သိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း TNLA လေႃႇတိုၵ်းၵၼ် ႁၢဝ်ႈႁႅင်း တၢင်းပွတ်းထုင်ႉမိူင်းယေႃ ၸႄႈဝဵင်းလႃႈသဵဝ်ႈ ၵူၼ်းမိူင်း 100 ပၢႆ ဢွၼ်ၵၼ်ပၢႆႈဢွၵ်ႇယၢၼ်ႁိူၼ်းယေး။
မိူဝ်ႈၼႆႉ ဝၼ်းတီႈ 30/10/2018 ယၢမ်းၵၢင်ၼႂ်ၸဝ်ႉ မွၵ်ႈ 4 မူင်း သိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းၵႄႈ ဝၢၼ်ႈပၢင်ႇလေႃႉ – ဝၢၼ်ႈလွႆၸၢၼ်း ဢၼ်မီးတၢင်းၸၢၼ်းမိူင်းယေႃ 3-4 လၵ်း။ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ် တီႈၼႂ်းဢိူင်ႇမိူင်းယေႃ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵၢင်ၼႂ်ၸဝ်ႉ ႁဝ်းၶႃႈ လႆႈဢွၼ်ၵၼ်ပၢႆႈဢွၵ်ႇမႃး ငိၼ်းသဵင်ၵွင်ႈလူင်ၵေႃႈတႅၵ်ႇ။ ၵူၼ်းဝၢၼ်ႈဢၼ်ပၢႆႈဢွၵ်ႇမႃးသမ်ႉ ၵမ်ႈၼမ် ပဵၼ်ၵူၼ်း ဝၢၼ်ႈပၢင်ႇလေႃႉ ဢွၼ်ၵၼ်ပၢႆႈႁွတ်ႈၽႅဝ်တီႈၼႂ်းမိူင်းယေႃၵေႃႈမီး၊ မၢင်ၵေႃႉပၢႆႈႁွတ်ႈၽႅဝ် လႃႈသဵဝ်ႈၵေႃႈမီး” ဝႃႈၼႆ။
ပၢင်တိုၵ်းဢၼ်ပဵၼ်ထုင်ႉမိူင်းယေႃၼႆႉ မီးၾၢႆႇဢွၵ်ႇဝဵင်းလႃႈသဵဝ်ႈ ႁၢင်ႇၵႆ 30 လၵ်းပၢႆ။ ၵူၼ်းပၢႆႈၽေးသိုၵ်း ၵမ်ႈၼမ် ဢၼ်ပၢႆႈမႃးမီးၼႂ်းမိူင်းယေႃ ပဵၼ်ပီႈၼွင်ႉၸၢဝ်းတႆးလႄႈ ၸၢဝ်းလွႆ(တဢၢင်း) ဝႃႈၼႆ။
မိူဝ်ႈဝႃး ဝၼ်းတီႈ 29/10/2018 သိုၵ်းလူင်ပွင်ၸိုင်ႈမၢၼ်ႈ ၶဝ်ႈၼႂ်းပၢင်ႇလေႃႉသေ တီႉၺွပ်းပူႇၵႄႇပၢင်ႇလေႃႉ ၵႂႃႇ ၸႅတ်ႈထၢမ်လွင်ႈသိုၵ်းတဢၢင်း TNLA လႄႈ ၵူၼ်းဝၢၼ်ႈၵူၼ်းသူၼ်ဢွၼ်ၵၼ်မႆႈၸႂ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