ၾူၼ်တူၵ်းႁႅင်း ၼမ်ႉႁူၺ်ႈ ၼမ်ႉပႃႇ လႆလုပ်ႇၼွင်းထူမ်ႈ ၼႂ်ႈဝဵင်းၵျွၵ်ႉမႄးႁၢဝ်ႈႁႅင်း တုမ်ႉတိူဝ်ႉႁူဝ်ႉ ၊ ႁိူၼ်း ၵူၼ်းဝၢၼ်ႈ၊ လိၼ်ၵူၼ်ႇပင်း ၵမ်ႈၽွင်ႈ။
မိူဝ်ႈဝၼ်းတီႈ 5/6/2020 ယၢမ်းႁူဝ်ၶမ်ႈ မွၵ်ႈ 6 မူင်းၶိုင်ႈၼႆႉ ၼမ်ႉလုပ်ႇၼွင်းထူမ်ႈ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁၢဝ်ႈႁႅင်း၊ ႁိူၼ်းၵူၼ်းဝၢၼ်ႈ ၸွမ်းသၢပ်ႇဝဵင်း ၸိူဝ်းၼမ်ႉလုပ်ႇၼွင်းထူမ်ႈၼၼ်ႉ မိူၼ်ၼင်ႇ မိူင်းတၢင်ႈ၊ ၼမ်ႉၸေႃႉ၊ ၸွႆးၵုင်း၊ လိူဝ်ၼၼ်ႉ ၼႂ်းဝဵင်းၵျွၵ်ႉမႄးထႅင်ႈလၢႆလၢႆတီႈ -ၼႆယဝ်ႉ။
ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ ၼႂ်း 2-3 ဝၼ်းၼႆႉ ၾူၼ်မႃးႁႅင်းၼႃႇၶႃႈ၊ ၼမ်ႉၵေႃႈထူမ်ႈႁၢဝ်ႈႁႅင်းၶႃႈယဝ်ႉ။ လွင်ႈလူႉသုမ်းၼႆႉတႄႉ ၶႃႈၵေႃႈ ဢမ်ႇလႆႈႁပ်ႉႁူႉၶေႃႈမုလ်းမၼ်းလီလီ။ လွင်ႈႁိူၼ်းၵူၼ်းဝၢၼ်ႈ ၵူၼ်ႇပင်းၼႆၼၼ်ႉၵေႃႈ ဢမ်ႇလႆႈငိၼ်းၶၢဝ်ႇဝႃႈႁိုဝ်၊ လႆႈငိၼ်းလွင်ႈႁူဝ်ႉဢုတ်ႇၵူၼ်ႇပင်းလႄႈ လိၼ်ၵူၼ်ႇလူင်း ႁိမ်းၶၢင်ႈႁိူၼ်းၸိူဝ်းၼႆႉၵူၺ်း။ လွင်ႈၼႆႉၵေႃႈ လူႉၵွႆၵႂႃႇၵႃႈႁိုဝ် ဢၼ်ဝႃႈၼၼ်ႉ ပႆႇလႆႈၶေႃႈမုလ်းမၼ်းၶႃႈ” ဝႃႈၼႆ။
ဝၼ်းၼၼ်ႉၵူၺ်းၼင်ႇၵဝ်ႇ ယၢမ်းၵၢင်ၼႂ်သမ်ႉ ၼမ်ႉလုပ်ႇဝၢၼ်ႈၼွင်ပိင်ဢွၼ်ႇ၊ ဝၢၼ်ႈပၢင်တီး၊ ဝၢၼ်ႈၶူဝ်ဢုင် ဢိၵ်ႇထႅင်ႈလၢႆလၢႆဝၢၼ်ႈ ။
ၸၢႆးထုၼ်းဝိၼ်းသိုပ်ႇလၢတ်ႈဝႃႈ “ၵဵဝ်ႇၵပ်းလွင်ႈၵၢၼ်ၸွႆႈထႅမ်ၼၼ်ႉ ပိူင်လူင်မၼ်း ႁဝ်းၶႃႈဢုပ်ႇၵႂႃႇတီႈပူႇႁဵင်ၶဝ် ႁႂ်ႈဢဝ်သဵၼ်ႈမၢႆ လွင်ႈလူႉသုမ်းတင်းသဵင်ႈ တၢင်ႇထိုင်တီႈၽူႈၵွၼ်းၸႄႈဝဵင်း။ ပေႃးဝႃႈ ၽူႈၵွၼ်းၸႄႈဝဵင်းၶဝ် လႆႈႁပ်ႉသဵၼ်ႈမၢႆမၼ်းယဝ်ႉၼႆ ၶဝ်ၸင်ႇတေလၢတ်ႈတီႈ ၶွမ်ႊမတီႊၽေးသၽႃႇဝ ၾၢႆႇၸတ်းသၢင်ႈႁၢင်ႈပွင်ပၼ်ၼၼ်ႉ ၸင်ႇတေလူင်းမႃးၵမ်ႉၸွႆႈထႅမ်ၶႃႈဢေႃႈ” ဝႃႈၼႆ။
လွင်ႈၼမ်ႉလုပ်ႇၼွင်းထူမ်ႈပွၵ်ႈၼႆႉ ယွၼ်ႉၾူၼ်တူၵ်းထပ်းၵၼ်မႃးလၢႆဝၼ်း၊ ၵူၺ်းၵႃႈ ၵူၼ်းလူႉတၢႆ မၢတ်ႇၸဵပ်းဢမ်ႇမီး ဝႃႈၼႆ။
