝၼ်းတီႈ 16 လိူၼ်မေႊၼႆႉ ၶႃႈ။ ပၢႆးယူႇလီတႄႉ ၶႅမ်ႉလႅပ်ႈလီၵူႈလွင်ႈ” ၻွၵ်ႊတိူဝ်ႊ ၼိၼ်းဢိၽိဝ်ႇလၢတ်ႈၼႄၼင်ႇၼႆ။
တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းတိတ်းၸပ်းတၢင်းပဵၼ် – 19 တင်းမူတ်းမီးၵႂႃႇ 187 ၵေႃႉ၊ ယႃၶႅၼ်း 97 ၵေႃႉလႄႈ လူႉတၢႆ 6 ၵေႃႉ ဝႃႈၼႆ။
ၼႂ်းမိူင်းတႆးသမ်ႉ ၵူၼ်းၸပ်းတၢင်းပဵၼ် တင်းမူတ်းမီး 7 ၵေႃႉ တွၼ်ႈတႃႇ ပွတ်းႁွင်ႇတင်းပွတ်းၸၢၼ်း 4 ၵေႃႉ တႄႉ ၵူတ်ႇထတ်းတူၺ်းၸိူဝ်ႉမႅင်းၶဝ်လၢႆလၢႆၵမ်းသေ ဢမ်ႇထူပ်းႁၼ်လႄႈ ၸင်ႇလႆႈၶႂၢင်ႉလူင်းႁူင်းယႃယဝ်ႉ။ တွၼ်ႈတႃႇ တၢင်းပွတ်းဢွၵ်ႇၶူင်း တႃႇ 3 ၵေႃႉၼၼ်ႉတႄႉ ပႆႇလႆႈလူင်းႁူင်းယႃ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