ပၢင်ၶဝ်ႈဝၢတ်ႈ/ တိုဝ်းၵမ် သင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်း ပွၵ်ႈၵမ်း 69 ၸတ်းႁဵတ်းတီႈဝဵင်းၵဵင်းတုင် တၵ်ႉၵႃႇ သတ်ႉထႃးတီႈၸမ်/ၵႆ ၶဝ်ႈႁူမ်ႈလူႇတၢၼ်းၵိုၼ်းၶွၼ်ႈ။
ဝၼ်းတီႈ 10/01/2019 သင်ၶၸဝ်ႈလႄႈ တၵ်ႉၵႃႇသတ်ႉထႃး ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင် ၶဝ်ႈဝတ်ႈ/ တိုဝ်း ၵမ် တႃႇၶၢဝ်းတၢင်း 10 ဝၼ်း တီႈဝတ်ႉတိၼ်ထၢတ်ႈၸွမ်သဝၼ် ဢိူင်ႇယၢင်းၵဵင် ၸႄႈဝဵင်းၵဵင်းတုင် ၸိုင်ႈတႆး ပွတ်း ဢွၵ်ႇၶူင်း။
ၸဝ်ႈၶူးၵုလိသ ၽူႈၶၢၼ်ပၢၵ်ႇ ၼႂ်းပၢင်ပွႆးၶဝ်ႈဝၢတ်ႈ/တိုဝ်းၵမ် တီႈတိၼ်ထၢတ်ႈၸွမ်သဝၼ် လၢတ်ႈတီႈၽူႈတွႆႇႁွၵ်ႈဝႃႈ “ၸွမ်းၼင်ႇထုင်းၵႂၢမ်းၽြႃးပဵၼ်ၸဝ်ႈ၊ ဢဝ်ၸွမ်းဝိၼီး ၽြႃးပဵၼ်ၸဝ်ႈႁေႃးမႃးၼၼ်ႉသေ မၼ်းပဵၼ်တီႈ သင်ၶၸဝ်ႈ ၽွမ်ႉသဵင်ပဵင်းပၢၵ်ႇၵၼ်သေလႄႈ ႁဵတ်းသၢင်ႈမႃး၊ သြႃႇတၵ်ႉၵႃႇၵေႃႈၸမ်ၸႂ်ၵၼ်မႃး ၼင်ႇႁိုဝ် ၸေႇတၼႃႇ တၵ်ႉၵႃႇၶဝ် ပေႃးတေ ၸိုၼ်ႈသႂ် ၶဝ်ႈၵႂႃႇၼႂ်းသႃသၼႃ လိုၵ်ႉလိုၵ်ႉလမ်ႇလမ်ႇၼၼ်ႉ ၸင်ႇဝႃႈ ဢွၼ်ၵၼ် ႁဵတ်းသၢင်ႈမႃး။ ပွၵ်ႈၵမ်း ၼႆႉ ပဵၼ်ပွၵ်ႈၵမ်း 69 ၵမ်းထူၼ်ႈ 1 တီႈတိၼ်ထၢတ်ႈၸွမ်သဝၼ်ၼႆႉၶႃႈ” ဝႃႈၼႆ။
သင်ၶၸဝ်ႈ ဢၼ်မႃးၶဝ်ႈတိုဝ်းၵမ်သမ်ႉ ၸဝ်ႈရႁၢၼ်း တင်းသဵင်ႈ 68 တူၼ်၊ ၸဝ်ႈသၢင်ႇ 36 ၸဝ်ႈ တင်းမူတ်းႁူမ်ႈၵၼ် 104 ၸဝ်ႈ ဝႃႈၼႆ။
