ၽွင်းမိၼ်းဢွင်ႇလၢႆႇ ဢွၵ်ႇၶၢဝ်းတၢင်း ၵႂႃႇမိူင်းၶႄႇ ႁူပ်ႉထူပ်းၸွမ်း သျီႊၸျိၼ်ႉၽိင်ႊ ၸွမ်ၸိုင်ႈ မိူင်းၶႄႇယဝ်ႉၼၼ်ႉ မၼ်းႁပ်ႉတွပ်ႇ ၶေႃႈထၢမ်တွပ်ႇတီႈ ႁွင်ႈၵၢၼ်သိုဝ်ႇ Phonix မိူင်း ၶႄႇဝႃႈ -လွင်ႈၸတ်းၵၢၼ် ၸွမ်းလႅၼ်လိၼ်ၼႆႉ ပဵၼ်ပုၼ်ႈၽွၼ်းလူင်ပွင်ၸိုင်ႈၵူၺ်း ဢမ်ႇၵဵဝ်ႇတင်းၸုမ်းလႂ် ဝႃႈၼႆ။

ၼႂ်းၶေႃႈထၢမ် ၵဵဝ်ႇလူၺ်ႈ လွင်ႈၸတ်းပွင် ၵၢၼ်မၢၵ်ႈမီး လႄႈ ၽူႈမၢၵ်ႈမီး ၸဝ်ႈႁူင်းၵၢၼ်ၶႄႇၸိူဝ်းတေၶဝ်ႈမိူဝ်းလူင်းတိုၼ်း ၼႂ်းမိူင်းမၢၼ်ႈ တင်း ၵၢၼ်ၸတ်းပွင်ၼႃႈၵၢၼ် ၸွမ်းလႅၼ်လိၼ် မီးပိူင်ၸိူင်ႉႁိုဝ်ဝႆႉ – ၼႆၼၼ်ႉ မိၼ်းဢွင်ႇလၢႆႇတွပ်ႇလၢတ်ႈဝႃႈ – “ယၢမ်းလဵဝ် ၸွမ်းလႅၼ်လိၼ်ၼႆႉ ဢမ်ႇပေႃးမီးလွင်ႈၼိမ်တဵင်ႈလႄႈ လွင်ႈၼႆႉ လူင်ပွင်ၸိုင်ႈတင်း သွင်ၾၢႆႇ သွင်မိူင်း တေလႆႈႁူမ်ႈၵၼ်ႁဵတ်းသၢင်ႈ ၵႄႈလိတ်ႈပၼ်ႁႃၵႂႃႇ ပဵၼ်တၢင်းၵၢၼ်” ဝႃႈၼႆ။

မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း မိူင်းႁူမ်ႈတုမ် လၢတ်ႈၵႂႃႇဝႃႈ “ၵဵဝ်ႇလူၺ်ႈၵၢၼ်ၵႃႉၶၢႆ ၸွမ်းလႅၼ်လိၼ် Cross Border Trade တင်းသွင်မိူင်းၼႆႉ လူင်ပွင်ၸိုင်ႈ ၵူၺ်း မီးသုၼ်ႇ ၸတ်းပွင်လႆႈ။ တၢင်ႇၸုမ်းဢမ်ႇမီးသုၼ်ႇၶဝ်ႈမႃးၵဵဝ်ႇၶွင်ႈ။ ၼင်ႇႁိုဝ် လူင်ပွင်ၸိုင်ႈ တေမီးသုၼ်ႇၸတ်းၵၢၼ်လႆႈ တဵမ်တဵမ်ၼၼ်ႉၵေႃႈ တေၶတ်းၸႂ်ႁဵတ်းသၢင်ႈၵႂႃႇယူႇ။ ပၼ်ႁႃဢၼ် ႁဝ်းၶႃႈႁူပ်ႉယူႇ ပဵၼ်ယူႇယၢမ်းလဵဝ်ၼႆႉ ပဵၼ်လွင်ႈၸၢဝ်းၶိူဝ်းၵူၺ်း။ ၵွပ်ႈၼၼ် တေႁဵတ်းသၢင်ႈၵႂႃႇ ႁႂ်ႈငၢမ်ႇမႅၼ်ႈတင်း မူႇပိူင်ဢၼ်တမ်းဝၢင်းဝႆႉၼၼ်ႉယူႇ ” ဝႃႈၼႆ။

