ၵၢၼ်ၶူၼ်ႉၶႂႃႉ ယုၵ်ႉယွင်ႈပႂ်ႉပႃးၽႄႈတိူၼ်းၾိင်ႈငႄႈ ၸၢဝ်းၶိူဝ်းတႆး သၢပ်ႇၼမ်ႉႁႃႈမႄႈ

[သိုပ်ႇမႃးတီႈၽိုၼ်မၢႆ ISSUE 018 June 2019]
[ၽႅၼ်ၵၢၼ်တႆးႁူမ်ႈသၢင်ႈ- The Noble plan of Tai Thai or Dai]

ၼႂ်းၽိုၼ်လိၵ်ႈၽူႈတွႆႇႁွၵ်ႈ ၼႂ်းမိူဝ်ႈလိူၼ်ၵျုၼ်ႊပူၼ်ႉမႃးၼၼ်ႉ ၶႃႈႁဝ်းလႆႈလၢတ်ႈၼႄၶေႃႈယိူင်းဢၢၼ်း ၽႅၼ်ၵၢၼ်တႆးႁူမ်ႈသၢင်ႈ (The Noble plan of Tai Thai or Dai) ဝႆႉဢမ်ႇပွတ်းဢမ်ႇယၢဝ်းယဝ်ႉၶႃႈ။ ၼင်ႇႁိုဝ် ၽူႈဢၢၼ်ႇလိၵ်ႈႁဝ်းၶႃႈ ပေႃးတေၶဝ်ႈၸႂ်ပွင်ႇၸႂ်ဝႆႉလူင်ႈၼႃႈ ပိူဝ်ႈတႃႇသိုပ်ႇဢၢၼ်ႇလႄႈ ပွင်ႇၸႂ်ၼိူဝ်လၵ်းၵၢၼ် လွင်ႈႁၢင်ႈႁႅၼ်း။ လွင်ႈၶိုင်ပွင်ႁဵတ်းသၢင်ႈၸွမ်းၽႅၼ်ၵၢၼ်တႆးႁူမ်ႈသၢင်ႈ ၵႂႃႇၸွမ်းၵၼ်ၼၼ်ႉယဝ်ႉၶႃႈ။ ၽႅၼ်ၵၢၼ်တႆးႁူမ်ႈသၢင်ႈ ဢၼ်လႆႈတမ်းၼႄဝႆႉ (3)ၶေႃႈပႃႈၼိူဝ်ၼၼ်ႉ တေသိုပ်ႇလၢတ်ႈသပ်းလႅင်းၵႂႃႇၸိူင်ႉၼင်ႇၼႆ။

(1)ၸိုဝ်ႈၶိူဝ်းၵူၼ်း၊ ၸိုဝ်ႈဝၢၼ်ႈ၊ ၸိုဝ်ႈဝဵင်း၊ ၸိုဝ်ႈသဵၼ်ႈတၢင်းလႄႈ ၸိုဝ်ႈမႄႈၼမ်ႉ (ၸွမ်းတွၼ်ႈလႂ်တွၼ်ႈၼၼ်ႉ)။

1.1 ၸိုဝ်ႈၶိူဝ်းၵူၼ်း (ၸိုဝ်ႈၶႄႇ၊ မၢၼ်ႈ၊ ၵလႃး၊ ၵႅဝ်၊ ထႆးလႄႈတႆး) -ၸိူင်ႉၼင်ႇ တႆးၸုင်း ၶႄႇႁွင်ႉၸႂူင်ႉ (ၸႂၢင်) မၢၼ်ႈႁွင်ႉသျၢၼ်းၼီႇ၊ ၵႅဝ်ႁွင်ႉၼုင်း (လုင်း)၊ ထႆးႁွင်ႉထႆးသႂူင်ႉ၊ တႆးႁွင်ႉတႆးလမ်၊ ၶဝ်ၸဝ်ႈႁွင်ႉၶိုၼ်းၶဝ်ဝႃႈ-ၸွင်း။

