ပၢင်ၵုမ်လူင် သင်ၶၸဝ်ႈ လႄႈ တၵ်ႉၵႃႇသတ်ႉထႃး ၸိုင်ႈတႆးပွတ်းဢွၵ်ႇၶူင်း ဢုပ်ႇၵုမ်ထတ်းသၢင်လွင်ႈၼႃႈၵၢၼ်တႃငၢၼ်း ဢၼ်လႆႈတူင်ႉၼိုင်ႁဵတ်းသၢင်ႈမႃးလႄႈ လွင်ႈဝၢင်းၽႅၼ်ၼႃႈၵၢၼ်တၢင်းၼႃႈ ၸဵမ်ၸိူဝ်းၼႆႉ။
ဝၼ်းတီႈ 1/7/2019 ယၢမ်းဝၢႆးဝၼ်း 1 မူင်းထိုင် 3 မူင်း သင်ၶၸဝ်ႈလႄႈ တၵ်ႉၵႃႇသတ်ႉထႃး ႁူမ်ႈၵၼ် ၸတ်းႁဵတ်းပၢင်ၵုမ် လူင် ပွၵ်ႈၵမ်း 74 တီႈတိူၵ်ႈသွၼ်လိၵ်ႈ ထမ်ႇမူဝ်းတယ (ဝတ်ႉမိူင်းၼၢႆး) ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။
ၸဝ်ႈၶူးၵုလိသ ၽူႈၶဝ်ႈႁူမ်ႈပၢင်ၵုမ် လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ၵုမ်မိူဝ်ႈဝႃးၼၼ်ႉ ပဵၼ်ပၢင်ၵုမ် ႁူဝ်ႁုပ်ႈပီ သင်ၶၸဝ်ႈ လႄႈ တၵ်ႉၵႃႇသတ်ႉထႃး ၼႂ်းၸိုင်ႈတႆးပွတ်းဢွၵ်ႇၶူင်း ႁူဝ်ၵျွင်း/ ဝတ်ႉတႆး တင်းမူတ်းတင်းသဵင်ႈ ဢုပ်ႇၵုမ်ၵၼ် လူၺ်ႈ လွင်ႈၼႃႈၵၢၼ်သင်ၶၸဝ်ႈ။ ၸူႉသဵၼ်ႈမၢႆ သင်ၶၸဝ်ႈတင်းမူတ်းတင်းသဵင်ႈ ၼႂ်းသင်ၶၸဝ်ႈ မုၼ်ၸဝ်ႈ မုၼ်ၸၢင်းလႄႈ ၸဝ်ႈသၢင်ႇ” ဝႃႈၼႆ။
သိုပ်ႇလၢတ်ႈဝႃႈ “ ယဝ်ႉၵေႃႈ ပၼ်ႁႃဝတ်ႉလႂ် ဝတ်ႉၼၼ်ႉ မီးၸိူင်ႉႁိုဝ် မႃးဢုပ်ႇၵၼ် ႁႃတၢင်းဢွၵ်ႇ ထုၵ်ႇလီၵႄႈၸိူင်ႉႁိုဝ် ၼႆၸိူဝ်းၼႆႉ။ သင်ဝႃႈ ဝတ်ႉၼႆႉ ဢမ်ႇမီးၸဝ်ႈၼင်ႈၵျွင်းၼႆၵေႃႈ တေလႆႈပၢင်းမိူဝ်ႈဝၼ်းပၢင်ၵုမ်လူင်ၼႆႉ ပေႃးဝၢႆးပၢင် ၵုမ်ယဝ်ႉ တေႁႃ ၸဝ်ႈတူၼ်/ ပႃးလႂ်ၵႂႃႇၼင်ႈ၊ ၵႂႃႇယူႇ၊ ၵႂႃႇပႂ်ႉ ၸဵမ်ၸိူဝ်းၼႆႉ” ဝႃႈၼႆ။
လိူဝ်ၼၼ်ႉ ဢုပ်ႇၵုမ်ၵၼ် ပႃးလွင်ႈငိုၼ်းၵွင်ၵၢင်သင်ၶၸဝ်ႈ ၵိုတ်းဝႆႉၵႃႈႁိုဝ် ထုၵ်ႇလီၸႂ်ႉၸိူင်ႉႁိုဝ် ၸဵမ်ၸိူဝ်းၼႆႉ။ ယဝ်ႉၵေႃႈ ပေႃးမီးသင်ၶၸဝ်ႈ ၸိူဝ်းဢၼ်ဢွင်ႇလိၵ်ႈမႃးၼႆၸိုင် မႃးဢုပ်ႇၵုမ်ၵၼ် တေၸတ်းႁဵတ်းပၢင်ယုၵ်ႉယွင်ႈ ပၼ်ၸိူင်ႉႁိုဝ်ၼႆ ၸိူဝ်းၼႆႉ။
ပၢင်ၵုမ်လူင်သင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်းၼႆႉ တင်းမူတ်းမီးသင်ၶၸဝ်ႈ ၶဝ်ႈႁူမ်ႈပၢင်ၵုမ် 57 တူၼ်လႄႈ ၵူၼ်းႁိူၼ်း 43 ၵေႃႉ ဝႃႈၼႆ။
ပၢင်ၵုမ်လူင်သင်ၶၸဝ်ႈၼႆႉ ၸတ်းႁဵတ်းမႃး ပဵၼ်ပွၵ်ႈၵမ်း 74 ၊ ပေႃးပွၵ်ႈၵမ်း 75 တူၵ်းမႅၼ်ႈပီၵွၼ်းသႅင်ၼႆ တေၸတ်း ႁဵတ်းပၢင်ၵုမ်ၶိုၵ်ႉယႂ်ႇလူင် ဝႃႈၼႆ။
ၸဝ်ႈၶူး ၵုလိသ လၢတ်ႈဝႃႈ “ ပီၼႃႈမႃး တူၵ်းမႅၼ်ႈပီၵွၼ်းသႅင် ပၢင်ၵုမ် ၶွပ်ႈတဵမ် 75 ပီယဝ်ႉ သင်ၶၸဝ်ႈႁဝ်းၶႃႈ တေၶၢႆႉ ပၢင်ၵုမ်ၼႆႉ ၵႂႃႇၸတ်းႁဵတ်းတီႈ ဝတ်ႉမွၵ်ႇမႆႇ(ၵွင်းမူးၶမ်း) ယိူင်းဢၢၼ်းဝႆႉ တေၸတ်းႁဵတ်းပၢင်ၵုမ်ၶိုၵ်ႉယႂ်ႇလူင်” ဝႃႈၼႆ။
ပၢင်ၵုမ်လူင် သင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်းၼႆႉ ၸတ်းႁဵတ်းမႃး မိူဝ်ႈဝၼ်းသဝ် ဝၼ်းတီႈ 9 လိူၼ်ၵျုႊ 1945 ဝၢႆး သိုၵ်းၵမ်ႇၽႃႇပွၵ်ႈ 2 ဝႃႈၼႆ။
