မိူင်းဢမေႊရိၵၼ်ႊ ၸတ်းပၢင်လိူၵ်ႈတင်ႈၼႂ်း 2024  ၼၼ်ႉ ၸွမ်ၸိုင်ႈၵဝ်ႇၻူဝ်ႊၼေႃႊ ထရမ်ႉ Donald Trump ဢွင်ႇပေႉသေ ၼႂ်းႁူဝ်ပီ 2025 ၼႆႉ ၶိုၼ်းပဵၼ်မႃးၸွမ်ၸိုင်ႈ မိူင်းဢမေႊရိၵၼ်ႊထႅင်ႈ ၵမ်းထူၼ်ႈ 2 ပဵၼ်ၵေႃႉထူၼ်ႈ 47 ။

ယူႇဢမ်ႇႁိုင် ၼႄၶေႃႈဢၢင်ႈဝႃႈ တႃႇလူတ်းယွၼ်ႇၵႃႈၸႂ်ႉၸၢႆႇၸိုင်ႈမိူင်း တႃႇပူၵ်းပွင်ၵူၼ်းမိူင်းဢမေႊရိၵၼ်ႊၼႆသေ ပိုၼ်ၽၢဝ်ႇၵိုတ်းၵၢၼ်ၵမ်ႉထႅမ် ပတ်းပိုၼ်ႉလုမ်ႈၾႃႉ။ လွင်ႈၼႆႉ ႁဵတ်းႁႂ်ႈတုမ်ႉတိူဝ်ႉထိုင် ၵၢၼ်ႁုၼ်ႈမုၼ်း တူင်ႇၵူၼ်းၵူႈၾၢႆႇၾၢႆႇ။

ဢၼ်တုမ်ႉတိူဝ်ႉလိူဝ်ႁႅင်း ပဵၼ်ၼႂ်းၸဵင်ႇၸၢၼ်းဝၼ်းဢွၵ်ႇၵုၼ်ၶဵဝ်ဢေးသျႃး။ ၼႂ်းၵၢၼ် လုမ်းလႃးပၢႆးယူႇလီလႄႈ လွင်ႈၵိၼ်ယႅမ်ႉ ၵူၼ်းပၢႆႈၽေးသိုၵ်း၊ ပႃးၸဵမ် ၸုမ်းသိုဝ်ႇၶၢဝ်ႇ ၸိူဝ်းဢဝ်လွင်ႈ ၵမ်ႉထႅမ် ဢမေႊရိၵၼ်ႊ ပီယၢဝ်းၶၢဝ်းႁိုင်ၵေႃႈ ၺႃးတတ်းငူပ်ႉၵမ်ႉၸွႆႈငိုၼ်းတွင်း။ ၸိူဝ်းတိုၵ်ႉပၼ်ႇၵၢၼ်လႆႈၵေႃႈမီး ၸိူဝ်းလႆႈၵိုတ်းၵႂႃႇၵမ်းလဵဝ်ၵေႃႈ မီးတင်းၼမ်။ ၵူၺ်းၵႃႈ လၢႆးၵၢၼ်ပွႆႇသဵင်ၾၢႆႇတႆး RFA ၶၢဝ်ႇ တႆး ဢၼ်လႅၼ်ႈၸၼ်ႉလဵဝ်ၵၼ်တင်းလုမ်ႈၾႃႉ ဢၼ်မီးမႃးၶၢဝ်းတၢင်း 20 ပီၸမ်ၸမ်ၼၼ်ႉၵေႃႈ လႆႈၵိုတ်းလိုဝ်ႈ ဝႆႉယဝ်ႉ။

လၢႆးၵၢၼ်ပွႆႇသဵင်ၾၢႆႇတႆး ဢၼ်မီးၸိုဝ်ႈဝႃႈ “သဵင်တႆး RFA ” ၼႆႉ ယူႇတီႈ RFA  Radio Free Asia  ပၵ်းလုမ်း တီႈမိူင်းလူင် ဝေႃႊသျိၼ်ႊတၼ်ႊ ၸိုင်ႈမိူင်းဢမေႊရိၵၼ်ႊသေ တႄႇပွႆႇမႃးမိူဝ်ႈဝၼ်းတီႈ 25/08/2006 ။ ပွႆႇသဵင်ၵူႈဝၼ်းသုၵ်း ၵူႈဝူင်ႈ။ ထိုင်မႃးပီ 2025 ၼႆႉ ယဵပ်ႇၶဝ်ႈ 19 ပီယဝ်ႉ၊ သင်ပဵၼ်ၵူၼ်းၵေႃႈ တေမႅၼ်ႈၽွင်းသႅၼ်းပၢၼ် တိုၵ်ႉၼုမ်ႇပဵၼ်မၢဝ်ႇပဵၼ်သၢဝ် တိုၵ်ႉလီယၵ်ႉလီလွမ်လီတူၺ်း။  

