ဝၼ်းတီႈ 27/05/2026 ၾၢႆႇၽွင်းငမ်း လႅၼ်လိၼ် 2 ၸိုင်ႈမိူင်း ၸႄႈဝဵင်းဝဵင်းႁႅင် ၸႄႈတွၼ်ႈၵဵင်းမႂ်ႇ လႄႈ ၸႄႈဝဵင်းမိူင်းတူၼ် မိူင်းတႆးပွတ်းဢွၵ်ႇ ၸတ်းႁဵတ်းပၢင်ၶၢႆၶူဝ်းလႅၼ်လိၼ်ႁူမ်ႈၵၼ် တႃႇသၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ်။
ၸတ်းႁဵတ်းတီႈ လၢၼ်ႇလႅၼ်လိၼ် တီႈတိၼ်လွႆ ဝတ်ႉၾႃႉဝဵင်းဢိၼ်း ဝၢၼ်ႈလၵ်းတႅင်ႇ ဢိူင်ႇပဵင်းလူင် ဝဵင်းႁႅင် ၸႄႈတွၼ်ႈၵဵင်းမႂ်။
ၵူၼ်းပိုၼ်ႉတီႈတႄႉၵႂႃႇႁၢင်ႈႁႅၼ်းႁဵတ်းသုမ်ႉႁဵတ်းသွင်း ႁဵတ်းၶဵင်ႇႁပ်ႉတွၼ်ႈဝႆႉၸဵမ်ၶမ်ႈဝႃး ။
ၵူၼ်းဝၢၼ်ႈတၢင်းမိူင်းတႆးတႄႉ ဝၼ်းတီႈ 27/05/2026 ယၢမ်းၵၢင်ၼ်ႂမွၵ်ႈ 10 မူင်းၼႆႉၸင်ႇဢဝ်ၶူဝ်းၶၢႆသေႁွတ်ႈထိုင်ၵႂႃႇ။
ပၢင်ၶၢႆၶူဝ်း ၵၢတ်ႇၼတ်ႉ งานเชื่อมความสัมพันธ์สองแผ่นดิน ไทย-เมียนมาร์ ณ บ้านหลักแต่ง ၼႆႉ ၾၢႆႇတၢင်း လူင်ပွင်ၸိုင်ႈပိုၼ်ႉတီႈ ၸတ်းၶိုၼ်ႈမႃးၵူႈပီ ၼိုင်ႈပီၼိုင်ႈပွၵ်ႈ။ မၢင်ပီၵေႃႈ ၾၢႆႇတၢင်းမိူင်းထႆး ႁၢင်ႈႁႅၼ်းဝႆႉသေ ၵူၼ်းပိုၼ်ႉတီႈ ၾၢႆႇတၢင်းမိူင်းတႆး ဢမ်ႇၸၢင်ႈမႃးၶၢႆၶူဝ်း။ ယွၼ်ႉဝႃႈ သိုၵ်းမၢၼ်ႈတီႈလႅၼ်လိၼ် ဢမ်ႇပၼ်ဢၼုယၢတ်ႈမႃး ၸိူဝ်းၼႆႉၵေႃႈမီး။
ပီၼႆႉတႄႉ မီးပီႈၼွင်ႉ တၢင်းမိူင်းၵျွတ်ႈ မိူင်းတေႃႉ မိူင်းထႃး ၼႃးၵွင်းမူး ပုင်ႇပႃႇၶႅမ် တၢင်းမိူင်းတႆး ဢဝ်ၶူဝ်းၶွင်ၵိၼ်ယမ်ႉ တၢင်းမိူင်းတႆး မႃးၶၢႆ – မိူၼ်ၼင်ႇ ၶဝ်ႈမုၼ်းၶဝ်ႈပွင်း ၼေႃႇ မႅင်း ၼိူဝ်ႉ – ၽၵ်းယိူဝ်ႈၼၢင်းၶဵဝ် ၸိူဝ်းၼႆႉ မႃးၶၢႆ ။
ပီႈၼွင်ႉတၢင်းၾင်ႇမိူင်းထႆးသမ်ႉ မီးၶဝ်ႈမုၼ်းၶဝ်ႈပွင်း ဢၼ်ႁဵတ်းႁင်းၵူၺ်း၊ မၢၵ်ႇၶဝ်ႈတဝ်ႈၼမ်ႉ ဢၼ်ဢွၵ်ႇတၢင်းမိူင်းထႆး ၶူဝ်းၶွင်ၵိၼ်ယမ်ႉလႄႈၶူဝ်းၸႂ်ႉသွႆ ဢၼ်မိူင်းထႆးႁဵတ်းဢွၵ်ႇၸိူဝ်းၼၼ်ႉ မႃးၶၢႆ – လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