ၸုမ်းၽူႈဢွၼ်ႁူဝ် ၶၵ်ႉၵၢၼ်လွင်ႈငမ်းယဵၼ် PPST 10 ၸုမ်း ၸတ်းႁဵတ်းပၢင်ၵုမ် တီႈၵဵင်းမႆႇ တႃႇၶၢဝ်းတၢင်း 3 ဝၼ်း။

ဝၼ်းတီႈ 2-4/12/2019 ယၢမ်းၵၢင်ၼႂ် 9 မူင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၸတ်းႁဵတ်းပၢင်ၵုမ် ၸုမ်းၽူႈဢွၼ်ႁူဝ် ၶၵ်ႉၵၢၼ်လွင်ႈငမ်းယဵၼ် PPST တီႈၵဵင်းမႆႇ ၸိုင်ႈထႆး။ ပိူင်လူင်မၼ်းဢုပ်ႇ ဢူဝ်း ၶၵ်ႉၵၢၼ်လွင်ႈငမ်းယဵၼ် တႃႇတေသိုပ်ႇၵႂႃႇတၢင်းၼႃႈၼၼ်ႉ တေႁဵတ်းႁိုဝ်၊ လွင်ႈၵၢၼ်ငၢၼ်း ၼႂ်းၸုမ်း NCA-S EAO၊ လွင်ႈပၢင်ၵုမ် JICM လႄႈ လွင်ႈၵၢၼ်မိူင်း ၸဵမ်ၸိူဝ်းၼႆႉ။

ၼႂ်းဝၼ်းတီႈ 2 ဝၼ်းပိုတ်ႇပၢင်ၵုမ်ဢုပ်ႇဢူဝ်းၼၼ်ႉ ယူႇတီႈၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈၸူဝ်ႈၶၢဝ်း PPST မွၵ်ႇ လၢတ်ႈၶေႃႈၵႂၢမ်းပိုတ်ႇပၢင်ၵႂႃႇဝႃႈ “ ပၢင်တိုၵ်းဢၼ်ပဵၼ်ယူႇ ၼႂ်းပိုၼ်ႉတီႈၸၢဝ်းၶိူဝ်းၼႆႉ ပူၼ်ႉပႅၼ်သုၼ်ႇ လႆႈၵူၼ်း။ ၵူၼ်း ၼႂ်းပိုၼ်ႉတီႈၸၢဝ်းၶိူဝ်း လႆႈတုၵ်ႉယၢပ်ႇမႃး ပီယၢဝ်းၶၢဝ်းႁိုင်လႄႈ တေလႆႈၵေႃႇတင်ႈ မိူင်းႁူမ်ႈတုမ်ၾႅတ်ႊၻရႄႊသေ ႁဵတ်း သၢင်ႈၸိုင်ႈမိူင်း ႁႂ်ႈပေႃးၵတ်းယဵၼ်လႄႈ ၶိုၼ်ႈယႂ်ႇမႂ်ႇသုင်” ဝႃႈၼႆ။

လိူဝ်ၼၼ်ႉ လွင်ႈဢၼ်မိူင်းၵမ်ႊပီႊယႃႊ ပိုတ်ႇလိူင်ႈၸွႆးတြႃး မိူင်းမၢၼ်ႈ တီႈလုမ်းတတ်းသိၼ်တြႃး ICJ ၼၼ်ႉ တႃႇတေ ၵႂႃႇၵႄႈလိတ်ႈၼၼ်ႉ ပဵၼ်ပုၼ်ႈၽွၼ်းလူင်ပွင်ၸိုင်ႈ။ တၢင်းၾၢႆႇ လုမ်းတတ်းသိၼ် ICJ ၵေႃႈ မီးၶေႃႈမုလ်းသၢၵ်ႈသေႇ (လၵ်းထၢၼ်) ၼႅၼ်ႈၼႃၵႃႈႁိုဝ် ဢၼ်ဝႃႈၼၼ်ႉ ထုၵ်ႇလီဝူၼ်ႉၸွမ်းယူႇ ၸွမ်သိုၵ်းလူင် ယွတ်ႈသိုၵ်းလၢတ်ႈၼႄၼင်ႇၼႆ။

ၸုမ်း PPST ၼႆႉ ယူႇတီႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA 8 ၸုမ်းသေ ၶွတ်ႇၽွတ်ႈ ၶိုၼ်ႈမႃး ၸုမ်းဢွၼ်ႁူဝ်ဢုပ်ႇဢူဝ်းၶၵ်ႉၵၢၼ်လွင်ႈငမ်းယဵၼ် PPST ။ ဝၢႆးမႃး ၽိူမ်ႉၶဝ်ႈမႃး လုၵ်ႈၸုမ်း ထႅင်ႈ 2 ၸုမ်း တင်းမူတ်းလုၵ်ႈၸုမ်းမီး 10 ၸုမ်း။

မိူၼ်ၼင်ႇ ၶွင်ႇသီႇဢဝ် ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)၊ ၸုမ်း ပူတ်း ပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်း ႁူမ်ႈၸိူဝ်ႉၸၢတ်ႈ ၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်း မိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈ တုမ်ၸိူဝ်ႉၸၢတ်ႈယၢင်းၽိူၵ်ႇ (KNU)၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA)၊ တပ်ႉသိုၵ်းပူတ်းပွႆႇၸိူဝ်ႉ ၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP)၊ ၸုမ်းလႃးႁူႇတီႇမူဝ်ႊၶရႅတ်ႉ တိၵ်ႉ LDU လႄႈ ၸုမ်းပႃႇတီႇမိူင်းမွၼ်းမႂ်ႇ NMSP ၸဵမ်ၸိူဝ်းၼႆႉ။