ၵူၺ်းၵႃႈ လူင်ပွင်ၸိုင်ႈမႂ်ႇ ဢမေႊရိၵၼ်ႊ ၶိုၼ်ႈမႃးၼႆႉ သင်ႇတတ်းလွင်ႈၵမ်ႉၸွႆႈၸူး တၢင်ႇၸိုင်ႈမိူင်းလၢႆပိူင်လႄႈ သိုဝ်ႇၶၢဝ်ႇ RFA ၵေႃႈ ၺႃးတတ်းငူပ်ႉ ဢၼ်ၸႂ်ႉၼႂ်းလၢႆးၵၢၼ်ပွႆႇသဵင်တႆးပႃး ၼႆယဝ်ႉ။ 

လၢႆးၵၢၼ်ပွႆႇသဵင်တႆး RFA ၼႆႉ လုင်းသႅင်ၸိုၼ်ႈ (သၶႁ) လႄႈ ဢႃးၸၢၼ် ၶိုၼ်းသႂ် ၸႂ်ယဵၼ် (ၽူႈၵေႃႇ တင်ႈၸုမ်းၶၢဝ်ႇၽူႈတွႆႇႁွၵ်ႈ) ပဵၼ်ဢၼ်သႂ်ႇၸႂ် – ဝႆႉၼမ်ႉၼၵ်းတႄႉတႄႉ။ ၶဝ်ၸဝ်ႈယိူင်းဢၢၼ်း တႃႇႁႂ်ႈ ၶၢဝ်ႇမိူင်းတႆး တေလႆႈဢွၵ်ႇၼႂ်းဢွမ်လူမ်းရေႇတီႇယူဝ်ႇ ၸၼ်ႉလုမ်ႈၾႃႉ၊ ဢၼ်မီးလၢႆးၵၢၼ်ပွႆႇသဵင် လၢႆလၢႆၸိုင်ႈမိူင်း၊ ၼင်ႇႁိုဝ် ၶၢဝ်ႇမိူင်းတႆး တေၸွတ်ႈတူဝ်ႈထိုင် တင်းလုမ်ႈၾႃႉၼၼ်ႉၼႆသေ ၽွင်းပီ 2006 ၼၼ်ႉ ပၼ်ပုၼ်ႈၽွၼ်း ၸၢႆးမိူင်း ႁႂ်ႈႁပ်ႉပဵၼ် Producer ၽူႈၶပ်းၶိုင် တႄႇဢွၵ်ႇလၢႆးၵၢၼ် ပွႆႇ သဵင်ၾၢႆႇတႆး RFA မႃး။ ၽူႈႁၢႆးငၢၼ်းၶၢဝ်ႇပဵၼ် ၸၢႆးယီႈၽူင်းလႄႈတင်း ၼၢင်းယေႈႁွမ်။  

သင်ဝႃႈ ၸဝ်ႈသႅင်ၸိုၼ်ႈ သၶႁ တိုၵ်ႉမီးသၢႆၸႂ်ယူႇၸိုင် မၼ်းၸဝ်ႈ ယင်းတေပဵၼ်ၸႂ် ဢမ်ႇလီၸွမ်း လွင်ႈလၢႆးၵၢၼ်ပွႆႇသဵင်တႆး RFA ၵိုင်ႉၵၢင်ႉလႆႈၵိုတ်းလိုဝ်ႈၵႂႃႇၼႆႉတႄႉတႄႉ။

