ၾၢႆႇပၢႆးယူႇလီမိူင်းထႆးၾၢင်ႉ ၵူၼ်းၸၢင်ႈၸပ်းတၢင်းပဵၼ်တီႈ မႃ ၊ မႅဝ်း

ၾၢႆႇပၢႆးယူႇလီမိူင်းထႆးၾၢင်ႉ ၵူၼ်းဝၢၼ်ႈၵူၼ်းမိူင်း ၸိူဝ်းလဵင်ႉမႅဝ်း၊ မႃလႄႈ သတ်းမီးၶူၼ်ၸိူဝ်းၼႆႉ ႁႂ်ႈၾၢင်ႉဝႆႉ ယွၼ်ႉၸၢင်ႈ ၸပ်းတၢင်းပဵၼ်ႁၢဝ်ႈႁႅင်းတီႈသတ်းၸိူဝ်းၼႆႉလႆႈ။

ဝၼ်းတီႈ 26/09/2018 သိုဝ်ႇၶၢဝ်ႇၵဵင်းမႆႇ ပိုၼ်ၽၢဝ်ႇဝႃႈ – ႁွင်ႈၵၢၼ်ၾၢႆႇပၢႆးယူႇလီမိူင်းထႆး ပိုၼ်ၽၢဝ်ႇၾၢင်ႉထိုင်ၵူၼ်းၸိူဝ်း လဵင်ႉမႃ၊ မႅဝ်း ႁွပ်ႇမႃ၊ မႅဝ်းၸိူဝ်းၼႆႉ ယွၼ်ႉၸၢင်ႈၸပ်းတၢင်းပဵၼ်တီႈ တူဝ်သတ်းၸိူဝ်းၼႆႉလႆႈ ဝႃႈၼႆ။

မႅဝ်းမၢင်တူဝ်မီးႁွႆးၸဵပ်းဝႆႉၸွမ်းတူဝ် ဢၼ်မီးၸိူဝ်ႉမႅင်း Microsporum canis ။ ၸိူဝ်ႉမႅင်းၼႆႉ ၸၢင်ႈတိတ်းၸပ်းၸူးၵူၼ်းလႆႈ လူၺ်ႈတီႈဢမ်ႇတၼ်းႁူႉတူဝ်။ လိူဝ်ၼၼ်ႉ သတ်းလဵင်ႉတၢင်ႇၸိူဝ်း မိူၼ်ၼင်ႇ မႅဝ်း၊ မႃ၊ ပၢင်တၢႆးလႄႈ တူဝ်သတ်းဢၼ်မီးၶူၼ်ၸိူဝ်းၼႆႉတၵ်းလႆႈ ၾၢင်ႉသေဝႄႈၵႆၵႆဝႃႈၼႆ။

ၾၢႆႇပၢႆးယူႇလီလၢတ်ႈဝႃႈ – “ ၵူၼ်းလဵင်ႉမႅဝ်းလႄႈသင် ၊ လုၵ်ႈဢွၼ်ႇၸိူဝ်းၼႆႉ ဢမ်ႇထုၵ်ႇလီပၼ်ဢုမ်ႈမႅဝ်း၊ လဵၼ်ႈမႅဝ်းၼႃႇ ယွၼ်ႉဝႃႈဢမ်ႇဝႃႈၶူၼ်ၶဝ်၊ ၽိဝ်ၼင်ၶဝ်ၸိူဝ်းၼႆႉ ၸၢင်ႈဢဝ်တၢင်းပဵၼ်မႃးၸူးၵူၼ်းလႆႈ လူၺ်ႈတီႈဢမ်ႇႁူႉတူဝ်“ ဝႃႈၼႆ။

တၢင်းပဵၼ်ၼႆႉပေႃးပဵၼ်ယဝ်ႉ တေမီးၾၢင်ႁၢင်ႈတုမ်ႇၶူမ်းပဵၼ်ဝူင်းဝူင်း ၊ ၶူမ်းၸွမ်းၶႅၼ်၊ ၶႃ၊ၼႃႈၸိူဝ်းၼႆႉ ပေႃးပဵၼ်ႁႅင်း     လူဝ်ႇ ၼႅတ်ႈၵႂႃႇႁႃမေႃဝႆးဝႆးၼႆယဝ်ႉ။

သင်ဝႃႈၶႂ်ႈလဵင်ႉမႃလဵင်ႉမႅဝ်းၼႆ ထုၵ်ႇလီၵႆႉၵႆႉလုမ်းလႃးဢဝ်ၸႂ်သႂ်ႇ ဢၢပ်ႇၼမ်ႉပၼ်တႃႇသေ ႁႂ်ႈတူဝ်သတ်းဢၼ်ႁဝ်းလဵင်ႉ ၼၼ်ႉ မူတ်းမူတ်းသႂ်သႂ်ယူႇတႃႇသေႇ ႁဵတ်းၼၼ်ၸင်ႇ တေဢမ်ႇၸၢင်ႈပဵၼ်တၢင်းပဵၼ်ၼႆယဝ်ႉ။