ၵူၼ်းမိူင်း သီႇပေႃႉ ၶုတ်းထၢင်လုၵ်းမႂ်ႇ ႁိမ်းထၢင်ၵဝ်ႇ – ဢဝ်ထၢင်ၵဝ်ႇၵူၼ်ႇတဵင် ၶၢတ်ႇဢွၵ်ႊသီႊၵျိၼ်ႊ လူႉတၢႆတင်း 4 ၵေႃႉ ။
ဝၼ်းတီႈ 23/4/2020 ယၢမ်းႁူဝ်ၶမ်ႈ မွၵ်ႈ 6 မူင်းပၢႆ လုင်းၸၢႆးလႃႉ ဝၢၼ်ႈသွင်ၵႄး ၸႄႈဝဵင်းသီႇပေႃႉ ၶုတ်းႁွင်ႈထၢင်မႂ်ႇ တႃႇ ႁိူၼ်းမၼ်းၸၢႆး။ လုၵ်ႈၸၢႆး လုင်းလႃႉ 2 ၵေႃႉပီႈၼွင်ႉလႄႈ ၵူၼ်းၸွႆႈၶဝ် ၵေႃႉၼိုင်ႈ မႃးၶုတ်းၸွႆႈလုင်းလႃႉ။ ၶုတ်းၸမ်ထၢင် ၽၢႆႈၵဝ်ႇႁႅင်းၼႃႇလႄႈ ထၢင်ၽၢႆႈၵဝ်ႇ ၵူၼ်ႇသႂ်ႇၶဝ် 4 ၵေႃႉ။
ၸၢႆးၼုမ်ႇ ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်ၶုတ်းထၢင်ၽၢႆႈမႂ်ႇထႅင်ႈဢၼ်ၼိုင်ႈ ႁိမ်းတိတ်းၸပ်းၵၼ် တင်းထၢင် ၽၢႆႈၵဝ်ႇၼၼ်ႉ။ ၵမ်းၼႆႉ ၼမ်ႉထၢင်ၽၢႆႈၵဝ်ႇၼၼ်ႉ ၸိုမ်းၶဝ်ႈမႃးတၢင်းထၢင်ၽၢႆႈမႂ်ႇသေ မိူဝ်ႈၽွင်းတိုၵ်ႉ ၶုတ်းယူႇၼၼ်ႉ ဢဝ်ၼမ်ႉၼႂ်းထၢင်ၽၢႆႈၵဝ်ႇ တႅၵ်ႇၸူးၾၢႆႇထၢင်မႂ်ႇၼၼ်ႉသေ ၸဵမ်လိၼ်ၸဵမ်ၼမ်ႉ ၵူၼ်ႇတဵင်သႂ်ႇၶဝ်။ ၶဝ်ၼႅတ်ႈလူင်း ၸွႆႈၵၼ် တႃႇဢဝ်ဢွၵ်ႇမႃး။ ၵူၺ်းဢမ်ႇတၼ်း ဢွၵ်ႇမႃးလႆႈ။ ႁိုင်မွၵ်ႈၶိုင်ႈၸူဝ်ႈမူင်းၵူၺ်း ၶဝ်တင်းသီႇၵေႃႉ လႆႈလူႉတၢႆ ၵႂႃႇပႅတ်ႈ” ဝႃႈၼႆ။
ဢၼ်လူႉတၢႆၵႂႃႇၼၼ်ႉပဵၼ် လုင်းၸၢႆးလႃႉ ဢႃယု 48 ပီ၊ ၸၢႆးသီႇႁႃႉ လုၵ်ႈၸၢႆးလုင်းၸၢႆးလႃႉ ဢႃယု 25 ပီ၊ ၸၢႆးၸေႃႇဢူး တႃႇ လုၵ်ႈၸၢႆးလုင်းၸၢႆးလႃႉ ဢႃယု 21 ပီလႄႈ မွင်ႇမူဝ်းဢွင်ႇ ဢႃယု 27 ပီ ပီႈၼွင်ႉၵၼ်တင်းလုင်းၸၢႆးလႃႉ ဝႃႈၼႆ။
ၸၢႆးလၢဝ်သႅင် ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈတေၶုတ်းထၢင်ၽၢႆႈၼႆႉ ႁဝ်းၶႃႈ ၵူႈၵေႃႉ လူဝ်ႇလႆႈၾၢင်ႉသတိၵၼ်တႄႉတႄႉၶႃႈယဝ်ႉ။ ပေႃးတေၶုတ်းထၢင်ၼႆ ႁႂ်ႈၶုတ်းယၢၼ်ၵႆၵၼ် တင်းထၢင်ၵဝ်ႇ။ ပေႃးဢမ်ႇၼၼ် ၸၢင်ႈပဵၼ်ၽေးထိုင်သၢႆၸႂ်။ မိူၼ်ပဵၼ်ယူႇယၢမ်းလဵဝ်ၼႆႉ ပဵၼ်တွၼ်ႈသွၼ်ႁဝ်းၶႃႈ ၵူႈၵေႃႉယဝ်ႉ။ ယွၼ်ႉဝႃႈ ၼမ်ႉၶီႈၼမ်ႉ ယဵဝ်ႈၼႆႉ ဢၢႆၵွင်ႉမၼ်း ႁႅင်းၼႃႇၶႃႈ” ဝႃႈၼႆ။
ဢိင်ၼိူဝ်လွင်ႈၼႆႉ ယူႇတီႈၵူၼ်းဝၢၼ်ႈလႄႈ ၸုမ်းၾၢႆႇၶႄၾႆးၶဝ် လႆႈၵႂႃႇၸွႆႈၵၼ် ဢဝ်ဢွၵ်ႇမႃးသေ ယူႇတီႈၸုမ်းၸွႆႈထႅမ် ၶွပ်ႇလိၼ်ဢမ်ႇၶႅၼ်ႈ(နယ်စည်းမခြားပရဟိတ) သီႇပေႃႉ လႆႈဢဝ်ၵႃး 5 လမ်းသေ တေႃႉဢဝ်တူဝ်တၢႆ တင်း 4 ၵေႃႉ သူင်ႇ တီႈႁူင်းယႃ သီႇပေႃႉ ဝႃႈၼႆ။
