ၼွင်ႉၽူၺ်းလိုၼ်း ဢႃယု 12 ၶူပ်ႇ ယူႇၸႄႈဝဵင်းသီႇပေႃႉ ၸပ်းတၢင်းပဵၼ်ပၢင်ႈၵီႈ (ပုမ်ယႂ်ႇ) ၸဵပ်းၵႅၼ်း လိူဝ်ၸႂ်ႁႅင်းသေ လူႉသဵင်ႈ ၵၢင်ၼႂ် ဝၼ်းတီႈ 18/06/2026 ၼႆ ၵူၼ်းႁူမ်ႈႁိူၼ်းၼွင်ႉၽူၺ်းလိုၼ်းလၢတ်ႈ ။
ၼွင်ႉၽူၺ်းလိုၼ်းၼႆႉ ၶၢင်းႁူဝ်ၶႆႈႁူဝ်ၸီး ၵၢင်ၶမ်ႈ ဝၼ်းတီႈ 17/06/2026 ၼၼ်ႉသေ မိူင်းလႅင်းၵၢင်ၼႂ် ဝၼ်းတီႈ 18 ၼၼ်ႉ ငၢႆးမိူၼ် ၵူၼ်းသဵင်ႈသၢႆၸႂ်ၵႂႃႇ။ ထိုင်တီႈ ၵူၼ်းတီႁိူၼ်း ယိုၼ်ယၼ်ဝႃႈ လူႉသဵင်ႈ။ တိုၵ်ႉႁၢင်ႈႁႅၼ်း တႃႇပူၼ်ႉၶၢပ်ႈတူဝ်ယူႇ သမ်ႉၶိုၼ်းတိုၼ်ႇတူင်ႉမႃးၶိုၼ်း ဝႃႈၼႆ။
ၼႃႉၼွင်ႉၽူၺ်းလိုၼ်း လၢတ်ႈတီႈၽူႈတွႆႇႁွၵ်ႈဝႃႈ – “ တေႃႇထိုင်ဝၼ်းတီႈ 19 ၵၢင်ဝၼ်းယဝ်ႉ ၸင်ႇၶိုၼ်းႁူႉတူဝ်မႃးဢေႃႈ ။ ပေႃးတေႁၢင်ႈႁႅၼ်း သေ တေၵႂႃႇပူၼ်ႉၶၢပ်ႈတူဝ်ယဝ်ႉ ပေႃးႁႅၼ်းၶူဝ်းမၼ်းယဝ်ႉ ၊ ႁွႆးဝႃႈ မၼ်းတၢႆလိုမ်းၵူၺ်း ။ ၵူၺ်းၵႃႈ ပႆႇတၼ်းလႆႈပူၵ်ႉလႆႈႁေႃႇတီႈတူဝ်မၼ်းၼင်ႇၵဝ်ႇ ။ ၽိူဝ်ႇဝႃႈ မၼ်းႁူႉတူဝ်မႃးၵေႃႈ ၶူဝ်းမၼ်းၸိူဝ်းၼႆႉ တႄႉ ဢဝ်ၵႂႃႇပႅတ်ႈသေယဝ်ႉဢေႃႈ ဝႆႉဝႃႈ လွႆးၶေႃႉလွႆႈၵျူဝ်ႇ ” – ဝႃႈၼႆ ။
ၼွင်ႉၽူၺ်းလိုၼ်း ပဵၼ်လုၵ်ႈယိင်း လုင်းပႃႉ ပႃႈၶိၼ်ႇဢေး ယူႇဝၢၼ်ႈၵွၵ်ႇတႅင် ဢိူင်ႇၼွင်ၵေႃႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ။ မၼ်းၼၢင်း ၸပ်းတၢင်းပဵၼ် ပၢင်ႈၵီႈၼႆႉမႃး ၸဵမ်မိူဝ်ႈ ဢႃယု တိုၵ်ႉမီး 6 ၶူပ်ႇ ထိုင်ဢႃယု 12 ၶူပ်ႇယဝ်ႉသေတႃႉ ပႆႇၸိုၼ်ႈၶႅၼ်း ။ ၵမ်းလိုၼ်း ထိုင်တီႈ ၵူၼ်းႁူမ်ႈႁိူၼ်း ထၢင်ႇဝႃႈ လူႉသဵင်ႈ ။
ၵွၼ်ႇၼႃႈၼႆႉ ၼွင်ႉၽူၺ်းလိုၼ်း ၶၢင်းႁူဝ်ၶႆႈ ၊ ၶၢင်းတွင်ႉၸဵပ်းၵႅၼ်းသေတႃႉ ဢမ်ႇထိုင်တီႈ ဢမ်ႇတွင်းသင်လႆႈ ။ဝၢႆးသေ တၢႆလိုမ်းသေ လုၵ်ႉတိုၼ်ႇမႃးၶိုၼ်းၼႆႉ ထၢမ်သင်ၵေႃႈ ဢမ်ႇတွင်း ၊ မိူဝ်ႈလဵဝ် ႁူႉတူဝ်မႃးလႆႈ ၸမ်ဝူင်ႈယဝ်ႉသေတႃႉ ဢမ်ႇႁူႉၸၵ်းၽႂ် ဢမ်ႇတွင်းၽႂ် ၵူၼ်းႁူမ်ႈႁိူၼ်းမၼ်းၼၢင်း ယင်းဢမ်ႇတွင်းသေၵေႃႉ ၼႆယူႇ။