ၸၢႆးမိူင်း ၽူႈႁပ်ႉပုၼ်ႈၽွၼ်းၶပ်းၶိုင်လၢႆးၵၢၼ်ႇ တႃႇပွႆႇသဵင်တႆး RFA လၢတ်ႈၼႄၽူႈတွႆႇႁွၵ်ႈဝႃႈ –“ဢၼ်ၶပ်းမၢႆသဵင်တႆး လႆႈၵိုတ်းၵႂႃႇၸိူင်ႉၼႆ ပေႃးတေလၢတ်ႈသိုဝ်ႈသိုဝ်ႈၼႆ ၼႂ်းၶၢဝ်းတၢင်းပွႆႇသဵင်မႃး 18 ပီပၢႆၼႆႉ လႆႈဝႃႈ မီးလွင်ႈၵမ်ႉယမ် ပၼ်ၵၢၼ်တိုၵ်းတေႃး လွင်ႈဢမ်ႇတြႃး ၼႂ်းဝၢၼ်ႈၼႂ်းမိူင်းတင်းၼမ်ယူႇ။ မိူဝ်ႈၽွင်း ၸုမ်းယိပ်းၵွင်ႈၵၢင်ႇ ၵိုတ်းသိုၵ်းဢဝ်ငမ်းယဵၼ်ၼၼ်ႉၼႆၵေႃႈ လႆႈၺႃးသိုၵ်း ၽူႈၵွၼ်းသိုၵ်း ဢၼ်ၵႂႃႇတူင်ႉၼိုင်ႈၼႃႈသိုၵ်းၸိူဝ်းၼႆႉ ႁဝ်းၶႃႈၵႂႃႇႁူပ်ႉၵၼ် တီႈပၢင်ၵုမ်သေ ၶဝ်လၢတ်ႈဝႃႈ ထွမ်ႇသဵင်တႆးမႃးၸဵမ်လႂ် ၊ မီးၽွၼ်းလီ တႃႇၸိူဝ်ႉၶိူဝ်းဝၢၼ်ႈမိူင်းႁဝ်းၵျႃႉ ၼႆၶဝ်လၢတ်ႈၸိူင်ႉၼႆ။ ယုမ်ႇယမ်ဝႃႈ ၼင်ႇမဵတ်ႉႁိၼ်မဵတ်ႉသၢႆးဢွၼ်ႇၵူၺ်းၵေႃႈ မၼ်းၵမ်ႉယၼ်ပၼ်ၵၢၼ်ၵွပ်ႇၵူႈဢဝ် သုၼ်ႇလႆႈႁဝ်းလႄႈ ၵၢၼ်ပူၵ်းတင်ႈဝၢၼ်ႈမိူင်း တီႊမူဝ်ႊၶရေႊၸီႊယူႇ ၶၢဝ်းတၢင်းပွႆႇသဵင်မႃးၼႆႉ”- ဝႃႈၼႆ။

ၸၢဝ်းၶိူဝ်း ၼႂ်းမိူင်းႁူမ်ႈတုမ်မၢၼ်ႈ ၸိူဝ်းမီးသုၼ်ႇလႆႈပွႆႇသဵင်ၼႂ်း RFA ၼႆႉ မီး 7 ၸၢဝ်းၶိူဝ်း။ ပဵၼ်သဵင်တႆး၊ ၶၢင်၊ ယၢင်းလႅင်၊ ယၢင်းၽိူၵ်ႇ၊ ၶျၢင်း၊ ရၶႅင်ႇလႄႈ မွၼ်း။ မိူဝ်ႈတႄႇမီးသုၼ်ႇလႆႈပွႆႇသဵင် တီႈ RFA ၼႆႉ လႆႈၶၢဝ်းယၢမ်း 5 မိၼိတ်ႉၵူၺ်း။ ၼႂ်းၵႄႈၼၼ်ႉ ၽူႈႁပ်ႉပုၼ်ႈၽွၼ်းပွႆႇသဵင်ၸၢဝ်းၶိူဝ်း ဢွၼ်ႁူမ်ႈ ၵၼ်တုၵ်းယွၼ်းလႄႈ လႆႈၶၢဝ်းယၢမ်းပွႆႇသဵင်ၸၢဝ်းၶိူဝ်း ႁိုင်ထိုင်ၶိုင်ႈၸူဝ်ႈမူင်းၵေႃႈ ယၢမ်ႈမီးမႃး။

ၽိူဝ်ႇထိုင်ၶၢဝ်းၸတ်းပၢင်ယင်ႇၵၢင်ၸႂ် ပိူင်ငဝ်ႈပိုင်းမိူင်း 2008 လႂ်၊ ပၢင်လိူၵ်ႈတင်ႈ 2010 လႂ် 2025 လႂ်မႃးၼႆႉ လၢႆးၵၢၼ်ၾၢႆႇမၢၼ်ႈ ၶႂၢၵ်ႈၶၢဝ်းယၢမ်းလႄႈ လၢႆးၵၢၼ်ၼမ်မႃးသေ သဵင်ၸၢဝ်းၶိူဝ်းၵေႃႈ ထုၵ်ႇလူတ်းယွၼ်ႇယွမ်းၶၢဝ်းယၢမ်းၵႂႃႇၶိုၼ်း ၵမ်းဢိတ်းဢိတ်း။ လိုၼ်းသုတ်းၼႆႉ လၢႆးၵၢၼ်ပွႆႇသဵင် ၸၢဝ်းၶိူဝ်းလႆႈၼိုင်ႈၶိူဝ်း 4 မိၼိတ်ႉၵူၺ်း။

