တပ်ႉသိုၵ်းလူင်ပွင်ၸိုင်ႈပိုၼ်ၽၢဝ်ႇဝႃႈ တီႉလႆႈထႅင်ႈ ၶိူင်ႈတူမ်ႈႁုင်ယႃႈလႄႈ ယႃႈမဝ်းၵမ်ထႅင်ႈ တႃႇၶၼ်ငိုၼ်း 113,000 လၢၼ်ႉပျႃး။
ဝၼ်းတီႈ 9/3/2020 ယၢမ်းၵၢင်ၼႂ် 8 မူင်းပၢႆၼၼ်ႉ ယူႇတီႈႁွင်ႈၵၢၼ်ပိုၼ်ၽၢဝ်ႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ် ၽၢဝ်ႇဝႃႈ ၶဝ်ႈၵူတ်ႇထတ်းတီႉလႆႈ ယႃႈမႃႉတင်း ယႃႈၽွင်ၶၢဝ် တႃႇၶၼ်ငိုၼ်း 113,000 လၢၼ်ႉ တီႈၼႂ်းႁိူၼ်း ဢူးၶျၢၼ်း ပွမ် တီႈႁိမ်းဝၢၼ်ႈလွႆၶမ်း ၸႄႈဝဵင်းၵူတ်ႉၶၢႆ ၸိုင်ႈတႆး ပွတ်းႁွင်ႇ။
ၼႂ်းဝၼ်းၼၼ်ႉၵူၺ်း ယၢမ်းဝၢႆးဝၼ်း 1 မူင်းၼၼ်ႉ တီႉလႆႈထႅင်ႈ ၼႂ်းႁိူၼ်းဢူးလဵဝ်ပႃႉ ယႃႈၾိၼ်ႇၽိူၵ်ႇ၊ ယႃႈမႃႉလႄႈ ၶိူင်ႈတူမ်ႈႁုင်ယႃႈမဝ်းၵမ်ထႅင်ႈ တႃႇၵႃႈၶၼ်ငိုၼ်း 69 သႅၼ်ပျႃး ဝႃႈၼႆ။
ဢၼ်ၵူတ်ႇထတ်းတီႉလႆႈယႃႈမႃႉ ယႃႈမဝ်းၵမ် 2 ႁိူၼ်းၼႆႉ ဢမ်ႇတီႉလႆႈပႃးၸဝ်ႈႁိူၼ်း ဝႃႈၼႆ။
ၼႂ်းၸႄႈဝဵင်းၵူတ်ႉၶၢႆၼႆႉ ယူႇတီႈတပ်ႉသိုၵ်းၾၢႆႇႁူမ်ႇလူမ်ႈ လူင်းပိုၼ်ႉတီႈသွၵ်ႈတဝ် တီႉလႆႈယႃႈမဝ်းၵမ် တႄႇဢဝ် ဝၼ်းတီႈ 28/2/2020 ထိုင်မႃး ဝၼ်းတီႈ 9/3/2020 ၼႆႉ တီႉလႆႈယႃႈမဝ်းၵမ်တႃႇ ၶၼ်ငိုၼ်းတင်းမူတ်း 244 လၢၼ်ႉ သႅၼ်ပျႃးပၢႆ ၵူၺ်းၵႃႈဢမ်ႇမီးၸဝ်ႈၶွင်သေပွၵ်ႈ သေၵမ်းဝႃႈၼႆ။
ၸၢႆးပႃႉ ၵူၼ်းၵူတ်ႉၶၢႆ ဢႃယု 40 ပၢႆ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်ဢၼ်လီဢၢမ်း ထၢင်ႇထိူမ်ဝႆႉယူႇ ပေႃးပဵၼ်ၵူၼ်း ၵႃႉၶၢႆ ဢိတ်းဢွတ်းသမ်ႉ တီႉလႆႈယူႇတႃႇသေႇ။ ပေႃးတီႉလႆႈတႃႇႁူဝ်သႅၼ်ႁူဝ်လၢၼ်ႉပျႃးသမ်ႉ ဢမ်ႇတီႉလႆႈ ၸဝ်ႈၶွင် မၼ်းသေပွၵ်ႈ ဝႃႈၸဝ်ႈၶွင်မၼ်းပၢႆႈလွတ်ႈတႃႇသေႇ။ ဢမ်ႇၼၼ် ႁူႉယူႇလႄႈ ဢမ်ႇတီႉႁႃႉ။ ဢမ်ႇၼၼ်ၵေႃႈ ယွၼ်ႉဢမ်ႇမီးၵူၼ်းသေ တင်ႈၸႂ်ဢဝ်ဢွၵ်ႇမႃးၼႄႁႃႉ”ဝႃႈၼႆ။
ဝၢၼ်ႈၵွင်းၶႃးလႄႈ ဝၢၼ်ႈလွႆၶမ်း ၼႂ်းၸႄႈဝဵင်းၵူတ်ႉၶၢႆၼႆႉ ၵမ်ႈၼမ်ပဵၼ်ၸၢဝ်းၶႄႇယူႇသဝ်း။ ၵမ်ႈၼမ် ႁဵတ်းယႃႈမဝ်း ၵမ် ၵူၼ်းၵူတ်ႉၶၢႆလၢတ်ႈ။
ၸၢႆးပႃႉ လၢတ်ႈဝႃႈ “ ၵူတ်ႉၶၢႆၼႆႉ ယႃႈမဝ်းၵမ် လိူင်ႇၼႃႇ တိုၼ်းတေတီႉလႆႈထႅင်ႈယူႇၵူၺ်း ပိူင်လူင်မၼ်းတႄႉ လူဝ်ႇတီႉ လႆႈ ၸဝ်ႈၶွင်မၼ်းၶႃႈဢေႃႈ” ဝႃႈၼႆ။
ၾၢႆႇတပ်ႉသိုၵ်းလူင်ပွင်ၸိုင်ႈပိုၼ်ၽၢဝ်ႇဝႆႉဝႃႈ ၵဵဝ်ႇလူၺ်ႈၸဝ်ႈၶွင်ယႃႈမဝ်းၵမ်ၸိူဝ်းၼၼ်ႉ တေသိုပ်ႇၶတ်းၸႂ်သွၵ်ႈႁႃ တူဝ်ၸဝ်ႈၶွင်မၼ်း မႃးပၼ်တူတ်ႈတၢမ်ႇၸွမ်းၼင်ႇ ပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