သိုၵ်းတဢၢင်း TNLA တီႉၺွပ်းၵူၼ်းမိူင်းၼမ်ႉၶမ်းၵႂႃႇ တေႃႇထိုင်ယၢမ်းလဵဝ် ႁိုင် 20 ဝၼ်းယဝ်ႉ ပႆႇပွႆႇတူဝ် ၶိုၼ်းလႄႈ ယူႇတီႈၸိူဝ်ႉၶိူဝ်းပီႈၼွင်ႉမၼ်းၼၢင်း ဢိၵ်ႇၸုမ်းတူင်ႇဝူင်းၵူၼ်း တေၼႄၵၢင်ၸႂ်တုၵ်းယွၼ်းၵႂႃႇ ဝႃႈၼႆ။
ဝၼ်းတီႈ 02/09/2018 ယူႇတီႈၸိူဝ်ႉၶိူဝ်းပီႈၼွင်ႉ ၼၢင်းမူဝ်ႁွမ် တင်း ၸုမ်းတူင်ႉၼိုင်တူင်ႇဝူင်းၵူၼ်း ၼႂ်းၸႄႈဝဵင်း ၼမ်ႉၶမ်း လႆႈႁူမ်ႈၵၼ်သေ လူင်းလၢႆးမိုဝ်း တႅမ်ႈလိၵ်ႈယွၼ်းတၢင်းၸွႆႈထႅမ်ထိုင် ၸွမ်ၸိုင်ႈမိူင်းႁူမ်ႈတုမ် ဢူးဝိၼ်း မိၼ်ႉ၊ တီႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသူႉၵျီႇ၊ ၽူႈၵွၼ်းသိုၵ်းသုင်သုတ်း မိၼ်းဢွင်ႇလၢႆႇ၊ သင်ၶၸဝ်ႈ တဢၢင်းလႄႈ ၾၢႆႇၶွမ်ႊမတီႊ ဢုပ်ႇဢူဝ်းၵၢၼ်မိူင်း ၸုမ်းဢူၺ်းလီပွတ်းႁွင်ႇ FPNCC ၸဵမ်ၸိူဝ်းၼႆႉ တုၵ်းယွၼ်း ႁႂ်ႈပွႆႇပၼ်တူဝ်ၼၢင်းမူဝ်ႁွမ်ၶိုၼ်းဝႆးဝႆးသေဢမ်ႇၵႃး ၼႂ်းဝၼ်းတီႈ 7/9/2018 ၼႆႉၵေႃႈ တေဢွၵ်ႇၼႄၵၢင်ၸႂ်တုၵ်း ယွၼ်းထႅင်ႈ ဝႃႈၼႆ။
ပီႈၼၢင်း ၼၢင်းမူဝ်ႁွမ် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ယွၼ်းတၢင်းၸွႆႈထႅမ် ႁႂ်ႈပွႆႇပၼ်တူဝ်ၼွင်ႉယိင်းၶႃႈႁဝ်း။ ႁဝ်းၶႃႈ တၢင်ႇလိၵ်ႈထိုင်တင်းမူတ်းၶႃႈ။ ႁဝ်းၶႃႈ မႆႈၸႂ်မၼ်းၼၢင်းၶႃႈ။ ၶႂ်ႈႁႂ်ႈပွႆႇပၼ်ၽႂ်းၽႂ်းၶႃႈ” ဝႃႈၼႆ။
ၼၢင်းမူဝ်ႁွမ်ၼႆႉ ထုၵ်ႇတပ်ႉသိုၵ်းတဢၢင်း TNLA တီႉၺွပ်းတူဝ်ၵႂႃႇ မိူဝ်ႈဝၼ်းတီႈ 17 လိူၼ်ဢေႃႊၵတ်ႊသ် ယၢမ်း ၵၢင်ၼႂ် 8:30 မူင်း တေႃႇထိုင်ယၢမ်းလဵဝ်။ ပေႃႈမႄႈလုၵ်ႈလၢင်းၵူၼ်းႁိူၼ်းမၼ်းၼၢင်းၶတ်းၸႂ် တႃႇတေႁူပ်ႉထူပ်း ဢုပ်ႇ ဢူဝ်းမၼ်းၼၢင်းၼၼ်ႉ သိုၵ်းတဢၢင်း ဢမ်ႇပၼ်ထူပ်း ဝႃႈၼႆ။
