ၼႂ်းလိူၼ်ၼႆႉ ပၢင်တိုၵ်းသိုၵ်းသိူဝ် ၼႂ်းၸိုင်ႈတႆးပွတ်းႁွင်ႇပဵၼ်ထပ်းၵၼ် ဢမ်ႇထၢတ်ႇ UNOCHA ပိုၼ်ၽၢဝ်ႇဢွၵ်ႇဝႃႈ ၵူၼ်းမိူင်းဢၼ်ပၢႆႈၽေးသိုၵ်းၼႆႉ တင်းမူတ်းမီးၵႂႃႇ 2400 ၵေႃႉပၢႆ ဝႃႈၼႆ။
တႄႇဢဝ်ဝၼ်းတီႈ 01-17/08/2018 ၼႆႉမႃး ၼႂ်းၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၸုမ်း ဢူၺ်းလီပွတ်းႁွင်ႇ၊ တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ တပ်ႉသိုၵ်း RCSS ၵႆႉလႆႈပဵၼ်ပၢင်တိုၵ်းၵၼ်၊ ၶဵင်ႈၶႅင် ၵၢၼ် သိုၵ်းတေႃႇၵၼ်ၸိူဝ်းၼႆႉ ၵူၼ်းမိူင်းပိုၼ်ႉတီႈ ဢွၼ်ၵၼ်ပၢႆႈၽေးသိုၵ်း ၽၢတ်ႇယၢၼ်ႁိူၼ်းယေးတီႈယူႇၶိူဝ်းယႂ်း ဝႃႈၼႆ။
UNOCHA လုမ်းလူလွမ်ၸွႆႈထႅမ်ၵူၼ်းတေႃႇၵူၼ်း ၸၢတ်ႈၸိုင်ႈလုမ်ႈၾႃႉ ပိုၼ်ၽၢဝ်ႇဝႃႈ “ၵူၼ်းၸိူဝ်း လႆႈဢွၵ်ႇ ပၢႆႈယၢၼ်ႁိူၼ်းယေးၶဝ်သေ လႆႈၵႂႃႇ ပိုင်ႈယူႇၸွမ်းဝတ်ႉဝႃးၽႃသိူဝ်ႇ လႄႈ ဢွင်ႈတီႈဢၼ်လွတ်ႈၽေး။ မီးၸုမ်း တူင်ႇဝူင်းၵူၼ်းၼႂ်းမိူင်း၊ ၾၢႆႇၸွႆႈထႅမ်ၵၢၼ်ၵူၼ်း ၵူႈမိူင်းမိူင်း လႄႈ ၾၢႆႇ လူင်ပွင်ၸိုင်ႈ ၶဝ် ၸိူဝ်းၼႆႉ လႆႈၸွႆႈထႅမ်ဝႆႉ။ ယၢမ်းလဵဝ်ငဝ်းလၢႆးၵၢၼ်သိုၵ်းတိုၵ်ႉၶဵင်ႈၶႅင်ၵၼ်ယူႇ သေတႃႉၵေႃႈ မၢင်တီႈ ၵူၼ်းၸိူဝ်းပၢႆႈၽေးသိုၵ်း ဢွၼ်ၵၼ်ပွၵ်ႈ ၶိုၼ်းမိူဝ်းႁိူၼ်းၽႂ်မၼ်းၶိုၼ်းလီငၢမ်းယဝ်ႉ ယွၼ်ႉပိူဝ်ႈပဵၼ်ၶၢဝ်းၽုၵ်ႇသွမ်ႈ” ဝႃႈၼႆ။
ၼႂ်းပီ 2018 ၼႆႉ ၼင်ႇႁိုဝ်တေၵႄႈလိတ်ႈလႆႈ လွင်ႈၶဵင်ႈၶႅင် ၵႄႈၵၢင်သိုၵ်းၸၢဝ်းၶိူဝ်းၼႆႉ ၾၢႆႇ ၽူႈဢွၼ်ႁူဝ်ပႃႇတီႇ ၵၢၼ်မိူင်းတႆး လႆႈတိုၵ်းသူၼ်းဝႆႉ တႃႇႁူပ်ႉဢုပ်ႇဢူဝ်းၵႄႈလိတ်ႈပၼ်ႁႃဝႆးဝႆး။
မိူဝ်ႈၼႂ်းလိူၼ်ၵျူႊလၢႆႊ လိူၼ်ပူၼ်ႉၵေႃႈ UNOCHA ဢွၵ်ႇဝႆႉဝႃႈ ၼႂ်းၸႄႈဝဵင်းၼမ်ႉတူႈ၊ ၸႄႈဝဵင်းၼမ်ႉၶမ်း ၸိုင်ႈ တႆးပွတ်းႁွင်ႇလႄႈ ၼႂ်းၸႄႈဝဵင်းမိူင်းၵိုင်၊ ၸႄႈဝဵင်းၵေးသီး ၼႂ်းၸိုင်ႈတႆး ပွတ်းၸၢၼ်း တင်းမူတ်း ၵူၼ်းမိူင်းတႆးပၢႆႈ ၽေးသိုၵ်း မီး 2,800 ပၢႆ ဝႃႈၼႆ။
