ၵူၼ်းႁိူၼ်းၵူၼ်းယေးၼၢင်းမူဝ်ႁွမ် ဢွၼ်ၵၼ်ၼႄၵၢင်ၸႂ် ၵၢင်ဝဵင်းၼမ်ႉၶမ်း တုၵ်းယွၼ်းႁႂ်ႈ ၸုမ်းသိုၵ်း တဢၢင်း TNLA ပွႆႇပၼ်တူဝ်ၼၢင်းမူဝ်ႁွမ်ဝႆးဝႆး။

ဝၼ်းတီႈ 07/09/2018 ၵူၼ်းႁိူၼ်းၵူၼ်းယေး ၼၢင်းမူဝ်ႁွမ် ဢွၵ်ႇၼႄၵၢင်ၸႂ် တီႈပၢင်ပၢင်ႇပွႆး ၵၢင်ဝဵင်းၼမ်ႉၶမ်း မီးၵူၼ်းဝၢၼ်ႈၵူၼ်းမိူင်းၼႂ်းဝဵင်းၼမ်ႉၶမ်း 1,200 ပၢႆ မႃးပႂ်ႉပၼ်ႁႅင်းၸႂ်။ မီးၸုမ်းၶွတ်ႇလိူတ်ႈ ၽွမ်ႉႁူမ်ႈ UP၊ ၸုမ်းၵူၼ်းၼုမ်ႇၼႂ်းပႃႇတီႇသိူဝ်ၽိူၵ်ႇ၊ ၸုမ်းၶႄၾႆးလႄႈ ပလိၵ်ႈလူင်ပွင်ၸိုင်ႈမၢၼ်ႈ ၸိူဝ်းၼႆႉမႃးဢဝ်ႁူမ်ႇလူမ်ႈပၼ်။

ၼၢင်းမူဝ်ၶမ်း ပီႈၼၢင်း ၼၢင်းမူဝ်ႁွမ်လၢတ်ႈဝႃႈ – “ ၼွင်ႉယိင်းႁဝ်းၶႃႈၼႆႉ ဢမ်ႇမီးတၢင်းၽိတ်းသင် ဢၼ်မၼ်းၼၢင်းၺႃးတီႉၵႂႃႇၼႆႉၵေႃႈမီး 20 ဝၼ်းပၢႆယဝ်ႉ ႁဝ်းၶႃႈမႆႈၸႂ်ပၢႆးယူႇလီမၼ်းၶႃႈဢေႃႈ ၾၢႆႇၼိုင်ႈၵေႃႈ လုၵ်ႈလၢင်းမၼ်းၵေႃႈတိုၵ်ႉလဵၵ်ႉ ၵွပ်ႈၼၼ်လႄႈ တုၵ်းယွၼ်းႁႂ်ႈပွႆႇ ပၼ်တူဝ် မၼ်းၼၢင်းဝႆးဝႆးသေၵမ်း ” ဝႃႈၼႆ။

ၼၢင်းမူဝ်ႁွမ်ၼႆႉ ထုၵ်ႇတပ်ႉသိုၵ်းတဢၢင်း TNLA တီႉၺွပ်းတူဝ်ၵႂႃႇ မိူဝ်ႈဝၼ်းတီႈ 17 လိူၼ်ဢေႃႊၵတ်ႊသ်ယၢမ်းၵၢင်ၼႂ် 8:30 မူင်း တေႃႇထိုင်ယၢမ်းလဵဝ်။ ပေႃႈမႄႈလုၵ်ႈလၢင်းၵူၼ်းႁိူၼ်းမၼ်းၼၢင်းၶတ်းၸႂ် တႃႇတေႁူပ်ႉထူပ်းဢုပ်ႇဢူဝ်းမၼ်းၼၢင်းၼၼ်ႉ သိုၵ်းတဢၢင်းဢမ်ႇပၼ်ထူပ်း ဝႃႈၼႆ။

