ဝၼ်းတီႈ 6/2/2019 ၼႆႉ ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသုၵျီႇ တေမႃးမိူင်းတႆးပွတ်းၸၢၼ်း ႁွတ်ႈထိုင်တႃႈသၢင်းသေ တေတွၵ်ႇလၵ်း ပိုတ်ႇၶူင်းၵၢၼ် တႃႇႁဵတ်းထႅင်ႈၶူဝ်လင်မႂ်ႇ ၾၢႆႇတႂ်ႈၶူဝ် ၵဝ်ႇယၢမ်းလဵဝ်။

ၶူဝ်တႃႈသၢင်းလင်ၵဝ်ႇၼႆႉ ႁပ်ႉလႆႈၼမ်ႉၼၵ်း 16 တၼ်ႊ၊ သဝ်ၾင်ၸိူၵ်ႈ ၾင်ႇတင်းဢွၵ်ႇၶူင်းသမ်ႉ ၵူၼ်ႇပင်း ၵမ်းၼိုင်ႈ မိူဝ်ႈႁၢင်ပီ 2017 ၊ ၽွင်းၼၼ်ႉၵၢၼ်ၸႂ်ႉၶူဝ်လႆႈၵိုတ်းၵႂႃႇ 2-3 ဝၼ်း၊ ၶူဝ်ၵဝ်ႇၵေႃႈဢမ်ႇပေႃးၶႂ်ႈလီ၊ လူင်ပွင်ၸိုင်ႈသမ်ႉမီးၽႅၼ်ၵၢၼ် တႃႇၶႂၢၵ်ႈပဵၼ် သဵၼ်ႈတၢင်းလူင် ဢေႊသျိူဝ်ႊ လႄႈ ၸင်ႇတေႁဵတ်းထႅင်ႈၶူဝ်လင်မႂ်ႇ- ၼႆ ၸၢႆးၼွင်ႉ ၽူႈတႅၼ်းသၽႃး ၸႄႈမိူင်း ဝဵင်းမိူင်းပၼ်ႇ (ပႃႇတီႇသိူဝ်ႇၽိူၵ်ႇ) လၢတ်ႈၼႄႇၼင်ႇၼႆ။

“သဵၼ်ႈတၢင်းၼႆႉ ပဵၼ်ၽႅၼ်ၵၢၼ်သဵၼ်ႈတၢင်း ဢေႊသျိူဝ်ႊ ၶႄႇ – မၢၼ်ႈ – ထႆး တိတ်းတေႃႇၵၼ် လႄႈ တေၶႂၢၵ်ႈၶူဝ်လင်မႂ်ႇဢေႃႈ၊ လႆႈႁူႉဝႃႈ ၶူဝ်လင်မႂ်ႇၼႆႉ တေႁပ်ႉၼမ်ႉၼၵ်းထိုင် 60 တၼ်ႊ၊ ၶူဝ်လင်မႂ်ႇၼႆႉ တေႁဵတ်းၾၢႆႇတႂ်ႈ ၸပ်းသႂ်ႇၶူဝ်လင်ၵဝ်ႇၼႆႉ ၼႆဢေႃႈ” – ၸၢႆးၼွင်ႉလၢတ်ႈ။

ၶူင်းၵၢၼ်လူင်ၼႆႉ လုၵ်ႉတီႈ လူင်ပွင်ၸိုင်ႈသုၼ်ၵၢင် ၼေႇပျီႇတေႃႇ လူင်းမႃးၵမ်းသိုဝ်ႈလႄႈ ၽူႈမီးပုၼ်ႈၽွၼ်း ၼႂ်းလူင်ပွင်ၸိုင်ႈၼေႇပျီႇတေႃႇ တေမႃးၸွမ်း တေႃႇဢွင်ႇသၢၼ်းသုၵျီႇသေ တင်းၼမ်သေဢမ်ႇၵႃး လႆႈႁူႉဝႃႈ ၸွမ်ၽွင်းလူင်မိူင်းတႆး လူင်ပွင်ၸိုင်ႈမိူင်း တေပဵၼ်ၵေႃႉၼမ်းမႃး။

ၸဝ်ႈၵႃးဢၼ်ၵႆႉတၢင်ႇၶူဝ်းၵုၼ်ႇသိၼ်ၵႃႉ မိူင်းတႆးပွတ်းၸၢၼ်း ပွတ်းဢွၵ်ႇ လၢတ်ႈဝႃႈ – မိူဝ်ႈဢွၼ်တၢင်း တေႁဵတ်း ၶူဝ်ၼႆ ႁဝ်းၶႃႈၵေႃႈယၢမ်ႈငိၼ်းမႃးယူႇ။ ယင်းယၢမ်ႈငိၼ်းဝႃႈ တေတဵင်ၾၢႆလူင်တႃႈသၢင်းသေ ဢၢၼ်းဢဝ်ၵႃး ၵႂႃႇၼိူဝ်ၾၢႆဢဝ်၊ ၵူၼ်းပိုၼ်ႉတီႈသမ်ႉႁူမ်ႈၵၼ်သၢၼ်ၶတ်းလႄႈ ဢမ်ႇပဵၼ်ႁဵတ်း၊ ပေႃးပဵၼ်ႁဵတ်းတႄႉ ႁဝ်းၶႃႈတႄႉ ၸူမ်းၶႃႈဢေႃႈ တေလႆႈၵႂႃႇမႃးၵႃႉၶၢႆငၢႆႈ – ဝႃႈၼႆ။

ၶူဝ်တႃႈသၢင်းၼႆႉ မိူဝ်ႈဢွၼ်တၢင်း မီးၸိုဝ်ႈဝႃႈ ၶူဝ်တႃႈၸၢင်ႉ ဢိင်ၼိူဝ် တႆးသူင်မိုတ်ႈ လၢတ်ႈၵႂၢမ်းပိူၼ်ႈလႄႈ ဢဝ်သဵင်ယဵၼ်းၵႂႃႇပဵၼ်တႃႈသၢင်း၊ ၵူၼ်းဢႃႇယု 80 ၶဝ်ၸဝ်ႈၵမ်ႈၽွင်ႈ ယင်းတိုၵ်ႉႁွင်ႉဝႃႈ ၶူဝ်တႃႈၸၢင်ႉယူႇ။ ၾၢႆႇတၢင်းဢွၵ်ႇၶူင်း ပဵၼ်တပ်ႉၵွင် တႂ်ႈတိူင်းသိုၵ်းသၢမ်ၸဵင်ႇၵဵင်းတုင် ၵုမ်းၵမ်ဢဝ်ႁူမ်ႇလူမ်ႈဝႆႉသေ ၾၢႆႇတၢင်းတူၵ်း ၶူင်းသမ်ႉ မီးတပ်ႉ တႂ်ႈၸၵၶ 17 မိူင်းပၼ်ႇ တႂ်ႈတိူင်းသိုၵ်း ယလၶ ၶူဝ်လမ် ဢဝ်ႁူမ်ႇလူမ်ႈ။