1.2 ၸိုဝ်ႈဝၢၼ်ႈ/ဢိူင်ႇ/ဝဵင်း/ၸႄႈတွၼ်ႈလႄႈမိူင်း (ၸိုဝ်ႈၶႄႇ၊ မၢၼ်ႈ၊ ၵလႃး၊ ၵႅဝ်၊ ထႆးလႄႈတႆး)-ၸိူင်ႉၼင်ႇ မိူင်းၶွၼ် (ၼႂ်းၸႄႈမိူင်းတႂ်ႈၶူင်း) ၶႄႇႁွင်ႉမင်သိုဝ်ႉ၊ မိူင်းၵွင် (ၼႂ်းၸႄႈမိူင်းၶၢင်) မၢၼ်ႈႁွင်ႉမူဝ်းၵွင်း၊ ၸႄႈႁၢႆးလွႆ (ၼႂ်းမိူင်းဢသ်ႉသမ်) ၵလႃးႁွင်ႉၸရၢႆးတေးဝူဝ်း၊ လႄႈမိူင်းသၢင်း (ၼႂ်းမိူင်းၵႅဝ်ၼိူဝ်) ၵႅဝ်ႁွင်ႉမူၵ်းၸႂ်ႊဝ်။

1.3 ၸိုဝ်ႈသဵၼ်ႈတၢင်းလူင်လႄႈ မႄႈၼမ်ႉ (ၸိုဝ်ႈၶႄႇ၊ မၢၼ်ႈ၊ ၵလႃး၊ ၵႅဝ်၊ ထႆးလႄႈတႆး) -ၸိူင်ႉၼင်ႇ မႄႈၼမ်ႉလႅင် ၶႄႇႁွင်ႉႁူင်ႁိူဝ်၊ မႄႈၼမ်ႉၶူင်း မွၼ်း-မၢၼ်ႈႁွင်ႉ တၢၼ်ႇလႂုၼ်ႇ-သလႂုၼ်ႇ၊ ထႆးသမ်ႉႁွင်ႉသႃလဝိၼ်း၊ ၶႄႇသမ်ႉႁွင်ႉၼူႉၵျႅင်း၊ မႄႈၼမ်ႉတီႈလၢဝ် ၵလႃးႁွင်ႉၽြူမ်ႊမပုတ်ႉတြႃႉ၊ မၢၼ်ႈ-ထႆးႁွင်ႉပြမ်ႇမႃႇပုတ်ႉတရ-ၽြူမ်ႊမပုတ်ႇ။

1.4 ၵႂၢမ်းလၢတ်ႈ၊ လိၵ်ႈလၢႆး၊ လွင်ႈၵိူဝ်းလီ၊ ၶူဝ်းၼုင်ႈလႄႈၵၢၼ်လဵင်ႉဢႃးၸိပ်ႉ (ၵၢၼ်လဵင်ႉတွင်ႉ) တူဝ်ယၢင်ႇ-တႆးၼႂ်းမိူင်းၶႄႇလၢတ်ႈၵႂၢမ်းတႆးလေႃးၶႄႇ (ၼိုင်ႈၵူႈဝႃႈ-ၼိုင်ႈတုၺ်ႇ၊ ပၢင်ၵုမ်ဝႃႈ-ၶၢႆႊၶုၺ်ႇ)၊ ၼႂ်းမိူင်းမၢၼ်ႈ လၢတ်ႈၵႂၢမ်းတႆးလေႃးမၢၼ်ႈ (ဝူၼ်ႉ/ၼိုၵ်ႉဝႃႈ- ၸဵၼ်းၸႃး)၊ ပၢင်ၵုမ်ဝႃႈ-ၸီးဝူၺ်း)၊ ၼႂ်းမိူင်းၵလႃး လၢတ်ႈၵႂၢမ်းတႆးလႄႈၵလႃး (မႄႈၼမ်ႉဝႃႈ-ၼတီႊ၊ ပၢင်ၵုမ်ဝႃႈ-သၽႃႈ)ၸဵမ်ၸိူဝ်းၼႆႉ။

