သင်ၶၸဝ်ႈ ပွတ်းဢွၵ်ႇၶူင်း ပိုတ်ႇလုမ်းငဝ်ႈငုၼ်းသင်ၶ တီႈဝတ်ႉမွၵ်ႇမႆႇ/ ၵွင်းမူးၶမ်း ဝဵင်းၵဵင်းတုင် ၼႂ်းႁူဝ်လိူၼ်ၼႆႉ ဝႃႈၼႆ။

ဝၼ်းတီႈ 3/6/2019 သင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်း ႁူမ်ႈၵၼ်ပိုတ်ႇလုမ်းငဝ်ႈငုၼ်းမုၵ်ႉၸုမ်းလူင်သင်ၶ ၸိုင်ႈတႆး (ပွတ်းဢွၵ်ႇၶူင်း) တီႈဝတ်ႉမွၵ်ႇမႆႇ/ ၵွင်း မူးၶမ်း ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း တႃႇသင်ၶၸဝ်ႈ ၵူႈမိူင်းမိူင်း ပေႃးတေ လႆႈၵပ်းသိုပ်ႇ တိတ်းတေႃႇၵွင်ႉၵၢႆႇ ႁႃၵၼ်ငၢႆႈ ၸဵမ်ၼွၵ်ႈမိူင်းၼႂ်းပတ်းပိုၼ်ႉ ၸဵမ်ၸိူဝ်းၼႆႉ။

ၸဝ်ႈၶူး ၵုလိသ ၽူႈယိပ်းငိုၼ်း/ ၸုမ်းပွင်ၵၢၼ် တီႈလုမ်းငဝ်ႈငုၼ်းသင်ၶၸိုင်ႈတႆးပွတ်းဢွၵ်ႇၶူင်း လၢတ်ႈတီႈၽူႈတွႆႇႁွၵ်ႈ ဝႃႈ“ ယိူင်းဢၢၼ်းဢၼ်တီႈလႆႈပိုတ်ႇလုမ်းမႃးၼႆႉ ႁႂ်ႈသင်ၶၸဝ်ႈ ၵူႈမိူင်းမိူင်း ႁႂ်ႈပေႃးႁူႉတီႈၵပ်းသိုပ်ႇ(တိတ်းတေႃႇ) ၵၼ်ငၢႆႈ၊ ဢမ်ႇဝႃႈ တင်းၾဵတ်ႉပုၵ်ႉ ဢွၼ်ႊလၢႆႊလႄႈသင်၊ တင်းၶၢဝ်ႇသၢၼ်လႄႈသင်၊ လိၵ်ႈလၢႆးလႄႈသင် ႁႂ်းပေႃးၵွင်ႉၵၢႆႇၵၼ် သင်ၶၼႂ်းမိူင်းတႆးပတ်းပိုၼ်ႉ ၸဵမ်ၼွၵ်ႈမိူင်းၼႂ်းမိူင်း၊ လိၵ်ႈမႃးလႄႈသင်၊ ၵၢၼ်ၵပ်းသိုပ်ႇမႃးလႄႈသင် ႁႂ်ႈမႃး ထိုင်တီႈလုမ်း၊ လုၵ်ႉတီႈလုမ်းၼႆႉသေယဝ်ႉ တေတၢင်ႇထိုင် ၼႃယၵ၊ ဢၼုၼႃယၵ ၶဝ်ၸဝ်ႈသေယဝ်ႉ တေတႅပ်းတတ်းၵႂႃႇ ထုၵ်ႇလီလႆႈ ႁဵတ်းသၢင်ႈၸိူင်ႉႁိုဝ်။ ၵဵဝ်ႇၵပ်းလူၺ်ႈၵၢၼ်ၽွမ်ႉႁူမ်ႈႁဝ်းလႄႈသင်ၼႆ ပေႃးပၢႆးၼႂ်းသင်ၶ တီႈၵဵင်းတုင်ၼႆႉ ႁႂ်ႈမၼ်းယဝ်ႉ တီႈလုမ်းၼႆႉ၊ ၶၢဝ်ႇသင်သေဢမ်ႇဝႃႈ ႁႂ်ႈမႃးႁွတ်ႈၽႅဝ်တီႈလုမ်းၼႆႉ။ ယူႇတီႈလုမ်းၼႆႉ တေၸတ်းၵၢၼ်လူင်းၵႂႃႇ” ဝႃႈၼႆ။