ၵူၼ်းၼုမ်ႇၸၢႆး ၼမ်ႉၶမ်း ၵေႃႉၼိုင်ႈ ဢၼ်ယၢမ်ႈထွမ်ႇသဵင်ၶၢဝ်ႇတႆး RFA မႃးၸဵမ်လဵၵ်ႉၼၼ်ႉလၢတ်ႈ ဝႃႈ – ဢၼ်သဵင်တႆး RFA လႆႈၵိုင်ႉၵၢင်ႉၵိုတ်းၵႂႃႇၸွမ်း လၢႆးၵၢၼ်လူင်ပွင်ၸိုင်ႈမႂ်ႇၼႆႉ – လႆႈဝႃႈပဵၼ် ဢၼ်တုမ်ႉတိူဝ်ႉ တွၼ်ႈတႃႇၵူၼ်းမိူင်းတႆး ၸိူဝ်းႁၢင်ႇယၢၼ်ပိုၼ်ႉတီႈ ဢၼ်မီးလႅင်းဢိၼ်ႊထိူဝ်ႊၼႅတ်ႊ ၸိူဝ်းၼၼ်ႉတႄႉတႄႉ။ ပေႃးဢမ်ႇမီးသဵင်ၶၢဝ်ႇတႆးတၢင်း ရေႇတီႇယူဝ်ႇၸိုင် တႃႇႁႂ်ႈၵူၼ်း တၢင်းဝၢၼ်ႈလႄႈ ၵူၼ်းထဝ်ႈၵူၼ်းၵႄႇ တေလႆႈႁပ်ႉႁူႉၶၢဝ်ႇၼၼ်ႉ မၼ်းဢမ်ႇငၢႆႈငၢႆႈ။ ယွၼ်ႉၵၢၼ် သိုၵ်းၵၢၼ်မိူင်းဢမ်ႇလီသေ ႁဵတ်းႁႂ်ႈၵူၼ်းမိူင်း ႁူၼူၵ်ႇတႃတၼ် ၵူၺ်းဢမ်ႇၵႃး ယၢမ်းလဵဝ်တႄႉ တွၼ်ႈတႃႇၵူၼ်းဝၢၼ်ႈတၢင်းဢွင်ႈတီႈဢမ်ႇပႆႇ ႁုၼ်ႈမုၼ်းၼၼ်ႉ ပဵၼ်ဢၼ်တၼ်တိၵ်း လပ်းသိင်ႇၽိတ်းယဝ်ႉ ဝႃႈၼႆ။

“မိူဝ်ႈပူၼ်ႉမႃး မွၵ်ႈ 10 ပီၼၼ်ႉ တိုၵ်ႉပဵၼ်ပၢၼ်လုၵ်ႈဢွၼ်ႇၶႃႈၼေႃႈ။ ၵေႃႈလႆႈထွမ်ႇၶၢဝ်ႇထွမ်ႇငၢဝ်း ၸွမ်းၵူၼ်းလူင်တီႈႁိူၼ်း။ ဢမ်ႇလိူၵ်ႈဢမ်ႇလႄႇ လႆႈထွမ်ႇပႃးၶၢဝ်ႇတႆး ဢၼ်မႃးၼႂ်း RFA ။ ၶဝ်တေပွႆႇၼႆႉ ပဵၼ်ဝၼ်းသုၵ်း။ ၵွၼ်ႇၶၢဝ်ႇၼၼ်ႉ ပႆႇမႃးမွၵ်ႈ 15 မိၼိတ်ႉၼႆႉ လႆႈၵႂႃႇပၼ်ႇလၵ်းရေႇတီႇယူဝ်ႇပႂ်ႉ ၶႃႈဢေႃႈ ၼင်ႇႁိုဝ် တေလႆႈထွမ်ႇၶိုတ်းတၼ်း။ ပေႃးဝႃႈၶၢဝ်ႇတႆးမႃးၼႆ တေငိၼ်း သဵင်ၵွင်မွင်းမႃးဢွၼ် တၢင်းၶႃႈၼႃႇ။ မိူဝ်ႈၽွင်းၼၼ်ႉ ၸူမ်းပေႇၸႂ်ယဝ်ႉ။ ၸဵမ်လုၵ်ႈဢွၼ်ႇၵူၼ်းလူင် ပေႃးဝႃႈငိၼ်းသဵင်တႆး ယဝ်ႉၼႆႉ မႃးထွမ်ႇၸွမ်းၵၼ်မူတ်းဢေႃႈ။ ပေႃးသဵင်တႆးယဝ်ႉၵေႃႈ ဢွၼ်ၵၼ်ယၢႆႈမိူဝ်းႁိူၼ်းၽႂ်ႁိူၼ်း မၼ်းၶိုၼ်းသေၼႆ ပဵၼ်တီႈမၢႆတွင်းယူႇဢၼ်ၼိုင်ႈၶႃႈ ၼႂ်းၸၢတ်ႈပၢၼ်”- ဝႃႈၼႆ။