ၸဝ်ႈၶူးၵုလိသ လၢတ်ႈဝႃႈ “ ၵၢၼ်ၶဝ်ႈတိုဝ်းၵမ်ဝၢတ်ႈၼႆႉ ၸွမ်းၼင်ႇပုတ်ႉထၽြႃးပဵၼ်ၸဝ်ႈ ပူင်တမ်းဝၢင်းဝႆႉ ၼိုင်ႈပီ လႂ်ၼိုင်ႈပွၵ်ႈ သင်ၶၸဝ်ႈ တေလႆႈတိုဝ်းၵမ်ပရိဝၢတ်ႈ၊ ရႁၢၼ်းၸိူဝ်းဢၼ်ဢမ်ႇပေႃးၸိုၼ်ႈသႂ်ၼၼ်ႉ သင်ဝႃႈ လႆႈၶဝ်ႈ ဝၢတ်ႈၸိုင် မၼ်းၵေႃႈတေၸိုၼ်ႈသႂ်မႃး။ ယဝ်ႉၵေႃႈ တၵ်ႉၵႃႇသတ်ႉထႃး ၵူႈတီႈတီႈ ဢၼ်မႃးလူႇ၊ မႃးတၢၼ်းၵေႃႈ ပဵၼ် ၵုသူလ်ယႂ်ႇလူင်။ မၼ်းပဵၼ်ၵုသူလ်ၸိူင်ႉႁိုဝ်ၼႆ ရႁၢၼ်းဢၼ်ဢမ်ႇပေႃးၸိုၼ်ႈသႂ်၊ ဢၼ်မီးတၢင်းၽိတ်းဝႆႉဢိတ်း ဢီႈၼၼ်ႉ သင်မႃးၶဝ်ႈဝၢတ်ႈယဝ်ႉၸိုင် မၼ်းတေၸိုၼ်ႈသႂ် ပဵၼ်ရႁၢၼ်းၸႅတ်ႈၸၢင်ႇၵႂႃႇ တၵ်ႉၵႃႇဢၼ်လႆႈလူႇ၊ လႆႈ တၢၼ်းၼၼ်ႉၵေႃႈ တေၵုသူလ်ယႂ်ႇလူင်” ဝႃႈၼႆ။
ဝၼ်းတီႈ 10 ၼႆႉ ပဵၼ်ဝၼ်းသင်ၶၶွၼ်ႈတုမ်ၵၼ် ဝၼ်းတီႈ 11 ထိုင် 20 သမ်ႉ ပဵၼ်ဝၼ်းသင်ၶၸဝ်ႈၶဝ်ႈတိုဝ်းၵမ်။ ဝၼ်းတီႈ 21 သမ်ႉ ပဵၼ်ဝၼ်းလူႇတၢၼ်းယၢတ်ႇၼမ်ႉ။ မိူဝ်ႈဝႃး ဝၼ်းတီႈ 10 တႄႉ သင်ၶၸဝ်ႈ လႄႈ ပီႈၼွင်ႉတၵ်ႉၵႃႇ သတ်ႉထႃးမႃးၶဝ်ႈႁူမ်ႈ ပၢင်ပွႆးၶဝ်ႈဝၢတ်ႈ ၼပ်ႉႁူဝ်ႁဵင်” ဝႃႈၼႆ။
သင်ၶၸဝ်ႈ ဢၼ်မႃးၶဝ်ႈတိုဝ်းၵမ်တီႈဝတ်ႉတိၼ်ထၢတ်ႈၸွမ်သဝၼ်ၼႆႉ ပဵၼ်သင်ၶၸဝ်ႈတၢင်း ၵဵင်းတုင်၊ တႃႈၶီႈလဵၵ်း၊ မိူင်းပဵင်း၊ မိူင်းၶၢၵ်ႇ၊ မိူင်းယၢင်းလႄႈ တူၼ်ႈတီး ဝႃႈၼႆ။
လိူဝ်ၼၼ်ႉ သင်ၶၸဝ်ႈ တၢင်းၾၢႆႇမိူင်း/ ယူၼ်း ဢၼ်ၶဝ်ႈတိုဝ်းၵမ် ၼႂ်းၸႄႈဝဵင်းၵဵင်းတုင်သမ်ႉ ၶဝ်ႈတိုဝ်းၵမ်တီႈ ဝတ်ႉ ၵွင်ႉ ဢိူင်ႇဝတ်ႉသၢဝ်း၊ ဝတ်ႉၵဵင်းၽွင်း ဢိူင်ႇယၢင်းလေႃးလႄႈ ဝတ်ႉလွၵ်ႇၿူဝ်(မွၵ်ႇမူဝ်) ဝဵင်းမႂ်ႇ ၸဵမ်ၸိူဝ်းၼႆႉ။
လႅင်ႇၶၢဝ်ႇ – လႅတ်ႇၼုမ်ႇ မင်းရၢႆး (ၵဵင်းတုင်)