ႁူဝ်ပဝ်ႈ ၽူႈၵွၼ်းလုမ်းငဝ်ႈငုၼ်းသင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်းၼႆႉ ပဵၼ်ၸဝ်ႈၶူးၺႃၼသီရိ(ဢမ်ႇၼၼ်) ၸဝ်ႈ မၢၼ်ႇတႃဢွၼ်ႇ ဝတ်ႉၵမ်မထၢၼ်းမႁႃပေႃးထိ ဝဵင်းတႃႈၶီႈလဵၵ်း၊ ၸဝ်ႈၶူးၸေႃးတိၵ ၽူႈၵွၼ်းဝတ်ႉယၢင်းပူး၊ ၽူႈမၢႆလူင် သမ်ႉ ၸဝ်ႈၶူးၵႃႇလိင်ႇတ B.A, M.A တိူၵ်ႈသွၼ်လိၵ်ႈ ဝတ်ႉထမ်ႇမေႃးတယ ၵဵင်းတုင်၊ ၸဝ်ႈၶူးယႃႇၸိင်ႇ၊ ၸဝ်ႈၶူး လႃႉ သူၺ်ႇ ၵမ်မထၢၼ်းမႁႃၽေႃးထိ တႃႈၶီႈလဵၵ်း ၸဵမ်ၸိူဝ်းၼႆႉ။

ၽူႈယိပ်းငိုၼ်းသမ်ႉ ၸဝ်ႈၶူးၵုလိသ ဝတ်ႉၵၢတ်ႇတဝ်ႇ လႄႈ ၸဝ်ႈၶူးဢဵၵ်ႉသရ B.A တိူၵ်ႈသွၼ်လိၵ်ႈထမ်ႇမေႃးတယ ၵဵင်းတုင် ဝႃႈၼႆ။

ၸဝ်ႈၶူး ၵုလိသ လၢတ်ႈဝႃႈ “ ၽူႈဢၼ်ၼင်ႈလုမ်းၸုပ်ႈၼိုင်ႈသမ်ႉ ပဵၼ်ၸဝ်ႈၶူးၵုလိသ ဝတ်ႉၵၢတ်ႇတဝ်ႇလႄႈ ၸဝ်ႈၶူး သေႃးပၼ B.A ဝတ်ႉတူယႃး၊ ၸဝ်ႈၶူးသူႇရိယ ဝတ်ႉမိူင်းပဵင်း/ မိူင်းလီပဵင်းၸႂ်၊ ၼိုင်ႈၸုပ်ႈလႂ် 3 တူၼ်။ ၼိုင်ႈလိူၼ်ၼိုင်ႈ ၸုပ်ႈ တေပၼ်ႇပုတ်ႈၵၼ်ၼင်ႈၵႂႃႇ” ဝႃႈၼႆ။

လုမ်းငဝ်ႈငုၼ်းသင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်းၼႆႉ ၵေႃႇတင်ႈမႃး မိူဝ်ႈပီ 2018 လိူၼ်မေႊ ဝၼ်းတီႈ 22 သေ ထိုင် မႃး ပီ 2019 လိူၼ်မေႊ ဝၼ်းတီႈ 22 ၸင်ႇဢွၼ်ၵၼ်လုမ်းလႃး ပတ်းပူလူမႄး။ ထိုင်မႃး ဝၼ်းတီႈ 3 လိူၼ်ၵျုၼ်ႊ 2019 ၼႆႉ ၸင်ႇၶဝ်ႈႁၢပ်ႇၵၢၼ်တႄႇႁဵတ်းသၢင်ႈၼင်ႈလုမ်းမႃး ဝႃႈၼႆ။