တီႈ RFA ၼႆႉ လၢႆးၵၢၼ်ပွႆႇသဵင်ၸၢဝ်းၶိူဝ်း ၵိုတ်းၵႂႃႇယဝ်ႉသေတႃႉ လၢႆးၵၢၼ်ပွႆႇသဵင်မၢၼ်ႈတႄႉ တိုၵ်ႉပွႆႇယူႇ ၼိုင်ႈဝၼ်း 3 ၶၢဝ်း။ ၵၢင်ၼႂ် ၵၢင်ဝၼ်း ၵၢင်ၶမ်ႈ ၼိုင်ႈၵမ်းလႂ် 15 မိၼိတ်ႉ။လွင်ႈဢၼ်ၵိုတ်း သဵင် ၸၢဝ်းၶိူဝ်းၵႂႃႇၼႆႉ ဢမ်ႇၸႂ်ႈဝႃႈ ၶဝ်လိူၵ်ႈၼႃႈ ဢမ်ႇၸႂ်ႈဝႃႈ ပဵၼ်ၸၢဝ်းၶိူဝ်းလႄႈ တတ်းဢမ်ႇၸႂ်ႈၼင်ႇ ၵဝ်ႇ မၼ်းဢိင်ၼိူဝ်လွင်ႈလႅၵ်ႈလၢႆႈၵၢၼ်မိူင်း ဢမေႊရိ ၵၼ်ႊၵူၺ်းၼႆ ၸၢႆးမိူင်း ၽူႈႁပ်ႉပုၼ်ႈၽွၼ်း ၶပ်းမၢႆပွႆႇသဵင်တႆး RFA လၢတ်ႈၼႄဝႆႉၼင်ႇၼႆ-

“ဢၼ်သဵင်တႆး RFA  လႆႈၵိုတ်းလိုဝ်ႈၵႂႃၼႆႉ ဢမ်ႇၸႂ်ႈဝႃႈ မီးပၼ်ႁႃၼႂ်းၼႃႈၵၢၼ်သင်၊ မၼ်းပဵၼ်ၵွပ်ႈ ပၼ်ႁႃလွင်ႈလႅၵ်ႈလၢႆႈ ဝၢၼ်ႈမိူင်းဢမေႊရိၵၼ်ႊၵူၺ်း။ သဵင်တႆးႁဝ်းၶႃႈ လႆႈပွႆႇတီႈ RFA ၵေႃႈယဝ်ႉ ဢမ်ႇလႆႈပွႆႇၵေႃႈယဝ်ႉ ႁဝ်းၶႃႈ တိုၼ်းဢမ်ႇယွၼ်ႇဢမ်ႇထွႆၶႃႈ။ ၼိုင်ႈဝူင်ႈ လႆႈၶၢဝ်းယၢမ်း 4 မိၼိတ်ႉၼႆၵေႃႈ ႁဝ်းလႆႈဝႆႉပိုၼ်ႉတီႈႁဝ်းၵေႃႈ သိုပ်ႇဢဝ်ဝႆႉ။ သိုပ်ႇ ဢဝ်တိုဝ်ႉတၢင်း ဢၼ်လႆႈပွႆႇသဵင်တႆး တီႈမိူင်းဝၼ်းတူၵ်းသေ ပွႆႇမႃးပၼ်ၵူၼ်းဝၢၼ်ႈၵူၼ်းမိူင်းႁဝ်းထွမ်ႇၶၢဝ်ႇငၢဝ်း။ ၶၢဝ်းတၢင်းၼိုင်ႈဝူင်ႈၼႆႉသမ်ႉ လႆႈပွႆႇ 4 မိၼိတ်ႉၵူၺ်းလႄႈ ႁႂ်ႈမၼ်းၵုမ်ႇတႄႉဢမ်ႇၵုမ်ႇ။ ဢၼ်ပဵၼ်မႃးဢွၼ်ႊလၢႆႊရေႇတီႇယူဝ်ႇၼႆႉ ယွၼ်ႉပိူဝ်ႈလွင်ႈၼႆႉၵေႃႈပႃးၶႃႈဢေႃႈ”- ဝႃႈၼႆ။