1.5ၾိင်ႈထုင်း 12 လိူၼ် (တီႈလႂ်တီႈၼၼ်ႉ) တူဝ်ယၢင်ႇ-တႆးမိူင်းၶႄႇ ၼုင်ႈၶူဝ်းမိူၼ်ၶႄႇ၊ ထိုဝ်ၾိင်ႈပီမႂ်ႇ ၸွမ်းၶႄႇ၊ တႆးမိူင်းမၢၼ်ႈ ၼုင်ႈၶူဝ်းမိူၼ်မၢၼ်ႈ၊ ဝႆႈၽြႃးမိူၼ်မၢၼ်ႈ၊ တႆးမိူင်းၵလႃး ၼုင်ႈၶူဝ်းမိူၼ်ၵလႃး ဝႆႈၾႃႉဝၢၼ်းၽီမိူၼ်ၵလႃး-ၸဵမ်ၸိူဝ်းၼႆႉ။ (တူဝ်ယၢင်ႇ-ၸၢႆးၼုင်ႈၶူဝ်းလႄႈသုပ်းမူၵ်ႇသီသွမ်ႇမိူၼ်ၶႄႇ၊ ယိင်းတိုၵ်ႉပႂ်ႉပႃးၶူဝ်းၼုင်ႈတႆးယူႇမၢင်တီႈ။ ၸၢႆးသူင်သႂ်ႇၽႃႈတူင်ႇမၢၼ်ႈ၊ ယိင်းတိုၵ်ႉပႂ်ႉပႃးၶူဝ်းၼုင်ႈတႆးယူႇ မၢင်တီႈ။ တင်းၸၢႆးတင်းယိင်းၼုင်ႈၶူဝ်းၵလႃးသီၶၢဝ်မိူၼ်ၵၼ်) -ၸဵမ်ၸိူဝ်းၼႆႉ။

(2)ႁၢင်ႈၽႅၼ်ႇတီႈဝၢၼ်ႈ၊ ဝဵင်းလႄႈၸႄႈတွၼ်ႈ (ၸွမ်းတီႈလႂ်တီႈၼၼ်ႉ)

2.1 ႁၢင်ႈၽႅၼ်ႇတီႈၸႄႈဝဵင်း၊ ၸႄႈတွၼ်ႈ၊ ၸႄႈမိူင်းလႄႈၸိုင်ႈမိူင်း (ၸီႉၼႄတင်းတီႈယူႇသဝ်းၸၢဝ်းတႆး တီႈလႂ်တီႈၼၼ်ႉ)၊ တူဝ်ယၢင်ႇ-ၽႅၼ်ႇတီႈမိူင်းၶိူဝ်း ၼႂ်းယုၼ်ၼၢၼ်၊ ၽႅၼ်ႇတီႈမိူင်းထႅၼ် ၼႂ်းတူင်ႈၵဵင်ႈ (ၵႅဝ်ၼိူဝ်) ၊ ၽႅၼ်ႇတီႈမိူင်းမၢဝ်း ၼႂ်းၸႄႈၵႅင်ႇ (တိူင်းၸၵႅင်း) လႄႈၽႅၼ်ႇတီႈဢိူင်ႇၽႃၵႄးတႂ်ႈ ၼႂ်းမိူင်းဢသ်ႉသမ်-ၸဵမ်ၸိူဝ်းၼႆႉ။