ၸၢႆးၵျေႃႇလူႇ ပီႈဢၢႆႈၼွင်ႉၽူၺ်းလိုၼ်းၵေႃႈ လၢတ်ႈဝႃႈ – “ ၶႃႈၵေႃႈ တေၸူမ်းႁႃႉ တေလႆႈႁွင်ႉႁႆႈႁႃႉ ပေႃးဢမ်ႇႁူႉယဝ်ႉၶႃႈ ။ ႁူႉဝႃႈ တၢႆယဝ်ႉၼႆသေတႃႉ သမ်ႉၶိုၼ်းပဵၼ်တူဝ်မႃး ။ ပဵၼ်တူဝ်မႃးယဝ်ႉသေတႃႉ သမ်ႉဢမ်ႇတွင်းၽႂ်လႆႈ ။ ယၢပ်ႇၸႂ်ၵျႃႉၶႃႈယဝ်ႉ ၽႂ်ယိုၼ်းထိုင်လႆႈ ၵေႃႈ ၸွႆႈထႅမ်ၼွင်ႉၶႃႈၽွင်ႈ ” ဝႃႈၼႆ။
ၼွင်ႉၽူၺ်းလိုၼ်းၼႆႉ တင်ႈတႄႇမိူဝ်ႈ ၸပ်းတၢင်းပဵၼ်ပုမ်ၵႂ်ႈပုမ်ယႂ်ႇၼႆႉမႃးသေ ႁႅင်းလိူတ်ႇဢေႇ ၼႃႈလိူင် ၊ လႆႈထႅင်ႈလိူတ်ႈၵူႈလိူၼ် ယႃၵေႃႈ လႆႈၵိၼ်ပၼ်ၵူႈဝၼ်း ။ သင်ၽႂ်လႆႈႁူႉလႆႈငိၼ်းၸွမ်းယဝ်ႉ ႁႂ်ႈၵပ်းသိုပ်ႇတိတ်းတေႃႇၸွႆႈထႅမ်ပၼ်သေၵမ်း ၼႆ ပီၼွင်ႉၸမ်ၸႂ်ထႅင်ႈၵေႃႉၼိုင်ႈလၢတ်ႈၼင်ႇၼႆ။
ပီႈဢၢႆႈ ၼွင်ႉၽူၺ်းလိုၼ်း သိုပ်ႇလၢတ်ႈဝႃႈ – “ ပွတ်းတၢင်းႁိူၼ်းၵေႃႈ လႅင်းၾူၼ်းလႅင်းၼဵတ်ႇဢမ်ႇလႆႈလီ ၊ ဢမ်ႇၸၢင်ႈႁူႉလႆႈ ငဝ်းလၢႆးတီႈႁိူၼ်းၶိုတ်းတၼ်း ။ သူင်ႇသဵင်ၵေႃႈ ဢမ်ႇၸၢင်ႈထွမ်ႇ ။ သူင်ႇလိၵ်ႈၵေႃႈ ၼၢၼ်းလႆႈ ။ ၶမ်ၸႂ်တေႉၶႃႈယဝ်ႉ ။ မၢင်ပွၵ်ႈ ပေႃးၶႂ်ႈႁွင်ႉႁႆႈၶႃႈယဝ်ႉ ၵပ်းသိုပ်ႇၵၼ်ယၢပ်ႇၼႃႇ ” – ဝႃႈၼႆ။
တႃႇတေၸွႆႈထႅမ်လႆႈ ၼွင်ႉၽူၺ်းလိုၼ်းၼႆႉ ၵပ်းသိုပ်ႇတွင်ႈထၢမ်ႁူဝ်ယွႆႈမၼ်းလႆႈတီႈ ၼၢင်းမူၺ် ၵေႃႉပဵၼ် ၼႃႉၼွင်ႉၽူၺ်းလိုၼ်း မၢႆၾူၼ်း 096 713 543 64 လႄႈ ၸၢႆးၵျေႃႇလူႇ ၵေႃႉပဵၼ်ပီႈဢၢႆႈ မၢႆၾူၼ်းထႆး 080 763 4744 လႆႈၵမ်းသိုဝ်ႈ။
ၵွၼ်ႇၼႃႈ ပၢင်ယၼ်ႇသိုၵ်း 1027 ၼၼ်ႉတႄႉ မုင်ႉႁေႃႁိူၼ်းမၼ်းၼၢင်း ယၢမ်ႈဢဝ်ၵႂႃႇယူတ်းယႃတီႈ ႁူင်းယႃလူင်လႃႈသဵဝ်ႈ။ ဝၢႆးသေ ၸႄႈဝဵင်းလႃႈဝဵင်းလႃႈသဵဝ်ႈ မီးပၢင်တိုၵ်းသိုၵ်းသိူဝ်ႁၢဝ်ႈႁႅင်းယဝ်ႉ ႁူင်းယႃၸိူဝ်းၼၼ်ႉၵေႃႈ ဢမ်ႇပၼ်ႇၵၢၼ်လႆႈ ၊ သဵၼ်ႈတႃႈသၢႆတၢင်းၵေႃႈ ဢမ်ႇထၢင်ႇႁၢင်ႈၵႂႃႇမႃး မိူၼ်ၵူႈပွၵ်ႈလႄႈ ၸင်ႇၶၢတ်ႇၶၵ်ႉတွၼ်ႈမၼ်းၵႂႃႇ ၼႆယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