ၵဵဝ်ႇလူၺ်ႈ လွင်ႈၸဝ်ႈၵၢၼ်ပၢႆးမၢၵ်ႈမီးၶႄႇ ၶဝ်ႈမႃးလူင်းတိုၼ်းၼႂ်းမိူင်းႁူမ်ႈတုမ်ၼၼ်ႉတႄႉ မိၼ်းဢွင်ႇလၢႆႇ ၶတ်းၸႂ်ႁဵတ်းသၢင်ႈပၼ်ၵူႈလွင်ႈ ႁႂ်ႈမီးလွင်ႈႁူမ်ႇလူမ်ႈယူႇ။ ယၢမ်းလဵဝ် ပဵၼ် ၽွင်းၵၢၼ်မိူင်းလႅၵ်ႈလၢႆႈလႄႈ ပၼ်ႁႃၵူႈလွင်ႈၼႆႉ တေဢဝ်ၵႄႈလိတ်ႈၵႂႃႇ ၼႂ်းလုမ်းသၽႃး ႁႂ်ႈပဵၼ်တၢင်းၵၢၼ် – ဝႃႈၼႆ။

လိူဝ်ၼၼ်ႉ ၸွမ်းလႅၼ်လိၼ် မိူင်းႁူမ်ႈတုမ် မိူင်းမၢၼ်ႈၼႆႉ ႁူပ်ႉပၼ်ႁႃ ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊယူႇလႄႈ လွင်ႈၼႆႉၵေႃႈ တေႁူမ်ႈတင်း လူင်ပွင်ၸိုင်ႈမိူင်းၶႄႇသေ ၵႂၢတ်ႇလၢင်ႉၽဵဝ်ႈမူၺ်ႉၵႂႃႇ ႁႂ်ႈထိုင်တီႈထိုင်တၢင်း။ တေပၼ်တၢမ်ႇ ၵူၼ်းၸိူဝ်းႁဵတ်းၽိတ်းပူၼ်ႉပႅၼ်ၼၼ်ႉသေ ႁႂ်ႈလၢပ်ႇသေ ၼင်ႇႁိုဝ် တေဢမ်ႇမီးၽူႈလႂ် ႁတ်းႁဵတ်းၵၢၼ် ၵျႃႊၽျႅၼ်ႉ ၼႂ်းမိူင်းၼၼ်ႉၵေႃႈ တင်းသွင်မိူင်း တေလႆႈႁူမ်ႈမိုဝ်းၵၼ် ၸတ်းၵၢၼ်ၵႂႃႇတင်းသွင်ၾၢႆႇ – ၼႆယဝ်ႉ။

ဝၢႆးလင်မိၼ်းဢွင်ႇလၢႆႇ ၼမ်းၼႃႈသေယိုတ်းဢဝ်ဢႃႇၼႃႇၸိုင်ႈမိူင်း ၽွင်းတိုၵ်ႉပဵၼ်ၸၼ်ႉၸွမ်ၸိၵ်းသိုၵ်းမၢၼ်ႈယူႇၼၼ်ႉ သိုၵ်းမၢၼ်ႈသုမ်းသိုၵ်း မိူဝ်ႈပၢင်တိုၵ်းၽႅၼ်ၵၢၼ်ယၼ်ႇ သိုၵ်း 1027 သေ လႆႈဢဝ်ႁႅင်းၵူၼ်းၶဝ်ထွႆဢွၵ်ႇပၼ် ၸွမ်းၸႄႈဝဵင်းသႅၼ်ဝီ၊ ၸႄႈဝဵင်းလႃႈသဵဝ်ႈ၊ ၸႄႈဝဵင်းၵူတ်ႉၶၢႆ၊ ၸႄႈဝဵင်းမူႇၸေႊ (ၾၢႆႇၼွၵ်ႈဝဵင်း) ၊ ၸႄႈဝဵင်းၵုၼ်လူင်၊ ၸႄႈ ဝဵင်း ႁူဝ်ပၢင်ႇ ၊ ၸႄႈဝဵင်းၶျိင်ႊသူၺ်ႇႁေႃႇ (ဝဵင်းၼမ်ႉၽႃႈ) ၊ ၸႄႈဝဵင်းၼမ်ႉၶမ်း ၸိူဝ်းယူႇတိတ်းၸပ်း လႅၼ်လိၼ် မိူင်းၶႄႇသေ ၼိူဝ်သဵၼ်ႈတၢင်း ၵၢၼ်တေႃႉသူင်ႇ ၶူဝ်းၵုၼ်ႇ မိူင်းမၢၼ်ႈ- မိူင်းၶႄႇ ၸဵမ်ၸိူဝ်းၼႆႉ။