2.2 ၸိုဝ်ႈဝၢၼ်ႈ၊ ၸိုဝ်ႈဝဵင်းၼႂ်းၽႅၼ်ႇတီႈ (ႁူမ်ႈတင်းၸိုဝ်ႈမိူဝ်ႈၵွၼ်ႇလႄႈ ၸိုဝ်ႈမိူဝ်ႈလဵဝ်) ၸိုဝ်ႈၶႄႇ၊ မၢၼ်ႈ၊ ၵလႃး၊ ၵႅဝ်၊ ထႆးလႄႈတႆး)။ တူဝ်ယၢင်ႇ-ဝၢၼ်ႈၸၢႆးလူင်၊ ဝဵင်းမိူင်းၸႄႈ၊ ၸႄႈတွၼ်ႈမိူင်းႁၢႆး၊ ၸႄႈမိူင်းၽွင်းငမ်းတူဝ်ၵဝ်ႇၸၢဝ်းတႆး 12 ပၼ်းၼႃး (ၶႂႅင်ယုၼ်ၼၢၼ်-မိူင်းၶႄႇ)။ ဝၢၼ်ႈၵဝ်ႈလၵ်း၊ သဵၼ်ႈတၢင်းပျေႇ၊ ၸႄႈဝဵင်းမယၢၼ်းၵူင်း၊ တိူင်းယၼ်ႇၵုင်ႇ (မိူင်းႁူမ်ႈတုမ်တင်းမၢၼ်ႈ)။ ဝၢၼ်ႈၼမ်ႉသၢႆး၊ ဢိူင်ႇၼမ်ႉသၢႆး၊ ၸႄႈဝဵင်းဢိတ်ႉထၼၵွရ်း (Itanagar-ဢွၵ်ႇသဵင်ပဵၼ်ဢိတ်ႉထၼၵွၼ်း)၊ ၸႄႈမိူင်းဢရုၼ်ႊၼၶျွၼ်ႊ (မိူင်းဢိၼ်ႊၻီႊယိူဝ်ႊ)။ ဝၢၼ်ႈႁူဝ်ၶူဝ်၊ ဢိူင်ႇလၢဝ်းၵၢႆႇ၊ ၸႄႈဝဵင်းလၢဝ်းၵၢႆႇ၊ (ၸႄႈတွၼ်ႈတူင်ႈၵဵင်ႈ၊ မိူင်းၵႅဝ်/ဝႅတ်ႉၼၢမ်း) -ၸဵမ်ၸိူဝ်းၼႆႉ။

(3)ထွႆႈၵႂၢမ်းဝေႃးႁႃရ ဢၼ်ၸႂ်ႉတိုဝ်းၼႂ်းၾိင်ႈၵူၼ်း (တူင်ႇဝူင်း)ၵူၼ်းတႆး (ပွတ်းလႂ်ပွတ်းၼၼ်ႉ)

3.1 ၸိုဝ်ႈထွႆႈၵႂၢမ်းဝေႃးႁႃရတႆး (ဢၽိထၢၼ်ႇ-ၵႂၢမ်းတႅတ်ႈ) သိင်ႇဢၼ်မီးၸႂ်လႄႈ သိင်ႇဢၼ်ဢမ်ႇမီးၸႂ် တင်းလူင်-ၸိူင်ႉၼင်ႇ ၸိုဝ်ႈမႆႉတင်းလူင်၊ ၸိုဝ်ႈမၢၵ်ႇတင်းလူင်၊ ၸိုဝ်ႈမွၵ်ႇတင်းလူင်လႄႈ ၸိုဝ်ႈသတ်းတင်းလူင်။

3.2 ဢင်ႇၵႃႇၶိူင်ႈပိူင်ၵူၼ်းလႄႈ ၶိူင်ႈပိူင်ၼႂ်းတူဝ်ၶိင်းတင်းလူင်- ၸိူင်ႉၼင်ႇ တူဝ်၊ ႁူဝ်၊ တႃ၊ ႁူ၊ ၶူၼ်ႁူဝ်၊ တပ်း၊ ပွတ်ႇ၊ ၶူင်းၼႂ်း-ၸဵမ်ၸိူဝ်းၼႆႉ။

3.3ၾိင်ႈပိူင်ၵႂၢမ်းၵပ်းထုၵ်ႇလႄႈ လင်ႇၵႃႇ/ၵႂၢမ်းဝွၵ်းတင်းလူင်- ၸိူင်ႉၼင်ႇ လင်ႇၵႃႇလူင်၊ ပၢၼ်းသႅင်း၊ ယွပ်ႇယွၼ်ႈ၊ ၶပ်း/သိူၼ်/ယိင်ႉ/သေႃး ၸဵမ်ၸိူဝ်းၼႆႉ။ [မၢႆတွင်း ။ ႁူဝ်ၶေႃႈမၢႆ 3 ၼႆႉ တူဝ်ယၢင်ႇမၼ်း လႆႈၼႅပ်ႇမႃးၸွမ်းတၢင်းလင်ၽိုၼ်လိၵ်ႈဢုပ်ႇဢူဝ်းၼႆႉယူႇ]

