ၽူႈတႅၼ်းသၽႃးမိူင်းၼၢႆး တွင်ႈထၢမ် ဢုပ်ႇၵုမ် ၼႂ်းပၢင်ၵုမ်သၽႃးၸႄႈမိူင်းတႆးဝႃႈ ၼွင်ၼမ်ႉႁူး ဢၼ်မီးၼႂ်းၸႄႈ ဝဵင်းမိူင်း ၼၢႆးၼၼ်ႉ တႃႇ 23 ဢေႊၶိူဝ်ႊ ႁႂ်ႈလႆႈပဵၼ်လိၼ်သၽႃႇဝၾိင်ႈတိုၼ်းပဵၼ်ၼမ်ႉႁူး မိူၼ်ၶိုၼ်းပၵ်းၵဝ်ႇ ပိူင်ၵဝ်ႇ ဝႃႈၼႆ။

ဝၼ်းတီႈ 14/12/2018 ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 12 ဢၼ်ၸတ်းႁဵတ်းတီႈဝဵင်းတူၼ်ႈ တီး ၸိုင်ႈတႆးပွတ်းၸၢၼ်းၼၼ်ႉ ၸၢႆးမွၼ်းလိူၼ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းမိူင်းၼၢႆး တွင်ႈထၢမ် ၼႂ်းပၢင်ၵုမ်သၽႃးၸႄႈမိူင်းတႆး ၸွင်ႇတေမီးၽႅၼ် ဢမ်ႇမီးၽႅၼ် တႃႇတေမၵ်းမၼ်ႈပၼ်ၶိုၼ်း တႃႇၼွင် ၼမ်ႉႁူး (23 ဢေႊၶိူဝ်ႊၼၼ်ႉ) လႆႈသိုပ်ႇပဵၼ်တီႈ လိၼ်သၽႃႇဝၾိင်ႈတိုၼ်းပဵၼ်ၶိုၼ်း ဝႃႈၼႆ။

ၸၢႆးမွၼ်းလိူၼ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမိူင်းၼၢႆး ပႃႇတီႇႁူဝ်သိူဝ် SNLD လၢတ်ႈတီႈ ၽူႈတွႆႇႁွၵ်ႈဝႃႈ “ မိူင်းၼၢႆးႁဝ်းၶႃႈၼႆႉ မၼ်းပဵၼ်မိူင်းၸဝ်ႈႁႆႈ ၸဝ်ႈၼႃး၊ ႁဝ်းၶႃႈ လႆႈဢိင်ပိုင်ႈ တီႈၼွင်ၼမ်ႉႁူးၵမ်ႈၼမ် ပေႃးဝႃႈ ၼမ်ႉ ႁူးႁဝ်းၵွႆၵႂႃႇ၊ ပိူင်ႈၵႂႃႇ ၼႃးၵေႃႈ တေဢမ်ႇလီ၊ ၶဝ်ႈၵေႃႈ တေဢမ်ႇလႆႈ၊ ပၢႆးမၢၵ်ႈမီးၵေႃႈ တေသုမ်း။ ၵဵဝ်ႇ လူၺ်ႈ လွင်ႈၼမ်ႉႁူး ၼႆႉ ၶႃႈႁဝ်းတၢင်ႇမႃးၼႂ်းသၽႃး 2 ပွၵ်ႈယဝ်ႉ လူင်ပွင်ၸိုင်ႈၶဝ်ၵေႃႈ ဢမ်ႇတႅပ်းတတ်းပၼ် ၸႅင်ႈ လႅင်း သေပွၵ်ႈ” ဝႃႈၼႆ။

ၵဵဝ်ႇလူၺ်ႈလွင်ႈလိၼ်ၼမ်ႉႁူးၼႆႉ ၵူၼ်းမိူင်းၼၢႆး ႁူမ်ႈၵၼ်သေ ၵၢဝ်ႇၵိၼ်ႇယွၼ်းသူး ထိုင်ၸဝ်ႈဝၢၼ်ႈ ၸဝ်ႈမိူင်းၵေႃႈ ယၢမ်ႈမီးမႃး လၢႆလၢႆပွၵ်ႈယဝ်ႉ ဝႃႈၼႆ။

