လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ လႆႈႁပ်ႉၸုမ်ႈၶူး ဢၼ်ႁဵၼ်းယဝ်ႉၵႂႃႇ ၸၼ်ႉ Ph.D၊ M.A လႄႈ B.A သင်ၶၸဝ်ႈ 39 တူၼ်လႄႈ ၵူၼ်းႁိူၼ်း 5 ၵေႃႉ ႁူမ်ႈၵၼ် 44 တူၼ်/ ၵေႃႉ။

ၼႂ်းဝၼ်းတီႈ 25-26/05/2019 ယူႇတီႈၸၼ်ႉၸွမ်မႁႃၸုလႃးလူင်းၵွၼ်း ဝင်းၼွႆႉ ဢယုတ်ႉထယႃး မွပ်ႈယိုၼ်ႈပၼ် ၸုမ်ႈၶူး လုၵ်ႈႁဵၼ်းၸၼ်ႉၸွမ် ၸိူဝ်းႁဵၼ်းယဝ်ႉၵႂႃႇ။ ၼႂ်းၼၼ်ႉ ပႃးလုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ တင်း မူတ်း 44 တူၼ်/ ၵေႃႉ။ ဢွင်ႈတီႈပၢင်မွပ်ႈယိုၼ်ႈၸုမ်ႈၶူးၼၼ်ႉ ၸတ်းႁဵတ်းတီႈ ၼႂ်းဝၢင်းၸၼ်ႉၸွမ် မႁႃၸုလႃးလူင်း ၵွၼ်း ဝင်းၼွႆႉ ဢယုတ်ႉထယႃး ၸိုင်ႈထႆး။

ၸဝ်ႈၶူး ဢိတ်ႉသရိယ ႁူဝ်ပဝ်ႈ လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ လုၵ်ႈႁဵၼ်း ၸဵမ်သင်ၶၸဝ်ႈလႄႈ ၵူၼ်းႁိူၼ်း တင်းမူတ်း 44 တူၼ်/ ၵေႃႉ။ ဢၼ်လႆႈႁပ်ႉၸုမ်ႉၶူး B.A သမ်ႉ 37 တူၼ်/ ၵေႃႉ၊ ၸၼ်ႉ M.A သမ်ႉ 6 တူၼ်လႄႈ ၸၼ်ႉPh.D သမ်ႉ 1 တူၼ်။ တင်းမူတ်း လုၵ်ႈႁဵၼ်းၶဝ် လႆႈႁပ်ႉ 2 ဝၼ်း ယွၼ်ႉဝႃႈ လုၵ်ႈႁဵၼ်း ၼမ်ၼႆလႄႈ ၸိူဝ်းဢၼ်လႆႈႁပ်ႉမိူဝ်ႈဝၼ်းတီႈ 25 ၵေႃႈမီး။ ဝၼ်းတီႈ 26 ၵေႃႈမီး” ဝႃႈၼႆ။

သိုပ်ႇလၢတ်ႈဝႃႈ “ ၼႂ်းဝၼ်းတီႈ 26 တွၼ်ႈယၢမ်းၵၢင်ၼႂ်တႄႉ ႁဝ်းၸဝ်ႈၶဝ် ယုၵ်ႉယွင်ႈ Dr. ၼေႃႇလႅင်း တေႇၸၺႃႇၼ ဢၼ်ယဝ်ႉ Ph.D ၼၼ်ႉ။ ယဝ်ႉၵေႃႈ ယၢမ်းဝၢႆးဝၼ်းသမ်ႉ မွၵ်ႇထိုင် သင်ၶၸဝ်ႈႁဝ်းၶဝ် ဢၼ်လုၵ်ႉတီႈမိူင်းတႆးမႃး မႃးမွၵ်ႇ ဢုပ်ႇၶႆႈၼႄ တၢင်းႁူႉ တၢင်းႁၼ် ပၼ်ႁႅင်းလုၵ်ႈႁဵၼ်းလႄႈ ပီႈၼွင်ႉႁႅင်းၵၢၼ်ယၢၼ်မိူင်း။ သိုပ်ႇသေၼၼ်ႉတႄႉ ယွင်ႈၵုင်ႇ ယေႃးမုၼ် Dr. ၸဝ်ႈၶူးတိုၼ်းတႆး ဝိသုတ်ထိၺႃၼ၊ မႄႈဢွၵ်ႇၼၢင်းသူၺ်ႇမုင်ႇ လႄႈ မႄႈဢွၵ်ႇ ၼၢင်းမွၵ်ႇလၢဝ်သႅင် ဢၼ် လႆႈႁပ်ႉၸုမ်ႈၶူး တီႈၸၼ်ႉ ၸွမ်မႁႃၸုလႃး ဝင်းၼွႆႉ ဢယုတ်ႉထယႃး ၸိုင်ႈထႆး မွပ်ႈပၼ်ၼၼ်ႉ” ဝႃႈၼႆ။

ၼႂ်းပၢင်ႁပ်ႉၸုမ်ႈၶူး တီႈၸၼ်ႉၸွမ် မႁႃၸုလႃးလူင်းၵွၼ်း ဝင်းၼွႆႉ ဢယုတ်ႉထယႃး ၸိုင်ႈထႆးၼႆႉ မီးပီႈၼွင်ႉတႆး/ ႁႅင်း ၵၢၼ်တႆး တီႈၸမ်ၵႆ ၶဝ်ႈႁူမ်ႈပၼ်ႁႅင်း ဢမ်ႇယွမ်း 600 ၵေႃႉ။

တေႃႈလဵဝ် သဵၼ်ႈသၢႆမၢႆလုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ ၼႂ်းပီ 2019 ၼႆႉ ဢၼ်တိုၵ်ႉၶိုၼ်ႈႁဵၼ်းဝႆႉ တင်းမူတ်း မီး 175 တူၼ်/ ၵေႃႉ ႁဵၼ်းဝႆႉ ပႃးၸၼ်ႉ B.A M.A လႄႈ Ph.D ၸိူဝ်းၼႆႉ။