ဝၼ်းတီႈ 19/12/2025 ယၢမ်းၵၢင်ၼႂ် ႁွင်ႈၵၢၼ်ၶၢဝ်ႇ RFA – Radio Free Asia ဢၼ်ပၵ်းတီႈဝဵင်းလူင် ဝေႃႊသျိၼ်ႊတၼ်ႊ မိူင်းဢမေႊရိၵၼ်ႊ ဢၼ်ၵိုတ်းလိုဝ်ႈဝႆႉၶၢဝ်းတၢင်း 7-8 လိူၼ်ၼၼ်ႉ ၶိုၼ်းတႄႇဢွၵ်ႇလၢႆးၵၢၼ်ၶၢဝ်ႇမႃးၶိုၼ်း။

ယွၼ်ႉပိူဝ်ႈၸွမ်ၸိုင်ႈထရမ်ႉ မိူင်းဢမေႊရိၵၼ်ႊ သင်ႇသၽႃးၵိုတ်းၵၢၼ်ၵမ်ႉၸွႆႈၸူး လၢႆလၢႆမိူင်းၼႂ်းလုမ်ႈၾႃႉသေ ႁွင်ႈၵၢၼ်ၶၢဝ်ႇ RFA ဢၼ်လႆႈငိုၼ်းၵမ်ႉၸွႆႈတီႈသၽႃးၼၼ်ႉၵေႃႈလႆႈၵိုတ်းၵၢၼ်ၵႂႃႇၸဵမ်မိူဝ်ႈလိူၼ်မေႊ။

ၼႂ်ၼႆႉတႄႉ တီႈၼႃႈ Page ၶၢဝ်ႇ RFA တီႈလၢႆးၵၢၼ်ၶၢဝ်ႇၾၢႆႇမၢၼ်ႈၼၼ်ႉ ၶိုၼ်းမီးၶလိပ်ႉၶၢဝ်ႇၶိုၼ်ႈမႃးဢၼ်ၼိုင်ႈ လၢတ်ႈဝႃႈ – ၸမ်ပၢင်လိူၵ်ႈတင်ႈယဝ်ႉလႄႈ တႃႇႁႂ်ႈၵူၼ်းမိူင်းတေလႆႈႁပ်ႉႁူႉၶၢဝ်ႇမၢၼ်ႇမႅၼ်ႈၼၼ်ႉ ၸင်ႇတေၶိုၼ်းမႃးပႂ်ႉတူၺ်းသေဢွၵ်ႇၶၢဝ်ႇပၼ်။ တေဢမ်ႇဢွၵ်ႇလႆႈထပ်းထီႇမိူၼ်ၵူႈပွၵ်ႈသေတႃႉ တေပႂ်ႉတူၺ်းၶၢဝ်ႇလမ်ႇလွင်ႈသေတေပိုၼ်ၽၢဝ်ႇပၼ်ၵႂႃႇ – ဝႃႈၼႆပႃး။

ၸိုင်ႈမိူင်းဢၼ်မီးသိုဝ်ႇၶၢဝ်ႇလွတ်ႈလႅဝ်းၼၼ်ႉ ၸဵဝ်းပူတ်းပွႆႇၸိူဝ်ႉၸၢတ်ႈလႄႈ တေႁဵတ်းႁႂ်ႈဝၢၼ်ႈမိူင်းလႄႈ ၵူၼ်းမိူင်းၶိုၼ်ႈယႂ်ႇလွတ်ႈလႅဝ်း- ၼႆၽူႈမီးတၢင်းႁူႉၼႂ်းလုမ်ႈၾႃႉၶဝ်ၸဝ်ႈလၢတ်ႈဝႆႉၼင်ႇၼႆသေတႃႉ ၸွမ်ၸိုင်ႈမိူင်းဢမေႊရိၵၼ်ႊ ၻေႃႊၼႄလ်ထရမ်ႉ တႄႉ ဝၢႆးလင်မၼ်းလႆႈဢႃႇၼႃႇပၢၼ်ႇပွင်ၸိုင်ႈမိူင်းၶိုၼ်းဢမ်ႇႁိုင်သင် သင်ႇတတ်းငိုၼ်းၵမ်ႉၸွႆႈ ဢၼ်မိူင်းဢမေႊရိၵၼ်ႊ ၸွႆႈၸူးၵူႈမိူင်းမိူင်းၼႂ်းလုမ်ႈၾႃႉၼၼ်ႉလႄႈ မိူၼ်ၼင်ႇ သိုဝ်ႇၶၢဝ်ႇယႂ်ႇ VOA- RFA ဢၼ်မီးလၢႆၸၢဝ်းၶိူဝ်းၼႂ်းလုမ်ႈၾႃႉ ႁူမ်ႈၵၼ်ႁဵတ်းၵၢၼ်ဝႆႉၼၼ်ႉၵေႃႈ ထုၵ်ႇသင်ႇၵိုတ်းပႃး။

မိူင်းမၢၼ်ႈ ဢၼ်ၺႃးသိုၵ်းယိုတ်းဢႃႇၼႃႇၸိုင်ႈမိူင်းသေ ပူၼ်ႉပႅၼ်သုၼ်ႇလႆႈၵူၼ်းမိူင်းဝႆႉယူႇၼၼ်ႉၵေႃႈ လႆႈပိုင်ႈဢိင်ၸႂ်ယႂ်ႇပႂ်ႉထွမ်ႇၶၢဝ်ႇငၢဝ်းတီႈ သိုဝ်ႇၶၢဝ်ႇ RFA- VOA ၸိူဝ်းၼႆႉ။