ၸုမ်းယိပ်းၵွင်ႈၵၢင်ႇ ၼႂ်းမိူင်းတႆး ၶဵင်ႈၶႅင်ၵၢၼ်သိုၵ်းတေႃႇၵၼ်လႄႈ ၵူၼ်းမိူင်းႁိမ်း 1,500 ၵေႃႉ လႆႈဢွၼ်ၵၼ်ပၢႆႈ ယၢၼ်ႁိူၼ်းယေး ဝႃႈၼႆ။
ဝၼ်းတီႈ 06/01/2019 ယၢမ်းၵၢင်ဝၼ်း 11 မူင်း ၵူၼ်းမိူင်းႁူဝ်ၵူၼ်း 1,480 ၵေႃႉ လႆႈဢွၼ်ၵၼ်ပၢႆႈမႃးသွၼ်ႈဝႆႉတီႈ ဝတ်ႉ ၽူဝ်းတေႃႇ၊ ဝတ်ႉၼႃးမၢၵ်ႇၶေႃ၊ ဝတ်ႉၼွင်ၵေႃႈ၊ ဝတ်ႉပၢင်သိမ်၊ ဝတ်ႉ/ၵျွင်းၵၢင်၊ ဝတ်ႉၼႃးသၢင်း(ၵွင်းႁုင်း)၊ ဝတ်ႉပၢင် ၼိဝ်ႉ၊ ဝတ်ႉတူၼ်ႈၵႃႈလႄႈ ဝတ်ႉၵၢင်ဝဵင်း(သီႇပေႃႉ) ၼႂ်ႈၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ယွၼ်ႉသိုၵ်းဢူၺ်းလီ ပွတ်းႁွင်ႇတင်း သိုၵ်း RCSS ၶဵင်ႈၶႅင်ၵၢၼ်သိုၵ်းတေႃႇၵၼ် ၼႂ်းပိုၼ်ႉတီႈ ဝႃႈၼႆ။
ၵူၼ်းပၢႆႈၽေးသိုၵ်း တီႈဝၢၼ်ႈၼမ်ႉမေႃႇလူင် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈလႆႈငိၼ်းသဵင်ၵွင်ႈသေ လႆႈဢွၼ်ၵၼ် ပၢႆႈဢွၵ်ႇမႃးၶႃႈ။ လႆႈငိၼ်းသဵင်ၵွင်ႈၾၢႆႇလဵဝ်ၵူၺ်း။ သဵင်ၵွင်ႈတႄႉ တႅၵ်ႇတၢင်းႁိမ်း ဝၢၼ်ႈႁဝ်း ဝၢၼ်ႈၼမ်ႉမေႃႇလူင်” ဝႃႈၼႆ။
ၽူႈပွင်ၵၢၼ် ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ“ မိူဝ်ႈၼႆႉ ပဵၼ်ဝၼ်းၸၼ် ပဵၼ် ဝၼ်းပိုတ်ႇ ႁူင်းႁဵၼ်းလႄႈ ယူႇတီႈၽူႈတႅၼ်းတင်း ပႃႇတီႇႁူဝ်သိူဝ်ႁဝ်း လႆႈၵႂႃႇတၢင်ႇလၢတ်ႈၼႄ ၾၢႆႇပၢႆးပၺ်ၺႃ တီႈဝဵင်းသီႇပေႃႉ ႁဝ်းသေ ႁႂ်ႈလႆႈလူင်းသွၼ်ပၼ် လုၵ်ႈႁဵၼ်းႁဝ်းၶႃႈ ဢၼ်ပၢႆႈမႃးသွၼ်ႈဝႆႉတီႈဝတ်ႉၸိူဝ်းၼၼ်ႉ။ ၼင်ႇႁိုဝ် လုၵ်ႈဢွၼ်ႇ ႁဝ်းၶႃႈ ပေႃးတေဢမ်ႇလႆႈၶၢတ်ႇၵၢၼ်ႁဵၼ်း” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈဢွၵ်ႇမႃးသမ်ႉ ၵူၼ်းဝၢၼ်ႈၵဵတ်းၽူၼ်၊ ဝၢၼ်ႈၼွင်ၵေႃႈ၊ ဝၢၼ်ႈတူၼ်ႈၵႅင်း၊ ဝၢၼ်ႈပၢင် ၼိဝ်ႉ၊ ဝၢၼ်ႈၼႃးၵၢင်၊ ဝၢၼ်ႈၶၢႆးႁဵဝ်း၊ ဝၢၼ်ႈၽၵ်းႁိ၊ ဝၢၼ်ႈလူင်ဝၢႆ၊ ဝၢၼ်ႈပၢင်ၸဝ်ႈမိူင်း၊ ဝၢၼ်ႈၼႂ်းလူင်၊ ဝၢၼ်ႈႁူဝ်ၼႃး၊ ဝၢၼ်ႈႁုင်း၊ ဝၢၼ်ႈတႃႈလူင်၊ ဝၢၼ်ႈၼမ်ႉမေႃႇလူင်၊ ဝၢၼ်ႈၼႃးသၢင်းလႄႈ ဝၢၼ်ႈပၢင်ႁၢႆး ၸဵမ်ၸိူဝ်းၼႆႉ။
ႁူဝ်ၵူၼ်းပၢႆႈၽေးသိုၵ်းသမ်ႉ တီႈဝတ်ႉၽူဝ်းတေႃႇ ၸၢႆး 150 ၵေႃႉ၊ ယိင်း 135 ၵေႃႉ ႁူမ်ႈ 285 ၵေႃႉ။ ဝတ်ႉၼႃးမၢၵ်ႇၶေႃ ၸၢႆး 211 ၵေႃႉ၊ ယိင်း 356 ၵေႃႉ ႁူမ်ႈ 567 ၵေႃႉ။ တီႈဝတ်ႉၼွင်ၵေႃႈ ၸၢႆး 23 ၵေႃႉ၊ ယိင်း 46 ၵေႃႉ ႁူမ်ႈ 69 ၵေႃႈ။ ဝတ်ႉ ပၢင်ႇသိမ် ၸၢႆး 33 ၵေႃႉ၊ ယိင်း 52 ၵေႃႉ ႁူမ်ႈ 85 ၵေႃႉ။ ဝတ်ႉၵျွင်းၵၢင် ၸၢႆး 30 ၵေႃႉ၊ ယိင်း 48 ၵေႃႉ ႁူမ်ႈ 78 ၵေႃႉ။ ဝတ်ႉ ၼႃးသၢင်း (ၵွင်းႁုင်း) ၸၢႆး 105 ၵေႃႉ၊ ယိင်း 116 ၵေႃႉ ႁူမ်ႈ 221 ၵေႃႉ။ ဝတ်ႉပၢင်ၼိဝ်ႉ ၸၢႆး 19 ၵေႃႉ၊ ယိင်း 21 ၵေႃႉ ႁူမ်ႈ 40 ၵေႃႉ။ ဝတ်ႉတူၼ်ႈၵႃႈ ၸၢႆး 42 ၵေႃႉ၊ ယိင်း 58 ၵေႃႉ ႁူမ်ႈ 100 ၵေႃႉလႄႈ တီႈဝတ်ႉ/ၵျွင်းၵၢင်ဝဵင်း(သီႇပေႃႉ) ၸၢႆး 17 ၵေႃႉ၊ ယိင်း 18 ၵေႃႉ ႁူမ်ႈ 35 ၵေႃႉ တင်းမူတ်း ႁူမ်ႈၵၼ် ၸၢႆး 630 ၵေႃႉ၊ ယိင်း 850 ၵေႃႉ တင်းမူတ်း 1,480 ၵေႃႉ။