ၼၢင်းမူဝ်ၶမ်း ၵေႃႉပဵၼ်ပီႈၼၢင်း ၼၢင်းမူဝ်ႁွမ် လၢတ်ႈဝႃႈ “ တေႃႇထိုင်ယၢမ်းလဵဝ် ၸုမ်းသိုၵ်းတဢၢင်း ဢမ်ႇပွင်ႇ ၶၢဝ်ႇ ငၢဝ်း။ ၶႃႈႁဝ်းမႆႈၸႂ် လွင်ႈပၢႆးယူႇလီၼွင်ႉယိင်းၶႃႈႁဝ်းၶႃႈဢေႃႈ။ ယဝ်ႉၵေႃႈ မႆႈၸႂ် လုၵ်ႈၸၢႆး၊ လုၵ်ႈယိင်း မၼ်းၼၢင်း တိုၵ်ႉၵေႃႉလဵၵ်ႉယူႇ။ လိူဝ်ၼၼ်ႉ ပေႃႈမႄႈႁဝ်းၶႃႈၵေႃႈ ဢမ်ႇၼွၼ်းလပ်းၶႃႈ ပဵၼ်ဢၼ် မႆႈၸႂ် လူင်ဝႆႉ” ဝႃႈၼႆ။
တေႃႇထိုင်ဝၼ်းတီႈ7/9/2018 ၼႆႉ သင်ဝႃႈ သိုၵ်း TNLA ယင်းပႆႇပွႆႇပၼ်တူဝ်ၼၢင်းမူဝ်ႁွမ်ၶိုၼ်းၸိုင် ပေႃႈမႄႈၵူၼ်းမိူင်းလႄႈ ၵူၼ်းမိူင်းၼမ်ႉၶမ်း တေၼႄၵၢင်ၸႂ်တုၵ်းယွၼ်း ဝႃႈၼႆ။
ယွၼ်းၶႂၢင်ႉတႃႇၼႄၵၢင်ၸႂ်ဝႆႉ တီႈၸဝ်ႈၼႃႈတီႈၶဝ်မိူဝ်ႈဝၼ်းတီႈ 4/9/2018 ၼၼ်ႉၶႃႈဢေႃႈ။ ဝၼ်းတီႈ 5/9/2018 ၼႆႉ ဝႂ်ဢၼုၺၢတ်ႈ တူၵ်းမႃး ဝႃႈၼႄၵၢင်ၸႂ်လႆႈယူႇၼႆလႄႈ ဝၼ်းတီႈ 7/9/2018 ၼႆႉ တေႁူမ်ႈၵၼ်ၼႄၵၢင်ၸႂ်တီႈႁူင်းႁေႃးၵၢင်ဝဵင်း ဝဵင်းၼမ်ႉၶမ်း။ လိူဝ်သေပေႃႈမႄႈ လုၵ်ႈလၢင်းမၼ်းၼၢင်း ၸုမ်းတူင်ႉ ၼိုင်တူင်ႇဝူင်းၵူၼ်း ပႃႇတီႇသိူဝ်ၽိူၵ်ႇ ၸုမ်းၶွတ်ႇလိူတ်ႈ UP ၵေႃႈ တေၶဝ်ႈႁူမ်ႈၼႄၵၢင်ၸႂ်။ ၸုမ်းႁူမ်ႇလူမ်ႈၵူၼ်းမိူင်း ၼမ်ႉၶမ်း၊ ၸုမ်းၶႄၾႆးတေဢဝ်ႁူမ်ႇလူမ်ႈပၼ်” ၸၢႆးဢၢႆႈ ၽူႈၶဝ်ႈပႃးၼႂ်းၸုမ်းၶွတ်ႇလိူတ်ႈ UP လၢတ်ႈ။
မိူဝ်ႈၽွင်းသိုၵ်းတဢၢင်း ၶဝ်မႃးႁွင်ႉတီႉဢဝ် ၼၢင်းမူဝ်ႁွမ်ၵႂႃႇၼၼ်ႉ မၼ်းၼၢင်းတိုၵ်ႉလဵင်ႉၶဝ်ႈလုၵ်ႈဢွၼ်ႇမၼ်းယူႇ သမ်ႉပဵၼ်တၢင်းၾၢႆႇ ၼႃႈလုၵ်ႈ ဢွၼ်ႇလႄႈ မႆႈၸႂ်ပႃးပၢႆးၸႂ်လုၵ်ႈဢွၼ်ႇ။ လုၵ်ႈဢွၼ်ႇတႄႉ မုင်ႈမွင်းၵေႃႉပဵၼ်မႄႈ တေ ပွၵ်ႈမႃးၶိုၼ်း ႁွင်ႉႁွင်ႉႁႆႈႁႆႈယူႇၵူႈဝၼ်း” ဝႃႈၼႆ။
ယူႇတီႈတပ်ႉသိုၵ်းတဢၢင်း TNLA ဢွၵ်ႇၶေႃႈပိုၼ်ၽၢဝ်ႇဝႃႈ တေတႅပ်းတတ်း တြႃးၼၢင်းမူဝ်ႁွမ် ၾၢႆႇၼႃႈ ၸိူဝ်ႉၶိူဝ်း ပီႈၼွင်ႉမၼ်းၼၢင်းလႄႈ ၾၢႆႇၼႃႈၵူၼ်းတင်းၼမ် ဝႃႈၼႆ။
ၼၢင်းမူဝ်ႁွမ်ၼႆႉ မီးလုၵ်ႈဢွၼ်ႇလဵၵ်ႉ 3 ၵေႃႉ၊ ၵေႃႉပဵၼ်ၽူဝ်သမ်ႉ ၸိုဝ်ႈႁွင်ႉ ၸၢႆးလၢဝ်ၶမ်း ယူႇပွၵ်ႉႁူဝ်ၼွင် ၸႄႈဝဵင်းၼမ်ႉၶမ်း ဝႃႈၼႆ။
