ပလိၵ်ႈတီႉၺွပ်းၵူၼ်းပူၼ်ႉပႅၼ်မၢႆမီႈသေ ဢွၵ်ႇႁိူၼ်းယၢမ်းၵၢင်ၶမ်ႈၵၢင်ၶိုၼ်း ပၼ်တူတ်ႈတၢမ်ႇယဵတ်ႈၶွၵ်ႈ တႃႇ 3 လိူၼ်။
မိူဝ်ႈဝၼ်းတီႈ 21/4/2020 ယၢမ်းၵၢင်ၶိုၼ်း ပလိၵ်ႈဝဵင်းတူၼ်ႈတီး လူင်းပိုၼ်ႉတီႈၵူတ်ႇထတ်းလွင်ႈႁူမ်ႇလူမ်ႈ။ ထူပ်းႁၼ် ၵူၼ်းမိူင်း ၸိူဝ်းပူၼ်ႉပႅၼ်မၢႆမီႈ ဢွၵ်ႇၼွၵ်ႈႁိူၼ်းၶၢဝ်းယၢမ်းၵၢင်ၶိုၼ်းၼႂ်းၵႄႈ 10 မူင်းထိုင် ၵၢင်ၼႂ် 4 မူင်း။ တီႉၺွပ်းလႆႈတီႈ ဝဵင်းမႂ်ႇဢေးသႃႇယႃႇ 5 ၵေႃႉလႄႈ တီႉလႆႈတီႈ ၼႂ်းပႃႇပႅၵ်ႇ ၼႃႈႁိူၼ်းလူင် (ဢဵင်ႇတေႃႇ) ၼၼ်ႉထႅင်ႈ 3 ၵေႃႉ။
ဢူးၽိဝ်းမိၼ်းထၢႆႉ ၽူႈၵွၼ်းၸႄႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဢၼ်တီႉလႆႈတီႈ ဢေးသႃႇယႃႇၼၼ်ႉ တႄႉ မိူဝ်ႈဝႃး ပၼ်တူတ်ႈၶင်ၶွၵ်ႈ 3 လိူၼ်ၵမ်းလဵဝ်ယဝ်ႉ။ တႃႇၵူၼ်းတူၼ်ႈတီးၵေႃႉၼိုင်ႈတႄႉ ယွၼ်ႉဢႃယု ပႆႇတဵမ်လႄႈ တေႃႈလဵဝ် တိုၵ်ႉၵူတ်ႇထတ်း ၶိုၼ်းလီလီယူႇ ” ဝႃႈၼႆ။
မိူဝ်ႈဝၼ်းတီႈ 20/4/2020 လူင်ပွင်ၸိုင်ႈမိူင်းတႆး လႆႈဢွၵ်ႇၶေႃႈပိုၼ်ၽၢဝ်ႇ ပူင်ၵႂၢမ်း ႁၢမ်ႈတပ်ႉ ၵူၼ်းမိူင်း ဢွၵ်ႇၼွၵ်ႈ ႁိူၼ်း ယေးတင်ႈဢဝ်ၶၢဝ်းယၢမ်း ၵၢင်ၶိုၼ်း 10 မူင်း ထိုင်ၵၢင်ၼႂ် 4 မူင်း ဝႃႈၼႆ။
ၵူၼ်းမိူင်း 8 ၵေႃႉ ဢၼ်ထုၵ်ႇၺႃးတၢမ်ႇတူၵ်းၶွၵ်ႈၼၼ်ႉ ၵူၼ်းဢေးသႃႇယႃႇ 5 ၵေႃႉပဵၼ် ၽူႈယိင်း 2 ၵေႃႉ ၽူႈၸၢႆး 3 ၵေႃႉ။ တီႈတူၼ်ႈတီးသမ်ႉ ၽူႈၸၢႆး 2 ၵေႃႉလႄႈ ၽူႈယိင်း 1 ၵေႃႉ ။
ဢူးၽိဝ်းမိၼ်းထၢႆႉ သိုပ်ႇလၢတ်ႈဝႃႈ “ ဢၼ်ပိုတ်ႇဢမူႉသေ ပၼ်တၢမ်ႇၶဝ်ၼၼ်ႉပဵၼ်တူဝ်ၶႃႈႁဝ်းၵမ်းလဵဝ်ယဝ်ႉ။ ယွၼ်ႉၶဝ် ဢမ်ႇႁဵတ်းၸွမ်းမၢႆမီႈ ဢၼ်ၸိုင်ႈမိူင်းဢွၵ်ႇဝႆႉၼၼ်ႉလႄႈ ၸင်ႇလႆႈဢဝ်လိူင်ႈၶဝ် ” ဝႃႈၼႆ။
ဢူးၸူဝ်းၺုၼ်ႉလုၼ်ႇ ၽွင်းလူင်ၾၢႆႇၵၢၼ်ငိုၼ်းလႄႈ ၶူင်းၵၢၼ် (သျှမ်းပြည်နယ်အစိုးရ ပြောခွင့်ရ စီမံကိန်း နှင့် ဘဏ္ဍရေးဝန်ကြီး) ၸႄႈမိူင်းတႆး ၊ ဢၼ်ပဵၼ်ၽူႈၶၢၼ်ပၢၵ်ႇ ၾၢႆႇၵုမ်းၵၢၼ် ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်းထၢင်ႇဝႃႈ ဢမ်ႇမီးၽႂ်ႁတ်းပၼ်တူတ်ႈတၢမ်ႇၼႆသေ ဢွၼ်ၵၼ်ၼင်ႈ ၵုမ်းလဝ်ႈၵၼ်၊ ၼင်ႇႁိုဝ် ၶဝ်ပေႃးတေဢမ်ႇႁတ်းႁဵတ်းထႅင်ႈၼၼ်ႉ ၸင်ႇလႆႈပၼ်တူတ်ႈတၢမ်ႇ ႁႂ်ႈပေႃးလႆႈႁူႉၵၼ်ၶႃႈဢေႃႈ” ဝႃႈၼႆ။
ယွၼ်ႉဝႃႈၽွင်းယၢမ်းတေႃႈလဵဝ်ၼႆႉ ပဵၼ်ၽွင်းၶၢဝ်းဢၼ်လီမႆႈၸႂ် လွင်ႈတၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈႁၢဝ်ႈႁႅင်း ယူႇတီႈလူင်ပွင်ၸိုင်ႈမိူင်းႁူမ်ႈတုမ် ၸင်ႇဢွၵ်ႇၶေႃႈႁၢမ်ႈ ထိုင်ၵူၼ်းမိူင်းၵူႈၵေႃႉ။
တေႃႈလဵဝ် ၼႂ်းမိူင်းႁူမ်ႈတုမ် ၵူၼ်းၸပ်းတၢင်းပဵၼ် မီးၵႂႃႇ 139 ၵေႃႉယဝ်ႉ၊ လူႉတၢႆ 5 ၵေႃႉလႄႈ ယႃၶႅၼ်း 9 ၵေႃႉ ယူႇတီႈ ႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