ႁူမ်ႈမဵတ်ႉတႃႇ ၸွႆႈထႅမ်ပီႈၼွင်ႉတႆး ပႃးၸဵမ်ပီႈၼွင်ႉယၢင်းလႅင်

0
492

ယူင်ႉၵၢၼ်ႁူမ်ႈမဵတ်ႉတႃႇ သင်ႇၶၸဝ်ႈမိူင်းမႄႈႁွင်ႈသွၼ် ဢွၼ်ႁူဝ်ၼမ်းၼႃႈ လူင်းၸွႆႈထႅမ် ပီႈၼွင်ႉတႆး ဢိၵ်ႇပီႈၼွင်ႉယၢင်းလႅင် ၸိူဝ်းထူပ်းၽေးၶူဝ်ႊဝိတ်ႉ 19 ။

Photo: မိူဝ်ႈၽွင်းၸဝ်ႈၶူးမႁႃႇသႅင်ၾႃႉ လႄႈသင်ႇၶၸဝ်ႈ လူင်းၸွႆႈထႅမ်တၵ်ႉၵႃႇပီႈၼွင်ႉၵူၼ်းမိူင်း

မိူဝ်ႈဝၼ်းတီႈ 08/06/2020 တၢင်တူဝ်ယူင်ႉၵၢၼ်ႁူမ်ႈမဵတ်ႉတႃႇသေ ၸဝ်ႈၶူးသႅင်ၸွမ်ႁိူင်း ဝတ်ႉၸွင်းၵၢင်၊ ၸဝ်ႈၶူးၶမ်းသႅၼ် ဝတ်ႉပၢင်းၽႅၼ်း လူၺ်ႈသင်ႇၶၸဝ်ႈလၢႆလၢႆၸဝ်ႈ လႆႈလူင်းပိုၼ်ႉတီႈ ၸွႆႈထႅမ်ပီႈၼွင်ႉၵူၼ်းမိူင်း တီႈဝၢၼ်ႈၼႂ်းသွႆ ႁူမ်ႈ 34 လင်ႁိူၼ်း၊ ဢိူင်ႇပၢင်မူ ၸႄႈဝဵင်းမႄႈႁွင်ႈသွၼ် ၸိုင်ႈထႆး၊ ၸိူဝ်းထူပ်းၽေးၶူဝ်ႊဝိတ်ႊ 19 သေ တိုၵ်ႉယၢပ်ႇၽိုတ်ႇ ၶဝ်ႈၼမ်ႉတၢင်းၵိၼ်။

ၶူဝ်းၶွင်ႁႅင်ႈ ၶွင်ၵိၼ်တၢင်းယႅမ်ႉ ၸိူဝ်းလႆႈၸွႆႈထႅမ်ၵႂႃႇပွၵ်ႈၵမ်းၼႆႉ ပဵၼ်ၶဝ်ႈသၢၼ်၊ ၼမ်ႉမၼ်း၊ ၵွၼ်ႈသီ၊ ၽွင်သၵ်ႉၶူဝ်း၊ ယႃႈထူဝ်ၶဵဝ်ႈ၊ ၶႆႇၵႆႇလႄႈၼမ်ႉပႃး ဢိၵ်ႇငိုၼ်းတွင်းၵမ်ႈၽွင်ႈ-ၼႆယဝ်ႉ။

ၸဝ်ႈၶူးမႁႃႇသႅင်ၾႃႉ လၢင်းၶိူဝ်း ၽူႈၵိူဝ်းၵုမ်ယူင်ႉၵၢၼ်ႁူမ်ႈမဵတ်ႉတႃႇ လၢတ်ႈတီႈၽူႈတွႆႇႁွၵ်ႈဝႃႈ- “ၵူၼ်းၸိူဝ်းလႆႈၸွႆႈထႅမ်ၵႂႃႇၼၼ်ႉၵမ်ႈၼမ် ပဵၼ်ၸၢဝ်းတႆးလႄႈ ၸၢဝ်းၶိူဝ်းယၢင်းလႅင်၊ မီးၸဵမ် ၵူၼ်းထဝ်ႈဢႃႇယုယႂ်ႇ၊ ၵူၼ်းတုၵ်ႉၶိတႃႉမိူၼ်ၼင်ႇၵူၼ်းတၢႆၽၢၵ်ႇ ၵူၼ်းတိၼ်မိုဝ်းငေႃးမိုဝ်းလိပ်ႈ၊ လႄႈၵူၼ်းပဵၼ်ၵိၼ်းၸိူဝ်းၼႆႉ”- ဝႃႈၼႆ။

Photo: မိူဝ်ႈၽွင်းၸဝ်ႈၶူးမႁႃႇသႅင်ၾႃႉ လႄႈသင်ႇၶၸဝ်ႈ လူင်းၸွႆႈထႅမ်တၵ်ႉၵႃႇပီႈၼွင်ႉၵူၼ်းမိူင်း