မိူဝ်ႈၽွင်းသိုၵ်းတဢၢင်း ၶဝ်တီႉဢဝ် ၼၢင်းမူဝ်ႁွမ်ၵႂႃႇၼၼ်ႉ မၼ်းၼၢင်းတိုၵ်ႉလဵင်ႉၶဝ်ႈ လုၵ်ႈဢွၼ်ႇမၼ်းယူႇသမ်ႉပဵၼ်တၢင်း ၾၢႆႇ ၼႃႈလုၵ်ႈဢွၼ်ႇလႄႈ မႆႈၸႂ်ပႃးပၢႆးၸႂ်လုၵ်ႈဢွၼ်ႇ။ လုၵ်ႈဢွၼ်ႇတႄႉ မုင်ႈမွင်းၵေႃႉပဵၼ်မႄႈတေ ပွၵ်ႈမႃးၶိုၼ်းႁွင်ႉႁွင်ႉ ႁႆႈႁႆႈယူႇၵူႈဝၼ်း” ဝႃႈၼႆ။

ယူႇတီႈတပ်ႉသိုၵ်းတဢၢင်း TNLA ဢွၵ်ႇၶေႃႈပိုၼ်ၽၢဝ်ႇဝႃႈ တေတႅပ်းတတ်း တြႃးၼၢင်းမူဝ်ႁွမ်ၾၢႆႇၼႃႈ ၸိူဝ်ႉၶိူဝ်းပီႈၼွင်ႉမၼ်းၼၢင်းလႄႈ ၾၢႆႇၼႃႈၵူၼ်းတင်းၼမ် လူၺ်ႈတၢင်းၽိတ်းမၢႆမီႈ 333 ၶွင်လူင်ပွင်ၸိုင်ႈဢၼ်ဝႃႈၵိတ်ႇၶႂၢင်ၵၢၼ်ၵူၼ်းႁဵတ်း ၵၢၼ်လူင်ပွင်ၸိုင်ႈ ဝႃႈၼႆ။

ၼၢင်းမူဝ်ႁွမ်ၼႆႉ မီးလုၵ်ႈဢွၼ်ႇလဵၵ်ႉ 3 ၵေႃႉ၊ ပဵၼ်ၵူၼ်းႁႃၵိၼ်လဵင်ႉတွင်ႉသိုဝ်ႈယူဝ်း မိူဝ်ႈပီ2016 သိုၵ်း TNLA မႃးၵဵပ်း   ငိုၼ်းၵႂႃႇ 3 သႅၼ်၊ ပီ 2017 မႃးၵဵပ်းငိုၼ်းၵႂႃႇထႅင်ႈ 11 သႅၼ်။ ၽွင်းမႃးၵဵပ်းငိုၼ်းၵမ်း လိုၼ်း ၼၼ်ႉသိုၵ်းလွႆ TNLA သွင် ၵေႃႉၼၼ်ႉၺႃးသိုၵ်းမၢၼ်ႈ မူၵ်းယိုဝ်းၸွမ်းတၢင်းတၢႆၵေႃႉ ၼိုင်ႈတီႉလႆႈ တူဝ်လိပ်းၵႂႃႇၵေႃႉၼိုင်ႈ။ လွင်ႈၼႆႉၾၢႆႇတဢၢင်း ၸီႉၼႄးဝႃႈပဵၼ်ၼၢင်းမူဝ်ႁွမ်ပွင်ႇၶၢဝ်ႇ ၵပ်းၾူၼ်းလၢတ်ႈဝၼ်းၼၼ်ႉၵမ်းလဵဝ်။ ၽွင်းၼၼ်ႉၼၢင်းမူဝ်ႁွမ်ယင်းတွပ်ႇလၢတ်ႈဝႃႈသိုၵ်းလွႆဝႃႈယွၼ်ႉငိုၼ်း 11သႅၼ်သေႁဝ်းဢဝ်သၢႆၸႂ်လႅၵ်ႈသေပွင်ႇၶၢဝ်ႇလေႃႇ – ဝႃႈၼႆ။