ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် တီႉလႆႈယႃႈမဝ်းၵမ် ၶၼ်ငိုၼ်း 300 သႅၼ်ပျႃးပၢႆ ၼႂ်းဝဵင်းပုင်ႇပႃႇၶႅမ် ဝႃႈၼႆ။
ဝၼ်းတီႈ 07/10/2018 ၶွမ်ႊမတီႊၾၢႆႇၽဵဝ်ႈမူၺ်ႉယႃႈမဝ်းၵမ် ဢွၵ်ႇၶေႃႈပိုၼ်ၽၢဝ်ႇဝႃႈ ယူႇတီႈပလိၵ်ႈၾၢႆႇၽဵဝ်ႈမူၺ်ႉ ယႃႈမဝ်းၵမ် မိူင်းသၢတ်ႇ လူင်းပိုၼ်ႉတီႈ ၶဝ်ႈၵူတ်ႇထတ်းၼႂ်းႁိူၼ်းၵူၼ်းဝၢၼ်ႈလင်ၼိုင်ႈ တီႈပွၵ်ႉ 4 ၼႃးၵွင်းမူး ၵိင်ႇၸႄႈ ဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ။ တီႉလႆႈယႃႈမႃႉ 25,800 မဵတ်ႉ (မႅၼ်ႈငိုၼ်း 258 သႅၼ်ပျႃး)၊ ယႃႈၾိၼ်ႇၽိူၵ်ႇ 340 ၵရမ်ႊ(မႅၼ်ႈငိုၼ်း 54.4 သႅၼ်ပျႃး)။ လိူဝ်ၼၼ် တီႉလႆႈ ပႃးရူတ်ႉၶိူင်ႈထႅင်ႈလမ်းၼိုင်ႈ ဝႃႈၼႆ။
ၼႂ်းဝၼ်းလဵဝ်ၵၼ်ၵူၺ်း ယၢမ်းႁူဝ်ၶမ်ႈ မွၵ်ႈ 5 မူင်း ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် မူႇၸေႊ တီႉလႆႈယႃႈမဝ်းၵမ် တီႈဝၢၼ်ႈၶူဝ်လူင် သဵၼ်ႈတၢင်း ၵူတ်ႉၶၢႆ – ၵွင်းၶႃး ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ တီႉလႆႈယႃႈမဝ်းၵမ် ၶၼ်ငိုၼ်း မွၵ်ႈ 78 သႅၼ်ပျႃး ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်း ပလိၵ်ႈၶဝ် လႆႈၵုမ်းၶင်တူဝ်ၵူၼ်းလၵ်ႉလွမ်တေႃႉသူင်ႇ သိုဝ်ႉၶၢႆယႃႈ မဝ်းၵမ်ၼႆႉသေ ပိုတ်ႇဢမူႉ/ၶၻီႊ ဢဝ်လိူင်ႈလၢဝ်းၵႂႃႇ ၸွမ်းၼင်ႇပၵ်းပိူင်မၢႆမီႈ ဝၢၼ်ႈမိူင်းမီးဝႆႉၼၼ်ႉ ဝႃႈၼႆ။
ဝၼ်းတီႈ 08/10/2018 သမ်ႉ ပလိၵ်ႈလၢဝ်းတီႉလႆႈယႃႈမႃႉ ယႃႈမဝ်းၵမ် တီႈၾင်ႇလၢဝ်း ဢၼ်တေႃႇၼႃႈသၢမ်ၸဵင်ႇ ၶမ်း ယၢၼ်ၵႆသၢမ်ၸဵင်ႇၶမ်း 17 ၵီႇလူဝ်ႊမီႊတိူဝ်ႊ။ လႆႈမီးလွင်ႈပိုတ်းယိုဝ်းၵၼ် ၸူဝ်ႈၵႅပ်ႉသေ ပလိၵ်ႈလၢဝ်းတီႉ လႆႈ ယႃႈမႃႉ 4 လၢၼ်ႉမဵတ်ႉ၊ ဢၼ်တိုၵ်ႉဢဝ်လူင်းႁိူဝ်းသေ ၶိုၼ်ႈၾင်ႇလၢဝ်း ဢၢၼ်းတၢင်ႇရူတ်ႉၵႃးသေ ဢဝ်ၶဝ်ႈ လၢဝ်းလႄႈ ၶဝ်ႈထႆး ဝႃႈၼႆ။
ပလိၵ်ႈလၢဝ်းလႄႈ ထႆး လၢမ်းၶၢတ်ႈဝႃႈ ၵူၼ်းၸုမ်းၶဝ်တေမီးဢမ်ႇယွမ်း 8 ၵေႃႉ ၼႆသေ ၶွင်ႊသီႊႁူမ်ႇလူမ်ႈၸိုင်ႈထႆး ပိုၼ်ၽၢဝ်ႇဝႃႈ ပဵၼ်ယႃႈမႃႉယႃႈမဝ်းၵမ် ဢၼ်လုၵ်ႉတၢင်းမိူင်းဝႃႉ မႃး ၶၢဝ်ႇထႆး Manager Online ပိုၼ်ၽၢဝ်ႇဝႆႉ ၼင်ႇ ၼႆ။