ဢမ်ႇၵွမ်ႉၵႃႈ လၢႆးၵၢၼ်ပွႆႇသဵင်ၸၢဝ်းၶိူဝ်း တီႈ RFA ၵူၺ်း၊ မိူၼ်ၼင်ႇ လၢႆးၵၢၼ်ပွႆႇသဵင်မၢၼ်ႈတီႈ VOA Voice of American ဢၼ်ယၢမ်ႈပွႆႇသဵင်မႃး ၶၢဝ်းတၢင်း 83 ပီၼၼ်ႉၵေႃႈ လူင်ပွင်ၸိုင်ႈမႂ်ႇ ဢမေႊရိ ၵၼ်ႊ လၢတ်ႈဝႃႈ လူဝ်ႇထတ်းထွင်ၼႃႈၵၢၼ်ၵူႈလွင်ႈလွင်ႈၼႆသေ သင်ၵိုတ်းဝႆႉၸူဝ်ႈၶၢဝ်း ၸဵမ်မိူဝ်ႈဝၼ်းတီႈ 15/03/2025 မႃးတေႃႇထိုင်ယၢမ်းလဵဝ် ယင်းပႆႇလႆႈဢွၵ်ႇလၢႆးၵၢၼ်ၶိုၼ်း။

ၼႂ်းၶၢဝ်းတၢင်းပွႆႇသဵင်တႆး RFA မႃး ၸမ် 20 ပီၼႆႉ လႆႈပွႆႇသဵင်ၶၢဝ်းယၢမ်းပွတ်းႁႅင်းၵေႃႈပိူင်ၼိုင်ႈ ၶႂ်ႈသိုပ်ႇပူၵ်းပွင်သိုဝ်ႇၶၢဝ်ႇတႆးၵေႃႈ ပိူင်ၼိုင်ႈလႄႈ ၸုမ်းၶၢဝ်ႇၽူႈတွႆႇႁွၵ်ႈ ၸင်ႇၶူင် ဢွၵ်ႇလၢႆးၵၢၼ်မႂ်ႇမႂ်ႇ ဢွၼ်ႊလၢႆႊရေႇတီႇယူဝ်ႇ မိူဝ်ႈ 2013 ဝၢႆးၸဝ်ႈသႅင်ၸိုၼ်ႈ သၶႁ လူႉသဵင်ႈ။ ယွၼ်ႉၼၼ် မိူဝ်ႈလဵဝ် ဢမ်ႇလႆႈပွႆႇတီႈ RFA ယဝ်ႉသေတႃႉ ၾၢႆႇၼိုင်ႈၵေႃႈ တႃႇသိုဝ်ႇၶၢဝ်ႇတႆး ပေႃးတေဢမ်ႇၶၢတ်ႇႁၢႆဝၢႆးၼၼ်ႉ ဢၼ်ၸုမ်းၶၢဝ်ႇၽူႈတွႆႇႁွၵ်ႈ ႁဵတ်းဢွၵ်ႇလႆႈၵေႃႈ မီးထႅင်ႈတင်းၼမ် မိူၼ်ၼင်ႇ ၼိူဝ်သူဝ်ႊသျႄႊမီႊတီႊယိူဝ်ႊလၢႆလၢႆ Platform မိူၼ် ၼင်ႇ တီႈ website – shannews.org , Youtube SHAN News, Facebook SHAN News,  twitter SHAN News – လၢႆးၵၢၼ်ၶၢဝ်ႇ ပွင်ႈၵႂၢမ်းလႄႈ Podcast – ဢွၵ်ႇပႃး တီႈဢွမ်လူမ်း  FM 108 – FM  96  SW 16 မီႊတိူဝ်ႊ 17.72 မီႊၵႃႊႁၢတ်ႉသ် ၸိူဝ်းၼႆႉ။