ပွႆးလိူၼ် 12 မူၼ်း ဢမ်ႇၼၼ် ပွႆးၶေႉၶႅင်ႇႁူင်းၾႆးမိၼ် ဢၼ်ၸတ်းႁဵတ်းမႃးၵူႈပီ တီႈဝဵင်းတူၼ်ႈတီး ၸိုင်ႈတႆးပွတ်း ၸၢၼ်းၼၼ်ႉ ၸွမ်းၼင်ႇၵူၼ်းမိူင်းတုၵ်းယွၼ်းသေ လူင်ပွင်ၸိုင်ႈမိူင်းတႆးပၼ်ဢၼုၺၢတ်ႈၸတ်း 10 ဝၼ်း မိူၼ်ၵူႈပီ ဝႃႈၼႆ။
ဝၼ်းတီႈ 17/10/2018 ယၢမ်းဝၢႆးဝၼ်း ၶွမ်ႊမတီႊပွင်ပဵၼ်ပၢင်ပွႆးပွႆႇႁူင်းၾႆးမိၼ် တင်း လုမ်းတူဝ်တႅၼ်းၸႄႈမိူင်းတႆး ႁူပ်ႉဢုပ်ႇဢူဝ်းငူပ်ႉငီႉၵၼ် တီႈၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း တူၵ်းလူင်းလႆႈၸႂ်ၵၼ် တေၸတ်းႁဵတ်းပွႆး လိူၼ် 12 မူၼ်း/ ပွႆးပွႆႇႁူင်းၾႆးမိၼ် တႃႇ 10 ဝၼ်း ဝႃႈၼႆ။
ၻွၵ်ႊတိူဝ်ႊမဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်းလႄႈ ၽူႈၶဝ်ႈၸုမ်းလူင်ပွင်ၸိုင်ႈမိူင်းတႆး လၢတ်ႈဝႃႈ “ ၵူၼ်း ပိုၼ်ႉတီႈတင်း မေႃႁဵတ်းႁူင်းၾႆးမိၼ်ၶဝ် တုၵ်းယွၼ်းမႃး။ လိူဝ်ၼၼ်ႉ ၸွမ်ၽွင်းလူင်မိူင်းတႆးၵေႃႈ ယွၼ်းႁႂ်ႈႁၢင်ႈႁႅၼ်း ၸတ်းႁဵတ်းပၼ်တႃႇ 10 ဝၼ်း” ဝႃႈၼႆ။
မိူဝ်ႈၵၢင်ပီၼႆႉ လူင်ပွင်ၸိုင်ႈမိူင်းတႆး ပိုၼ်ၽၢဝ်ႇဝႃႈ တႃႇလူတ်းယွၼ်ႇၵႃႈၸႂ်ႉၸၢႆႇပၢင်ပွႆးၼႆသေ ပၢင်ပွႆးလိူၼ် 12 မူၼ်း ဝဵင်းတူၼ်ႈတီးၼႆႉ တေလူတ်းဝၼ်းၼိုင်ႈ။ တေဢၢၼ်းၸတ်း 9 ဝၼ်း ၵူၺ်းၼႆလႄႈ ၵူၼ်းမိူင်းဢမ်ႇၽွမ်ႉၸွမ်း။ ၸင်ႇ လႆႈမႃးဢုပ်ႇၵုမ်တူၵ်းလူင်းၵၼ်ၶိုၼ်း။
ပွႆးလိူၼ် 12 မူၼ်း/ ပွႆးပွႆႇႁူင်းၾႆးမိၼ် ပီၼႆႉ တေၸတ်းႁဵတ်းတႃႇ 10 ဝၼ်းၶိုၼ်းမိူၼ်ၵဝ်ႇ တေတႄႇၸတ်းႁဵတ်း ဝၼ်း တီႈ 14-23/11/2018 တီႈၵၢင်ပၢင်ႇဢဝူၺ်ႇယႃႇ ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ။
မိူဝ်ႈပီ 2017 ၼၼ်ႉ ၸတ်းႁဵတ်း ၼႂ်းဝၼ်းတီႈ 26 လိူၼ်ဢွၵ်ႊထူဝ်ႊၿိူဝ်ႊ ထိုင် ဝၼ်းတီႈ 4 လိူၼ်ၼူဝ်ႊဝႅမ်ႊၿိူဝ်ႊ။ ႁူင်း ၾႆးမိၼ် ဢၼ်ၶဝ်ႈၶႅင်ႇၵၼ် တင်းမူတ်းမီး 300 လုၵ်ႈပၢႆ ႁူင်းၾႆးမိၼ်ဢၼ်တူၵ်းတိူဝ်ႉသႂ်ႇႁိူၼ်းၵူၼ်း၊ ဢၼ်မႆႈ ႁိူၼ်း၊ ဢၼ်တူၵ်းတိူဝ်ႉသႂ်ႇၵူၼ်းတူၺ်းပွႆးၵေႃႈမီးလႄႈ ပီၼႆႉလွင်ႈႁူမ်ႇလူမ်ႈၵေႃႈ တေၶဵင်ႈၶႅင်လိူဝ်ၵူႈပီ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