ပွႆးလိူၼ် 12 မူၼ်း ဢမ်ႇၼၼ် ပွႆးပွႆႇႁူင်းၾႆးမိၼ် တီႈဝဵင်းတူၼ်ႈတီး တေၸတ်းႁဵတ်းၼႂ်းလိူၼ်ၼႆႉ တႃႇၶၢဝ်းတၢင်း 10 ဝၼ်း ဝႃႈၼႆ။
ဝၼ်းတီႈ 05/11/2018 ယူႇတီႈၽူႈမီးတၢင်းႁူႉ ၾၢႆႇႁူင်းၾႆးမိၼ်၊ ပလိၵ်ႈလႄႈ ပလိၵ်ႈၾၢႆႇၶႄၾႆး လူင်း ပိုၼ်ႉတီႈၵူတ်ႇ ထတ်း ၸွမ်းပွၵ်ႉ ၼႂ်းၸႄႈဝဵင်းတူၼ်ႈတီး ဢၼ်ႁဵတ်းႁူင်းၾႆးမိၼ် တႃႇတေၶေႉ တီႈၼႂ်းပၢင်ပွႆးလိူၼ် 12 ။ ၵူတ်ႇထတ်း ႁူင်းၾႆးမိၼ်ဢၼ်မီးၵႃႈ ၶၼ်ငိုၼ်းၼိုင်ႈ လုၵ်ႈ 50 သႅၼ်ပျႃးၶိုၼ်ႈၼိူဝ်ၼၼ်ႉသေ ပၼ်ပိုၼ်ႉႁူႉလွင်ႈၵႅတ်ႇၶႄႁႄႉၵင်ႈ ၾႆး ဝႃႈၼႆ။
ၶၢဝ်ႇ DVB ႁၢႆးငၢၼ်းဝႆႉဝႃႈ “ ၵူႈပီပူၼ်ႉမႃးၼႆႉ ႁိူၼ်းၵူၼ်းႁဵတ်းႁူင်းၾႆးမိၼ် ၾႆးၵႆႉမႆႈသေ လႆႈလူႉသုမ်း တင်းၼမ်လၢႆ။ ယွၼ်ႉၼၼ်လႄႈ ၼင်ႇႁိုဝ် တေဢမ်ႇပဵၼ်လွင်ႈၾႆးမႆႈၼၼ်ႉ လူင်းပိုၼ်ႉတီႈသေ ၵူတ်ႇထတ်းပၼ် ပိုၼ်ႉႁူႉ ႁႂ်ႈဝႆႉသတိ ဝိရိယၵၼ်လႄႈ တမ်းဝၢင်းမၢႆမီႈပၼ်ၵႂႃႇ” ဝႃႈၼႆ။
ပီၼႆႉ ႁူင်းၾႆးမိၼ် ဢၼ်တေၶဝ်ႈၶႅင်ႇၵၼ် တင်းမူတ်း မီး 410 လုၵ်ႈ။ ၼႂ်းၼၼ်ႉ ဢၼ်တေပွႆႇၵၢင်ၶိုၼ်း 123 လုၵ်ႈ၊ ဢၼ်တေပွႆႇတွၼ်ႈၵၢင်ဝၼ်းသမ်ႉ ပဵၼ်ႁၢင်ႈတူဝ်သီႇတိၼ် 89 လုၵ်ႈ၊ တူဝ်သွင်တိၼ် 157 လုၵ်ႈလႄႈ ႁုၼ်ႇႁၢင်ႈ 42 လုၵ်ႈ ၸဵမ်ၸိူဝ်းၼႆႉ။
ပွႆးပွႆႇႁူင်း ၾႆးမိၼ် တီႈဝဵင်းလူင်တူၼ်ႈတီး ပီၼႆႉ တေၸတ်းႁဵတ်း ၼႂ်းဝၼ်းတီႈ 14-23/11/2018 တီႈပၢင်ႇပွႆႇႁူင်း ၾႆးမိၼ်။