မိူဝ်ႈဝၼ်းတီႈ 22/6/2026 ႁွင်ႈၵၢၼ်ၽွင်းလူင်ၾၢႆႇႁႅင်းထၢတ်ႈ မိူင်းၵႃႊတႃႊ ႁၢႆးငၢၼ်းဝႃႈ – ဝၢႆးဢီႊရၼ် ပိုတ်ႇပၢင်တိုၵ်းၼၼ်ႉ ႁူင်းၸၢၵ်ႈၵႂၼ်းထၢတ်ႈ (LNG) မိူင်းၵႃႊတႃႊ လႆႈၵိုတ်း ၵၢၼ်ဝႆႉ တႄႇလိူၼ်မၢတ်ႉၶျ်သေ ၸင်ႇလႆႈပၼ်ႇၵၢၼ်မႃးၶိုၼ်း ဝႃႈၼႆ။
ယွၼ်ႉႁူင်းၸၢၵ်ႈၵႂၼ်းထၢတ်ႈ ရႅတ်ႉသ်လႃႊၾၼ်ႊ (LNG) တႅၵ်ႇၾူင်ႉၵႂႃႇ မိူဝ်ႈဝၼ်းတီႈ 21/6/2026 ၼၼ်ႉသေ ၵူၼ်းလူႉတၢႆၵႂႃႇ 13 ၵေႃႉ မၢတ်ႇၸဵပ်းၵႂႃႇ 66 ၵေႃႉ။ ၵူၼ်းၸိူဝ်းလူႉတၢႆၵႂႃႇၼၼ်ႉ ပဵၼ်ၵူၼ်းမိူင်းၸိူဝ်းလုၵ်ႉတၢင်းမိူင်းဢိၼ်ႊတီႊယိူဝ်ႊ လႄႈ ပႃႊၵိတ်ႊသ်တၼ်ႊၼႆ ၽူႈၸတ်းၵၢၼ်လူင် Qatar Energy တွပ်ႇလၢတ်ႈတီႈသိုဝ်ႇၶၢဝ်ႇ ဝႆႉၼင်ႇၼႆ။
လွင်ႈၼႆႉပဵၼ်ၽေးၵိုင်ႉၵၢင်ႉၵူၺ်း ဢမ်ႇၸႂ်ႈလွင်ႈတိုၵ်း တေႃးႁဵတ်းၶဵၼ်တေႃႇၵၼ်ၼႆသေတႃႉ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈၶဝ်တႄႉ ဢွၼ်ၵၼ်တိုၼ်ႇသၢၼ်ႈတူၵ်းၸႂ်ၵႂႃႇႁၢဝ်ႈႁႅင်း ဝႃႈၼႆ။
တႄႇဢဝ်လိူၼ်တီႊသႅမ်ႊပိူဝ်ႊ ပီ 2025 မႃး ယွၼ်ႉမီးလွင်ႈလူဝ်ႇမႄးလုမ်းလႃးၶိုၼ်းၼႆသေ ႁူင်းၸၢၵ်ႈ လႆႈၵိုတ်းလိုဝ်ႈလွင်ႈႁဵတ်းၵၢၼ်ဝႆႉ၊ တိုၵ်ႉတႄႇပၼ်ႇၵၢၼ်ၶိုၼ်း ၼႂ်းသွင်ဝၼ်းပူၼ်ႉ မႃးၼႆႉ။ ယွၼ်ႉၽေးၵိုင်ႉၵၢင်ႉၼႆႉသေ ဢမ်ႇမီးၽေးတေႃႇႁိမ်းႁွမ်းလႄႈ ဢမ်ႇတုမ်ႉတိူဝ်ႉလွင်ႈသူင်ႇ ၵႂၼ်းထၢတ်ႈဢွၵ်ႇၶၢႆ ၼႆယဝ်ႉ။
မိူင်းၵႃႊတႃႊၼႆႉ ပၼ်ၶႂၢင်ႉဢမေႊရိၵၼ်ႊပၵ်းတပ်ႉပၢင်သဝ်းယႂ်ႇလူင်ဢၼ်ၼိုင်ႈဝႆႉ ၼႂ်းမိူင်းၶဝ်သေ ၾၢႆႇၼိုင်ႈၵေႃႈ ၼႂ်းပၢင်တိုၵ်းဢမေႊရိၵၼ်ႊ – ဢီႊရၼ်ႊၼႆႉ မိူင်းၵႃႊတႃႊ လႆႈၺႃး ဢီႊရၼ်ႊဢဝ် မၢၵ်ႇၼူၾႆး တင်း တရူၼ်ႊပွႆႇမၢၵ်ႇတိုၵ်းတေႃးသႂ်ႇလၢႆလၢႆၵမ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