ၶေႃႈမုင်ႈမွင်း။ ။
ၼႂ်းၸၢဝ်းၶိူဝ်းတႆးမိူဝ်ႈလဵဝ် လႆႈႁၼ်မီးၵႃႈၵူၼ်းတႆး သၢႆၶိူဝ်းလၢဝ်းလႄႈထႆး သွင်ၸုမ်းၼႆႉၵူၺ်း ဢၼ်မိူဝ်ႈၵပ်းသိုပ်ႇလၢတ်ႈတေႃႇၵၼ်လႄႈ ဢမ်ႇလႆႈၸႂ်ႉလၢမ်ႈ (ဢမ်ႇလႆႈပိုင်ႈၵူၼ်းပိၼ်ႇၽႃးသႃ)သေ ႁူႉပွင်ႇၶဝ်ႈၸႂ်ၵၼ်ၼၼ်ႉ။ လိူဝ်ၼၼ်ႉၸၢဝ်းတႆးတၢင်ႇသၢႆၶိူဝ်းၵူႈတီႈတီႈၼႆႉ ဢမ်ႇမိူၼ်ၶဝ်ၸဝ်ႈသွင်ၸုမ်း လႆႈၸႂ်ႉလၢမ်ႈၸွႆႈၸင်ႇၶဝ်ႈၸႂ်ၵၼ်။ (ၶႃႈႁဝ်း)မုင်ႈမွင်းဝႃႈ လုၵ်ႉတီႈပၢင်ဢုပ်ႇဢူဝ်းသမ်မၼႃးၵမ်းၼႆႉသေ ၼႂ်းၵႃႈၸၢဝ်းၶိူဝ်းတႆးၵူႈတီႈတီႈ ၵူႈသၢႆၶိူဝ်း တေၶဝ်ႈၸႂ်ၵၼ်ၼမ်တိူဝ်းမႃး၊ တေၵႂႃႇမႃးတဵဝ်းႁႃသူႇၸႂ်းၵၼ် မိူၼ်ပီႈဢွၵ်ႇၼွင်ႉပဵၼ်။ လိုၼ်းသုတ်းၼႆႉ တေဢမ်ႇလႆႈၸႂ်ႉလၢမ်ႈ (ၽႃးသႃဢိင်းၵိသျ်း)သေ တေၵပ်းသိုပ်ႇတိတ်းတေႃႇၵၼ်လႆႈငၢႆႈငၢႆႈလူမ်လူမ် ၼႆယူႇ။