မၼ်းၸဝ်ႈယင်းသိုပ်ႇလၢတ်ႈထႅင်ႈဝႃႈ- မိူဝ်ႈဝၼ်းတီႈ 1/6/2020 ၼၼ်ႉၵေႃႈ တၢင်တူဝ်ယူင်ႉၵၢၼ် ႁူမ်ႈမဵတ်ႉတႃႇသေ ၸဝ်ႈသြႃႇလူင် ဝတ်ႉၸွင်းၵၢင် ဢွၼ်ႁူဝ်ၼမ်းၼႃႈလူင်းၸွႆႈထႅမ် ပီႈၼွင်ႉၵူၼ်းမိူင်း တီႈဝၢၼ်ႈသူပ်းပွင်ႇ ၸႄႈဝဵင်းပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ် တႃႇ 24 လင်ႁိူၼ်း ၼင်ႇၵဝ်ႇ။ ဢွၼ်ၼႃႈၼၼ်ႉ မိူဝ်ႈဝၼ်းတီႈ 6/6/2020 ၼၼ်ႉၵေႃႈ တၢမ်တူဝ်မၼ်းၸဝ်ႈလႄႈ ၸဝ်ႈၶူးသႅင်ၸွမ်ႁိူင်း လႆႈၵႂႃႇၸွႆႈထႅမ်ၼႃႈႁိူၼ်း မီးလုၵ်ႈဢွၼ်ႇလဵၵ်ႉ မီးတၢင်းယၢပ်ႇၽိုတ်ႇတႄႉတႄႉ လွင်ႈၶဝ်ႈၼမ်ႉတၢင်းၵိၼ်”- ဝႃႈၼႆ။

လိူဝ်သေၼၼ်ႉ ၸဝ်ႈၶူးမႁႃႇသႅင်ၾႃႉ တိုၵ်းသူၼ်းဝႃႈ- “ပၼ်ႁႃရေႃးၵႃႇၶူဝ်ႊဝိတ်ႉ 19 ၼႆႉ ပဵၼ်ပၼ်ႁႃပုၼ်ႈတႃႇၸိူဝ်ႉၸၢတ်ႈႁဝ်းတင်းသဵင်ႈ၊ ၵွပ်ႈပိူဝ်ႈၸိူင်ႉၼႆ ၶႂ်ႈႁႂ်ႈပီႈၼွင်ႉၸၢဝ်းၶိူဝ်းတႆးႁဝ်း မီးပၢႆးဝူၼ်ႉၵႂၢင်ႈ၊ ၼမ်ႉၸႂ်ၵႂၢင်ႈ၊ မေႃဢွမ်ႇလွမ်ႈၽွမ်ႉၵၼ်၊ မေႃႁၵ်ႉႁွမ်ၵၼ်၊ မေႃၸွႆႈထႅမ်ၵၼ်ၵႂႃႇ။ ပေႃးၸိူင်ႉၼၼ် ၽႃႇသႃႇ သႃႇသၼႃႇ ဢိၵ်ႇၸိူဝ်ႉၶိူဝ်းႁဝ်း တၵ်းတေၶိုၼ်ႈယႂ်ႇမႂ်ႇသုင် ဢမ်ႇႁၢင်ႉ”-ဝႃႈၼႆ။

Photo: မိူဝ်ႈၽွင်းၸဝ်ႈၶူးမႁႃႇသႅင်ၾႃႉ လႄႈသင်ႇၶၸဝ်ႈ လူင်းၸွႆႈထႅမ်တၵ်ႉၵႃႇပီႈၼွင်ႉၵူၼ်းမိူင်း

ႁူမ်ႈမဵတ်ႉတႃႇၼႆႉ သင်ၶၸဝ်ႈၼႂ်းမိူင်းထႆး ဢိၵ်ႇမူႇၸုမ်းပီႈၼွင်ႉတႆးၼႂ်းမိူင်းထႆး မိူၼ်ၼင်ႇ- 1)ၸုမ်းသင်ၶတႆးၼႂ်းၸိုင်ႈထႆး၊ 2.မုၵ်ႉၸုမ်းၸၢဝ်းၶိူဝ်းတႆး၊ 3.ၵွင်တိုၼ်းၵၢင်ၸွႆႈၸိူဝ်ႉၸၢတ်ႈ၊ 4.တုမ်းတူၼ်ႈတႆး၊ 5.ၸုမ်းၼုမ်ႇတႆးၵတ်းယဵၼ် ၸိူဝ်းၼႆႉ ႁူမ်ႈၵၼ်ၽွတ်ႈတင်ႈၶိုၼ်ႈမႃး မိူဝ်ႈဝၼ်းတီႈ 2/5/2020 ။ ႁူဝ်ပဝ်ႈပဵၼ် ၸဝ်ႈတူၼ်ၶူးမႁႃႇၺႃႇၼိၼ်ႇ ၽူႈၵွၼ်းဝတ်ႉမႂ်ႇ သႃထုပရႃႇတိတ်ႇ ၶဵတ်ႇယၢၼ်းၼႃးဝႃး ဝဵင်းလူင်မိူင်းၵွၵ်ႇ။

ႁူမ်ႈမဵတ်ႉတႃႇ မီးယိူင်းဢၢၼ်း ပိူဝ်ႈတႃႇႁူမ်ႈၵၼ်ၸွႆႈထႅမ်ပီႈၼွင်ႉၸၢဝ်းၶိူဝ်းတႆး ႁႅင်းၵၢၼ်ယၢၼ်မိူင်း ၸိူဝ်းထူပ်းၺႃးတၢင်းယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ် ယွၼ်ႉၽေးရေႃးၵႃႇၶူဝ်ႊဝိတ်ႉ 19 လႄႈပၼ်ႁႃၵူႈလွင်ႈလွင်ႈ။ ၸူဝ်ႈတင်ႈမႃးၶၢဝ်းတၢင်းႁိမ်းလိူၼ်ၼႆႉ လႆႈၸွႆႈထႅမ်ပီႈၼွင်ႉတႆး ႁႅင်းၵၢၼ်ယၢၼ်မိူင်း ၸိူဝ်းထူပ်းၽေးတၢင်းပဵၼ်ၶူဝ်ႊဝိတ်ႉ 19 ယဝ်ႉ မွၵ်ႈႁူဝ်ၵူၼ်း 7 ႁဵင်ပၢႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

SHARE