သိုၵ်းလူင်ပွင်ၸိုင်ႈမၢၼ်ႈ လေႃႇယိုဝ်း တပ်ႉသိုၵ်းတဢၢင်း ဢၼ်တူင်ႉၼိုင်ယူႇဝႆႉတၢင်းၸိုင်ႈတႆးပွတ်းႁွင်ႇၼၼ်ႉ သွင်ၾၢႆႇ ပဵၼ်ပၢင်တိုၵ်းၵၼ် ၼႂ်းလုၵ်ႈလိူၼ်ၵျုၼ်ႊၵူၺ်း ဢမ်ႇယွမ်း 20 ပွၵ်ႈယဝ်ႉ။

ဝၼ်းတီႈ 30/06/2019 ယၢမ်းၵၢင်ၼႂ် 9:40 မူင်းၼၼ်ႉ သိုၵ်းမၢၼ်ႈတပ်ႉမ 99 တင်း သိုၵ်းတဢၢင်း ပဵၼ်ပၢင်တိုၵ်းၵၼ်ၵမ်း ၼိုင်ႈ။ ယၢမ်းဝၢႆးဝၼ်း 1:00 မူင်း ထိုင် 1:20 မူင်းၼၼ်ႉ ပဵၼ်ၵၼ်ထႅင်ႈၵမ်းၼိုင်ႈပဵၼ် ၼႂ်းၵႄႈဝၢၼ်ႈသၢႆးၶၢဝ်လႄႈ မိူင်းပေႃႈ ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ဝႃႈၼႆ။

လိူဝ်ၼၼ်ႉ မိူဝ်ႈဝၼ်းတီႈ 28/6/2019 ယၢမ်းၵၢင်ၼႂ် 6 မူင်းပၢႆၼၼ်ႉ သိုၵ်းမၢၼ်ႈတင်း သိုၵ်းတဢၢင်းပဵၼ်ပၢင်တိုၵ်းၵၼ် တီႈမၢၼ်ႈၼိမ်းလႄႈ ယၢမ်းဝၢႆးဝၼ်း 3 မူင်းပၢႆၼၼ်ႉ ပဵၼ်ပၢင်တိုၵ်းၵၼ်တၢင်းဝၢၼ်ႈႁူဝ်ၼွင် ၸႄႈဝဵင်းၵူတ်ႉၶၢႆ ဝႃႈၼႆ။

ႁွင်ႈၵၢၼ်ၾၢႆႇပိုၼ်ၽၢဝ်ႇ သိုၵ်းတဢၢင်း ဢွၵ်ႇဝႆႉဝႃႈ “ ၼႂ်းလိူၼ်ၵျုၼ်ႊၼႆႉၵူၺ်း လႆႈပဵၼ်ပၢင်တိုၵ်းၵၼ် တင်းသိုၵ်းလူင်ပွင် ၸိုင်ႈမၢၼ်ႈ ဢမ်ႇယွမ်း 20 ပွၵ်ႈယဝ်ႉ။ ယွၼ်ႉသိုၵ်းမၢၼ်ႈၽိုတ်ႉၶဝ်ႈၸူးၼႂ်းၼႃႈတီႈသိုၵ်းတဢၢင်းတူင်ႉၼိုင်ယူႇဝႆႉၼၼ်ႉ” ဝႃႈၼႆ။

သိုၵ်းမၢၼ်ႈတင်း သိုၵ်းတဢၢင်းၼႆႉ ၵႆႉပဵၼ်ပၢင်တိုၵ်းၵၼ် ၼႂ်းၸႄႈဝဵင်းၵူတ်ႉၶၢႆ၊ မၢၼ်ႈတူင်ႈ၊ ၼမ်ႉ သၼ်ႇ၊ ၼမ်ႉၶမ်း ၼႂ်း ၸိုင်ႈတႆးပွတ်းႁွင်ႇ။

လိူဝ်ၼၼ်ႉ မိူဝ်ႈဝႃး ဝၼ်းတီႈ 30/06/2019 ၼၼ်ႉ ယူႇတီႈတပ်ႉသိုၵ်းမၢၼ်ႈ(တပ်ႉမတေႃႇ) ပိုၼ်ၽၢဝ်ႇသိုပ်ႇၵိုတ်းတိုၵ်းထႅင်ႈ တႃႇၶၢဝ်းတၢင်း 2 လိူၼ် တႄႇဢဝ် လိူၼ်ၵျုႊလၢႆႊ တေႃႇထိုင် လိူၼ်ဢေႃႊၵတ်ႊသ်သဵင်ႈ ဝႃႈၼႆ။