ၶေႃႈလူပ်းလင်။ ။
လွင်ႈတၢင်းဢၼ်လႆႈဢုပ်ႇဢူဝ်းသပ်းလႅင်းၼႄမႃးၸိူဝ်းၼႆႉ ႁဝ်းၶႃႈၸၢဝ်းၶိူဝ်းတႆးၼႂ်းမိူင်းထႆး (ပိူင်လူင်မၼ်းၼႂ်းၵဵင်းမႆႇ) ယုမ်ႇယမ်ၼၵ်းၼၵ်းၼႃၼႃဝႃႈ- ပီႈၼွင်ႉၸၢဝ်းၶိူဝ်းတႆးႁဝ်း ၸိူဝ်းမႃးၶဝ်ႈႁူမ်ႈပၢင်ဢုပ်ႇဢူဝ်း (သမ်မၼႃး) တီႈဝဵင်းလူင်တူၼ်ႈတီး ၼႂ်းၽွင်းပွႆးပီမႂ်ႇတႆးႁူမ်ႈသၢင်ႈ ၵမ်းတီႈ (2)ၼႆႉ ႁူမ်ႈတင်းပီႈၼွင်ႉ/ၼွင်ႉပီႈ ၸိူဝ်းဢၼ်မႃးၶဝ်ႈႁူမ်ႈတင်းသဵင်ႈ (ပိူင်လူင်မၼ်း ၵေႃလိၵ်ႈလၢႆးလႄႈ ၾိင်ႈငႄႈတႆးၵူႈတီႈတီႈ) တေဢဝ်ၸႂ်သႂ်ႇဝႆႉၵႃႈၶၼ်ၼမ်ႉၼၵ်း-ၼၵ်းၼၵ်းၼႃၼႃယူႇ ယုမ်ႇယမ်ၼင်ႇၼႆ။ ပေႃးလႆႈႁၼ်မႅၼ်ႈၽိုၼ်လိၵ်ႈၼႆႉယဝ်ႉၸိုင် တေပွင်ႇၸႂ်ၼိူဝ်- “ၽႅၼ်ၵၢၼ်တႆးႁူမ်ႈသၢင်ႈ” ဢၼ်မီးႁူဝ်ၶေႃႈလူင်မၼ်း (3) ယိူင်ႈပႃႈၼိူဝ်ၼႆႉသေ ပၼ်တၢင်းမုင်ႈမွင်းဝႃႈ တေႁပ်ႉဢဝ် “ၽႅၼ်ၵၢၼ်တႆးႁူမ်ႈသၢင်ႈ” ၼႆႉ မိူဝ်းဝႆႉပဵၼ်ၼႃႈၵၢၼ်(ပုၼ်ႈၽွၼ်း) ဢမ်ႇၼၼ် ၵၢၼ်ဝၢၼ်ႈၵၼ် ပိူဝ်ႈတႃႇၶိုင်ပွင်ႁဵတ်းသၢင်ႈ ႁႂ်ႈႁၼ်ၽွၼ်းၵၢၼ်မၼ်းႁင်းၽႂ်ႁင်းမၼ်းယူႇၼႆ။

လိုၼ်းသုတ်းၼႆႉ ၸင်ႇယွၼ်းၶွပ်ႈၵုၼ်းမုၼ်တၢင်ႇၼိူဝ်ၼမ်ႉၸႂ် ပီႈၼွင်ႉတႆးၵူႈၸၢဝ်းၶိူဝ်း၊ ၵူႈတီႈလႄႈၵူႈၵေႃႉ ၸိူဝ်းမႃးၶဝ်ႈႁူမ်ႈပၢင်ဢုပ်ႇဢူဝ်း လွင်ႈၵႂၢမ်းလၢတ်ႈ/လိၵ်ႈလၢႆး/ၾိင်ႈငႄႈ လႄႈပိုၼ်းမိူင်း ဢၼ်ၵဵဝ်ႇတင်း ၵူၼ်းတႆးၼႆႉ၊ ဢိၵ်ႇတင်းၶွပ်ႈၵုၼ်းမုၼ်တၢင်ႇ ၵေႃၾိင်ႈငႄႈလႄႈလိၵ်ႈလၢႆးတႆး (ငဝ်ႈငုၼ်း)၊ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး၊ ၵေႃလိၵ်ႈလၢႆးလႄႈၾိင်ႈငႄႈတႆးၵူႈတီႈတီႈ၊ ႁူမ်ႈတင်းၵေႃပွင်ၵၢၼ်ပဵၼ်ပွႆးပီမႂ်ႇတႆး ႁူမ်ႈသၢင်ႈ ၵမ်းတီႈ (2)၊ လႄႈၵေႃၽႄပၢင်ဢုပ်ႇဢူဝ်း (သမ်မၼႃး)တင်းသဵင်ႈ ဢၼ်ႁူမ်ႈၵၼ်ၸတ်းႁဵတ်းပၢင်ပွႆးပီမႂ်ႇတႆးႁူမ်ႈသၢင်ႈ ၵမ်းသွင်ၼႆႉ၊ ပၢင်ဢုပ်ႇဢူဝ်းၼႆႉ ပႃးၸဵမ်လူင်ပွင်ၸိုင်ႈၸႄႈမိူင်းတႆး (ၼႂ်းၸိုင်ႈမိူင်းႁူမ်ႈတုမ်တင်းမိူင်းမၢၼ်ႈ) ဢၼ်ပၼ်တၢင်းၸွႆႈထႅမ် ၵူႈသမ်ႇသႅၼ်ပိူင်ၼၼ်ႉ ဢမ်ႇသုတ်းဢမ်ႇသဵင်ႈတီႈၶႃႈယဝ်ႉ။

