ၾူၼ်တူၵ်းထပ်းၵၼ်လၢႆဝၼ်း ႁဵတ်းႁႂ်ႈၼမ်ႉတဵင်းၼွင်းလူၼ်ႉၾင်ႇ လႆၶဝ်ႈထူမ်ႈသူၼ်ၶဝ်ႈၵၢပ်ႇ၊ ၼႃးလႄႈ ႁိူၼ်းၵူၼ်းဝၢၼ်ႈဢၼ်ယူႇႁိမ်းၸမ်ၾင်ႇၼမ်ႉတဵင်း။
ဝၼ်းတီႈ 10/10/2018 ယၢမ်းၵၢင်ၼႂ် ၼမ်ႉတဵင်းၵိုင်ႉၵၢင်ႉၼွင်းထူမ်ႈႁိူၼ်းၵူၼ်းယေးၵူၼ်းဝၢၼ်ႈလၢႆဝၢၼ်ႈ ဢၼ်ယူႇၸွမ်း ၾင်ႇၼမ်ႉတဵင်း ဝဵင်းလၢင်းၶိူဝ်း မိူၼ်ၼင်ႇ ဝၢၼ်ႈၼႂ်းၵူတ်ႉ၊ ဝၢၼ်ႈၼမ်ႉဢုၼ်ႇ ၊ ဝၢၼ်ႈတႃႈ၊ ဝၢၼ်ႈပၢင်သၼွင်း၊ ဝၢၼ်ႈမၢၵ်ႇပိၼ်း၊ ဝၢၼ်ႈလူင်ပွၵ်ႉဢွၵ်ႇ – ပွၵ်ႉၵၢတ်ႇ ၸိူဝ်းၼႆႉ။
ဢေးယိင်း ၵူၼ်းဝၢၼ်ႈၼမ်ႉဢုၼ်ႇ လၢင်းၶိူဝ်းလၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၾူၼ်တူၵ်းလၢႆ ဝၼ်းယဝ်ႉၶႃႈ။ ယွၼ်ႉၼၼ်လႄႈ မိူဝ်ႈၼႆႉၵၢင်ၼႂ်ၼမ်ႉတဵင်းၶိုၼ်ႈႁႅင်း ၵူၼ်းၸိူဝ်းဢၼ်ယူႇတီႈၶူင်ႈႁိမ်းၾင်ႇၼမ်ႉၵေႃႈ ဢွၼ်ၵၼ်တေႃႉၶူဝ်းၶဝ်ႈ ယူႇဝႆႉတီႈႁိူၼ်းပီႈၼွင်ႉဢၼ်ယူႇတီႈသုင်ၼၼ်ႉ ” ဝႃႈၼႆ။
တီႈဝတ်ႉၵျွင်းၵမ်ႇမထၢၼ်းၵေႃႈ ၵူဝ်ၼမ်ႉၶိုၼ်ႈထူမ်ႈထိုင်ၵျွင်းယေႃးၵီႇ ၵူၼ်းမိူင်းဢွၼ်ၵၼ်မႆႈ ၸႂ်သေပၵ်းတႃပႂ်ႉတူၺ်းယူႇ။
ပူၼ်ႉမႃးမိူဝ်ႈပီ 2004 ၼၼ်ႉၵေႃႈ တီႈဝဵင်းလၢင်းၶိူဝ်းၼမ်ႉတဵင်းထူမ်ႈႁၢဝ်ႈႁႅင်းယဝ်ႉၵမ်းၼိုင်ႈ ႁိူၼ်းယေးသူၼ်ၼႃးၵူၼ်းဝၢၼ်ႈလူႉၵွႆၼမ်၊ မီးၵူၼ်းတၢႆ 2 ၵေႃႉ။
ပီၼႆႉၵေႃႈၼမ်ႉတဵင်းၼွင်းထူမ်ႈလႆႈဝႃႈႁၢဝ်ႈႁႅင်းလိူဝ်တၢင်ႇပီပူၼ်ႉမႃး။ ပေႃးၾူၼ်သိုပ်ႇတူၵ်းထႅင်ႈ ၶိုၼ်းၼႆႉတႄႉ ၵူဝ်ၼမ်ႉ ၶိုၼ်ႈႁႅင်းပဵင်းပီ2004 ၼၼ်ႉၵူၺ်းယဝ်ႉ – ဝႃႈၼႆ။ ၼႂ်းဝူင်ႈဝၢင်ႈၼႆႉ ၾူၼ်တူၵ်း ထပ်းၵၼ်လၢႆဝၼ်းတူဝ်ႈမိူင်းတႆး လၢႆလၢႆ ဝဵင်း မိူၼ်ၼင်ႇ ထုင်ႉပူင်း၊ လၢႆးၶႃႈ၊ၵေးသီး၊ လၢင်းၶိူဝ်း၊ မိူင်းပၼ်ႇဢိၵ်ႇလၢႆလၢႆဝဵင်း ၸိူဝ်းၼႆႉ။
