သိုၵ်းမၢၼ်ႈ ဢၼ်ဢဝ်ႁူမ်ႇလူမ်ႈ တီႈယေးငိုၼ်း (မျၢၼ်ႇမႃႉသီးပႂႃးယေးပၢၼ်ႇ) ဝဵင်းသႅၼ်ဝီ ၵေႃႉ႞ ၼၼ်ႉ မဝ်းလဝ်ႈသေ ၶဝ်ႈထုပ်ႉပေႃႉႁႅမ် ၵူၼ်းၼုမ်ႇ ၸဝ်ႈႁၢၼ်ႉၵႅတ်းၶူၼ်ႁူဝ် ၸဵပ်းလိူဝ်ႁႅင်း။
မိူဝ်ႈဝႃး ဝၼ်းတီႈ 28/9/2021 ယၢမ်းၵၢင်ၼႂ် သိုၵ်းမၢၼ်ႈ ဢၼ်ပႂ်ႉဢဝ်ႁူမ်ႇလူမ်ႈ ယေးငိုၼ်း (မြန်မာ့ စီးပွားရေးဘဏ်) ၼႂ်းဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ မဝ်းလဝ်ႈသေ ၶဝ်ႈၵႂႃႇၼႂ်းႁၢၼ်ႉၵႅတ်းၶူၼ်ႁူဝ် ဢၼ်ပိုတ်ႇဝႆႉၼႃးယေးငိုၼ်းၼၼ်ႉယဝ်ႉ ပၢပ်းၵႅမ်ႈ ထုပ်ႉပေႃႉ ဢဝ်တိၼ်ပိၵ်ႉသႂ်ႇ ၸဝ်ႈၶွင်ႁၢၼ်ႉ ၵူၼ်းၼုမ်ႇၵႅတ်းၶူၼ်ႁူဝ်ၼၼ်ႉ ပဵၼ်လၢႆၵမ်း ။
ၵူၼ်းသႅၼ်ဝီ ဢၼ်ႁၼ်တႂ်ႈတႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၼၼ်ႉ မၼ်းမဝ်းလဝ်ႈသေ ၶဝ်ႈၵႂႃႇ ၼႂ်းႁၢၼ်ႉၵႅတ်း ၶူၼ်ႁူဝ်ၼၼ်ႉသေ ထုပ်ႉပေႃႉတီႈၵွၵ်းႁူဝ် ယဝ်ႉၵေႃႈ ပၢပ်းၵႅမ်ႈၵူၼ်းၼုမ်ႇၼၼ်ႉ ပဵၼ်လၢႆၵမ်း။ လိူဝ်ၼၼ်ႉ ပိတ်ႉသႂ်ႇထႅင်ႈၵူၼ်းၼုမ်ႇၼၼ်ႉ ပဵၼ်လၢႆ ၵမ်းၶႃႈဢေႃႈ။ ၵူၼ်းၼုမ်ႇၼၼ်ႉ လႆႈမၢတ်ႇၸဵပ်းႁႅင်း ထိုင်တီႈပေႃးပႆတၢင်းဢမ်ႇလႆႈၶႃႈ”- ဝႃႈၼႆ။
သိုၵ်းမၢၼ်ႈၼၼ်ႉ လိူဝ်သေ ထုပ်ႉပေႃႉပိတ်ႉသႂ်ႇၵူၺ်းဢမ်ႇၵႃး ပၢႆယွၵ်ႈၵွင်ႈ လွၵ်ႈငိုတ်ႈသႂ်ႇထႅင်ႈ ဝႃႈၼႆ။
လွင်ႈသိုၵ်းမၢၼ်ႈ ၶဝ်ႈႁၢၼ်ႉပေႃႉထုပ်ႉ ႁႅမ်မၼ်းၸၢႆးၼၼ်ႉသေ မၼ်းၸၢႆး လႆႈတႅမ်ႈလိၵ်ႈပိုၼ်ၽႄႈၵႂႃႇ ၼိူဝ်ဢွၼ်ႊလၢႆႊ လႄႈ ၽူႈမီးပုၼ်ႈၽွၼ်း တပ်ႉမၢၼ်ႈ သႅၼ်ဝီ ယွၼ်းႁႂ်ႈၶိုၼ်းမွတ်ႇပႅတ်ႈ လွင်ႈတႅမ်ႈတၢင်ႇၼၼ်ႉ ဝႃႈၼႆ။
“မိူဝ်ႈဝႃး ယၢမ်းဝၢႆးဝၼ်း တူဝ်ၽူႈမီးပုၼ်ႈၽွၼ်းၶဝ် မႃးၽႅဝ်ႁိူၼ်း ၵူၼ်းၼုမ်ႇၼၼ်ႉသေ ယွၼ်းတွင်းပၢၼ်ႇ ႁႂ်ႈမွတ်ႇ ပႅတ်ႈ ဢၼ်တႅမ်ႈတၢင်ႇဝႆႉ ၼိူဝ်ဢွၼ်ႊလၢႆႊၼၼ်ႉ။ ယဝ်ႉၵေႃႈ တေသၢႆႈတႅၼ်းပၼ်ဝႃႈၼႆသေ ၵူၺ်းၵႃႈ တေႃႇထိုင်ယၢမ်းလဵဝ် ပႆႇသၢႆႈတႅၼ်းသင်မႃး”- ၵူၼ်းပိုၼ်ႉတီႈ သႅၼ်ဝီ သိုပ်ႇလၢတ်ႈၼႄၼင်ႇၼႆ။
ၵူၼ်းၼုမ်ႇ ဢၼ်ထုၵ်ႇသိုၵ်းမၢၼ်ႈ ပိတ်ႉပေႃႉ ထုပ်ႉႁႅမ်ၼၼ်ႉ ပဵၼ်ၵူၼ်းၵႅတ်းၶူၼ်ႁူဝ် ႁႃလဵင်ႉ ၼႃႈႁိူၼ်း၊ ပဵၼ်ၵူၼ်းၼုမ်ႇ သိုဝ်ႈယူဝ်းၵေႃႉၼိုင်ႈ။ ယွၼ်ႉသိုၵ်းမၢၼ်ႈ ႁႅမ်မၼ်းၸၢႆးသေ ယၢမ်းလဵဝ် ႁူဢမ်ႇပေႃးၶႂ်ႈ ငိၼ်းလီ၊ တိၼ်ၵေႃႈ ဢမ်ႇပေႃးၶႂ်ႈပႆႇလႆႈလီ ၸဵပ်းၸဵပ်းၵႅၼ်းၵႅၼ်းဝႆႉ ၼႆ ၵူၼ်းယူႇႁိမ်းၵိၼ်ၸမ်ၶဝ် လၢတ်ႈ ၼင်ႇၼႆ။