ၸၢႆးမွၼ်းလိူၼ် လၢတ်ႈဝႃႈ “မိူဝ်ႈပႆႇႁိုင်သင်ၼၼ်ႉ ပိူၼ်ႈမႃးတဵင် တီႈၼွင်ၼမ်ႉႁူး ယွၼ်ႉၼၼ်သေ ၵူၼ်းမိူင်းၵေႃႈ လႆႈမီးၵူၼ်းသၢၼ်ၶတ်း တႅမ်ႈလိၵ်ႈသူင်ႇထိုင်လႄႈ ၸင်ႇလႆႈဢဝ်မႃး တွင်ႈထၢမ် ထိုင်တီႈလူင်ပွင်ၸိုင်ႈ။ မိူဝ်ႈ ပၢင်ၵုမ် ပွၵ်ႈဢွၼ်တၢင်းၵေႃႈ လႆႈတွင်ႈထၢမ်ၵမ်းၼိုင်ႈ ယဝ်ႉ၊ လူင်ပွင်ၸိုင်ႈၶဝ် ဢမ်ႇလၢတ်ႈပၼ်ၸႅင်ႈလႅင်း၊ ထိုင်ၵမ်းၼႆႉၵေႃႈ မိူၼ်ၵဝ်ႇၵူၺ်း။ ၵူၼ်းမိူင်းဢွၼ်ၵၼ်သၢၼ်ၶတ်းတိၵ်းတိၵ်း ထိုင်တီႈ ပေႃးလႆႈတိူင်ႇၵၢဝ်ႇ ၸဝ်ႈဝၢၼ်ႈၸဝ်ႈမိူင်းသေ ႁဵတ်းမႃးၵေႃႈမီး။ ယူႇတီႈတၢင်းၾၢႆႇလူင်ပွင်ၸိုင်ႈသမ်ႉ ဢွၵ်ႇဝႆႉၶေႃႈပူင်ပိုၼ်ႉတီႈ(ေဒေသန္တရာအမိန့်) ။ ၵူၺ်းၵႃႈ ၶေႃႈ ပူင်ပိုၼ်ႉတီႈဢၼ်ၼႆႉ မၼ်းဢမ်ႇႁူမ်ႇငမ်း တွၼ်ႈတႃႇၵူၼ်း မိူင်းႁဝ်းၶႃႈလႆႈသင် လႆႈဝႃႈ မၼ်းႁူမ်ႇငမ်းတႃႇၵူၼ်းဢဝ် လိၼ်ဝႆႉၵူၺ်း။ ၵူၼ်းမိူင်းတုၵ်းယွၼ်းဝႃႈ ႁႂ်ႈယႃႉ ပၼ် ၶေႃႈပူင်ပိုၼ်ႉတီႈၼၼ်ႉသေ ႁႂ်ႈမၵ်းမၼ်ႈပၼ်ၶိုၼ်း လိၼ်သ ၽႃႇဝၾိင်ႈတိုၼ်းပဵၼ်ၼမ်ႉႁူး 23 ဢေႊၶိူဝ်ႊ” ဝႃႈၼႆ။

ယွၼ်ႉဝႃႈ တီႈႁိမ်းၼမ်ႉႁူးၼႆႉ ၶွမ်ႊပၼီႊၸဝ်ႈငိုၼ်းတိုၼ်းၶဝ် ၶႂ်ႈမႃးႁႃၶုတ်းထၢၼ်ႇႁိၼ်ၼႆလႄႈ ၵူၼ်းမိူင်းၼၢႆး ႁူမ်ႈ ၵၼ် သၢၼ်ၶတ်းမႃးႁၢဝ်ႈႁႅင်း ယွၼ်ႉမၼ်းတေတုမ်ႉတိူဝ်ႉ ၼွင်ၼမ်ႉႁူး ဢၼ်ၵူၼ်းမိူင်းၼၢႆး လႆႈၸႂ်ယႂ်ႇ ပိုင်ႈဢိင် ဝႆႉၼၼ်ႉ ဝႃႈၼႆ။

ၼမ်ႉႁူးလွႆၸၢၵ်ႈၼႆႉမီးၾၢႆႇႁွင်ႇဝဵင်းမိူင်းၼၢႆး။ မီးၼႂ်းၵႄႈ ဝၢၼ်ႈယေးလႄႈ ဝၢၼ်ႈပၢင်ႇဢူႈ။ ယၢၼ်ၵႆ တင်းဝဵင်းမိူင်း ၼၢႆးမွၵ်ႈ 10 လၵ်း။

ၼမ်ႉႁူးၸၢၵ်ႈတေႃႇဢၼ်လႆလူင်းမႃးၾၢႆႇဢွၵ်ႇဝၢၼ်ႈပၢင်ႇဢူႈၼၼ်ႉ မႃးတႅၵ်ႇပဵၼ်မႄႈၼမ်ႉ 4 ၵႄး။ ၵႄးၼိုင်ႈ လႆ လတ်းၾၢႆႇဢွၵ်ႇဝၢၼ်ႈၼႃးၶၢၼ်သေ လႆလူင်းၵႂႃႇတၢင်း ဢိူင်ႇမႆႉႁႆး။ ထႅင်ႈၵႄးၼိုင်ႈ လႆ လတ်းၼႂ်းဝၢၼ်ႈၼႃးၶၢၼ်။ ထႅင်ႈၵႄးၼိုင်ႈလႆလဵပ်ႈၵႂႃႇၾၢႆႇတူၵ်းဝၢၼ်ႈၼႃးၶၢၼ်။လႆလတ်းႁိမ်းၵၢတ်ႇဝၢၼ်ႈၼႃးၶၢၼ်။ထႅင်ႈၵႄးၼိုင်ႈတႄႉ လႆ လဵပ်ႈၾၢႆႇတူၵ်းဝၢၼ်ႈပၢင်ႇဢူႈသေ လႆၶဝ်ႈၼမ်ႉတွၼ် ၊ ဢၼ်လူင်းၵႂႃႇ ၶွႆႈၼမ်ႉတဵင်း ၼႂ်းၵႄႈ လၢင်းၶိူဝ်းလႄႈဝၢၼ်ႈ ႁၢတ်ႇ။ ၼႂ်းၵႄႈၼမ်ႉသီႇၵႄးၼႆႉ ပဵၼ်ထုင်ႉလွၵ်းၼႃး တူင်ႈၼႃး ၵူၼ်းမိူင်းၼၢႆးၽုၵ်ႇ သွမ်ႈလဵင်ႉတွင်ႉမႃးပီ ယၢဝ်းၶၢဝ်း ႁိုင်။