ၶေႃႈတိုၵ်းသူၼ်း။ ။
ၼင်ႇႁိုဝ်လၵ်းၵၢၼ်တႆးႁူမ်ႈသၢင်ႈ (3)ပိူင် ဢၼ်သပ်းလႅင်းဢုပ်ႇဢူဝ်းမႃးယဝ်ႉပႃႈၼိူဝ်ၼႆႉ တေထိုင်တီႈ လႆႈၼၼ်ႉ ယူႇတီႈတၢင်းၶတ်းၸႂ်သႂ်ႇႁႅင်းၵူၼ်းတႆးၵူႈၸၢဝ်းၶိူဝ်း ၵူႈတီႈလႄႈၵူႈၵေႃႉ၊ ႁဝ်းၶႃႈၸုမ်းတႆးၼႂ်းမိူင်းထႆး ၶႂ်ႈတိုၵ်းယွၼ်းထိုင် ၵူၼ်းတႆးၵူႈၸၢဝ်းၶိူဝ်းၵူႈတီႈလႄႈၵူႈၵေႃႉ ႁူမ်ႈမိုဝ်းလႄႈၸွႆႈၵၼ်ၶိုင်ပွင်ႁဵတ်းသၢင်ႈ ႁႂ်ႈၵိူတ်ႇပဵၼ်ၽွၼ်းၵၢၼ်လီ တွၼ်ႈတႃႇၵူၼ်းၶိူဝ်းတႆးႁဝ်းၵူႈတီႈၼႂ်းဝၼ်းမိူဝ်းၼႃႈ။

(ၶႃႈႁဝ်း)ယုမ်ႇယမ်ဝႃႈ ၽွၼ်းၵၢၼ်ၶွင်ၽႅၼ်ၵၢၼ်တႆးႁူမ်ႈသၢင်ႈၼႆႉ (ႁဝ်းၶႃႈ) တေလႆႈမႃးသိုပ်ႇဢုပ်ႇဢူဝ်းလႄႈ ၼႄၼမ်ႉၼႄတူဝ်ၵၼ် ၼႂ်းပၢင်ၵုမ်ဢုပ်ႇဢူဝ်း လွင်ႈၾိင်ႈငႄႈၸၢဝ်းၶိူဝ်းတႆးထႅင်ႈၶၢဝ်းၼႃႈယူႇ ၼႆသေ ယွၼ်းလိုဝ်ႈၶေႃႈၵႂၢမ်းတီႈၼႆႈၶႃႈယဝ်ႉဢေႃႈ။
မႂ်ႇသုင်ၶႃႈ

မၢႆဝၼ်း 20-22 လိူၼ်ၼူဝ်ႊဝႅမ်ႊၿိူဝ်ႊ ပီ 2014 [ပီတႆးပီလပ်းမူတ်ႉ (ပီပႄႉ) ပီမိူင်း 2109]
တီႈတိတ်းတေႃႇၵပ်းသိုပ်ႇ-
ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၵဵင်းမႆႇ (မိူင်းထႆး)
Tai Literaturecom& Culture Society-
Chiangmai P.O Box 259, Prashingh,
Chiangmai 50205 Thailand
မၢႆၾူၼ်း-66-53-231 112, E-mail: [email protected],
Website: www.taiculture.net
[မႁႃမုင်ႉ (မိူင်းၸႄႈ)၊ မၢႆၾူၼ်း -66-81-7846290 (ထႆး)၊ 09-362 78694 (မၢၼ်ႈ)၊ E-mail: [email protected]]

[တေသိုပ်ႇထႅင်ႈၽိုၼ်ၼႃႈ မၢႆ ISSUE 020, August 2019]

ၶူၼ်ႉၶႂႃႉလူၺ်ႈ – မႁႃမုင်ႉ (မိူင်းၸႄႈ)

ၶေႃႈမုလ်း – ပပ်ႉမႅၵ်ႉၵသိၼ်းၽူႈတွႆႇႁွၵ်ႈ မၢႆ 19, July 2019