ပွႆးလိူၼ် 12 မူၼ်း (ပွႆးပွႆႇႁူင်းၾႆးမိၼ်) တီႈတူၼ်ႈတီးၼၼ်ႉ ၸတ်းႁဵတ်းတႃႇၶၢဝ်းတၢင်း 10 ဝၼ်း ဝႃႈၼႆသေတႃႉ မီးပႃး ပၢင်တေႃႇလွင်းထႅင်ႈ ၵူၼ်းဢႅဝ်ႇလႄႇပွႆးၵေႃႉၼိုင်ႈလၢတ်ႈ။
ၵေႃၵမ်ၵၢၼ် ၸတ်းႁဵတ်းပၢင်ပွႆးလိူၼ် 12 မူၼ်းဢွၵ်ႇၶေႃႈပိုၼ်ၽၢဝ်ႇ ၵွၼ်ႇပႆႇၸတ်းႁဵတ်းပွႆးၼၼ်ႉဝႃႈ ၵဵဝ်ႇလူၺ်ႈလွင်ႈ ၵၢၼ်တေႃႇလွင်းၼၼ်ႉ တိုၼ်းဢမ်ႇပၼ်ၶႂၢင်ႉႁဵတ်း။ လွင်ႈသိုဝ်ႉၶၢႆ ၵၢၼ်ၶၢႆ လႄႈ ၶူဝ်းၼုင်ႈဝႆ ၸဵမ်ၸိူဝ်းၼႆႉတႄႉ ပၼ် ၶႂၢင်ႉသိုဝ်ႉၶၢႆယူႇ” ဝႃႈၼႆ။
ၼၢင်းဢွၼ်ႇ ၵူၼ်းဢႅဝ်ႇပွႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ႁၼ်မႅၼ်ႈယူႇၶႃႈ။ ႁဝ်းၶႃႈ ဢမ်ႇလႆႈၵႂႃႇလဵပ်ႈတူၺ်း ၸမ်ၸမ် ၵူၺ်းၵႃႈ ပဵၼ်ပၢင်လွင်းမဵဝ်းႁိုဝ်လၢႆလၢႆဢၼ်ဝႃႈၼၼ်ႉတႄႉ ဢမ်ႇႁူႉၸွမ်းလီလီ” ဝႃႈၼႆ။
ၸၢႆးၶိၼ်ႇမွင်ႇဢေး ၵူၼ်းမိူင်းတူၼ်ႈတီး လၢတ်ႈတီႈသိုဝ်ႇၶၢဝ်ႇ 7day ဝႃႈ “ ၶဝ်ဝႃႈ ဢမ်ႇပၼ်ၶႂၢင်ႉမီးပၢင်တေႃႇလွင်းၼႆ။ ပၢင်တေႃႇလွင်း မီးတင်းၵၢင်ဝၼ်း၊ ၵၢင်ၶမ်ႈ။ ၵဵဝ်ႇလူၺ်ႈလွင်ႈၼႆႉ ပႆႇႁၼ်ၽူႈမီးပုၼ်ႈၽွၼ်းၶဝ် ဢဝ် လိူင်ႈလၢဝ်းသင် ပၼ်” ဝႃႈၼႆ။
ၼႂ်းပွႆး လိူၼ် 12 မူၼ်းၼႆႉ ပၢင်တေႃႇလွင်း တေမီး မိူၼ်ၼင်ႇ မၢၵ်ႇၵိင်ႈလွႆ၊ လွင်းမၢၵ်ႇၼင်၊ ထီႇ၊ လေးၵွင်ႇၵျိၼ်ႇ (လေးကောင်ဂျင်) ဢိၵ်ႇထႅင်ႈ လၢႆလၢႆဢၼ် ဝႃႈၼႆ။
ပွႆးလိူၼ် 12 မူၼ်း တီႈတူၼ်ႈတီးၼႆႉ ၸတ်းႁဵတ်းၼႂ်းဝၼ်းတီႈ 14 ထိုင် 23 လိူၼ်ၼူဝ်ႊဝႅမ်ႊၿိူဝ်ႊ 2018 တႃႇၶၢဝ်းတၢင်း 10 ဝၼ်း ႁူင်းၾႆးမိၼ် ဢၼ်ၶႅင်ႇၵၼ် ၵၢင်ဝၼ်း ၵၢင်ၶမ်ႈသမ်ႉ တင်းမူတ်းမီး 400 ပၢႆ ဝႃႈၼႆ။