လုၵ်ႈႁဵၼ်းသၶတႆး ၸၼ်ႉၸွမ် Assumption University – ABAC ႁူမ်ႈၵၼ်ၸတ်းႁဵတ်းပၢင်ဢုပ်ႇၶႆႈ ၵဵဝ်ႇၵပ်း ၵၢၼ်ႁဵၼ်းထမ်း၊ ႁူဝ်ၶေႃႈဢုပ်ႇၶႆႈ “ ၵၢၼ်ႁဵၼ်းထမ်း ၽႅဝ်တီႈတၢင်းၽႄ” မီးလုၵ်ႈႁဵၼ်းသင်ၶ ၶဝ်ႈႁူမ်ႈတင်းၼမ်။
ဝၼ်းတီႈ 28/10/2018 ယၢမ်းဝၢႆးဝၼ်း 1:30 မူင်း ထိုင် 3:30 မူင်း လုၵ်ႈႁဵၼ်းသင်ၶၸဝ်ႈ ၸၼ်ႉၸွမ် ဢသ်ႉသမ်း သျိၼ်း (Assumption University – ABAC) ဢွၼ်ႁူဝ်ၸတ်းႁဵတ်းပၢင်ဢုပ်ႇၶႆႈ “ၵၢၼ်ႁဵၼ်းထမ်း ၽႅဝ်တီႈတၢင်း ၽႄ” မီးၸဝ်ႈတူၼ်ၶူးၽူႈလူင်ႉလႅၼ်ႇ ၸၢဝ်းတႆး လၢႆလၢႆၸဝ်ႈမႃးၶဝ်ႈႁူမ်ႈဢုပ်ႇၶႆႈ ပၼ်တၢင်းႁူႉ၊ ၼႂ်းၼၼ်ႉ ၸဝ်ႈ တူၼ်ၶူး Dr. ၼေႃႇၶမ်းလႃႉ ထမ်ႇမသႃမိ ၵေႃႈမႃးဢုပ်ႇၶႆႈ။ မီးသင်ၶလႄႈ ပီႈၼွင်ႉတႆး ႁွတ်ႈမိူင်းၵွၵ်ႇ ၶဝ်ႈႁူမ်ႈထွမ်ႇ ငိၼ်း။
ၸဝ်ႈၶူး ၶမ်းလႅင်း ၶေႇမိၼ်ႇတ ၽူႈၶပ်းၶိုင်ပွင်ပဵၼ်ပၢင်ဢုပ်ႇၶႆႈ လၢတ်ႈတီႈၽူႈတွႆႇႁွၵ်ႈဝႃႈ “ ႁူဝ်ၶေႃႈပၢင်တၢၼ်ႈၶႆႈ ဢၼ်မီးၸိုဝ်ႈဝႃႈ “ၵၢၼ်ႁဵၼ်းထမ်း ၽႅဝ်တီႈတၢင်းၽႄ” ၼၼ်ႉ ၸတ်းႁဵတ်းယိူင်းၸူးယွင်ႈၵုင်ႇ ၸဝ်ႈၶူး ပႃႇမွၵ်ႉၶႃႉ တွၵ်ႊတိူဝ်ႊ ၼေႃႇၶမ်းလႃႉ ထမ်ႇမသႃမိ ဢၼ်လႆႈႁပ်ႉသူး The Golden Stupa Award ဢၼ်လူင် ပွင်ၸိုင်ႈ ထႆးလႄႈ မူႇၸုမ်းၾၢႆႇပၢႆးပုတ်ႉထ သႃႇသၼႃႇမိူင်းၵူဝ်းရီးယိူဝ်းႁူမ်ႈၵၼ် မွပ်ႈပၼ်ၼၼ်ႉ” ဝႃႈၼႆ။
တီႈဝဵင်းမိူင်းၵွၵ်ႇ ၵုင်းထဵပ်ႈ ငဝ်ႈဝဵင်းလူင်ၸိုင်ႈထႆးၼႆႉ မီးၸၼ်ႉၸွမ်ၸိုဝ်ႈယႂ်ႇလၢႆလၢႆလင်။ ၼႂ်းၼၼ်ႉ ၸၼ်ႉၸွမ် ဢသ်ႉသမ်းသျိၼ်း ၵေႃႈၶဝ်ႈပႃးလင်ၼိုင်ႈ။ မီးလုၵ်ႈႁဵၼ်းတႆး သင်ၶတႆး လုၵ်ႈႁဵၼ်းၸၼ်ႉၸွမ်ၶဝ်ႈႁဵၼ်းတင်းၼမ်။
