ၵူၼ်းမိူင်း 160 ပၢႆ ဢၼ်ပၢႆႈၽေးသိုၵ်း မႃးသွၼ်ႈဝႆႉတီႈ သီႇပေႃႉၼၼ်ႉ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းယဝ်ႉ ယွၼ်ႉ မႆႈၸႂ်သူၼ်ႁႆႈၼႃးလႄႈ ႁိူၼ်းယေး ဝႃႈၼႆ။
မိူဝ်ႈၼႆႉ ဝၼ်းတီႈ 23/08/2018 ယၢမ်းၵၢင်ၼႂ် 10 မူင်း ၵူၼ်းပၢႆႈၽေးသိုၵ်း ဢိူင်ႇပၢင်လူင် ၸႄႈဝဵင်းၼမ်ႉတူႈ ႁူဝ် ၵူၼ်း 164 ၵေႃႉ ဢၼ်ပၢႆႈမႃးသွၼ်ႈဝႆႉတီႈ ဝတ်ႉဢွင်ႇမင်ႇၵလႃႇၽူဝ်းတေႃႇ ၸႄႈဝဵင်းသီႇပေႃႉၼၼ်ႉ ဢွၼ်ၵၼ်ပွၵ်ႈ မိူဝ်းၶိုၼ်းႁိူၼ်းယေးၽႂ်မၼ်းယဝ်ႉ ဝႃႈၼႆ။
ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ၶပ်းၶိုင်ဝႆႉ ရူတ်ႉၵႃး တႃႇတေႃႉသူင်ႇ 6 လမ်း။ ၵူၼ်းပၢႆႈၽေးႁဝ်းၶႃႈတႄႉ ဢွၼ်ၵၼ်ပွၵ်ႈမိူဝ်ႈၼႆႉတင်းမူတ်း။ ဢၼ်တေၵိုတ်းဝႆႉတႄႉ တေ ၵိုတ်းဝႆႉမွၵ်ႈ 5 – 6 ၵေႃႉၵူၺ်းၶႃႈ။ ယွၼ်ႉဝႃႈ ၵေႃႉၼိုင်ႈသမ်ႉ ပဵၼ်တၢင်းပဵၼ်ၼၢဝ်ၼူၵ်ႉ တိုၵ်ႉၶိုၼ်ႈႁူင်းယႃသီႇပေႃႉ ဝႆႉယူႇ။ ထႅင်ႈမႄႈလုၵ်ႈဢွၼ်ႇ ဢၼ်တိုၵ်ႉၵိူတ်ႇလုၵ်ႈမိူဝ်ႈပူၼ်ႉမႃးလၢႆဝၼ်းၼႆႉ။ ၶဝ်ၸိူဝ်းၼႆႉတႄႉ သင်ႁၢႆလီ/ ၶႅၼ်း လီယဝ်ႉတႄႉတေပွၵ်ႈမိူဝ်းၼင်ႇၵဝ်ႇ” ဝႃႈၼႆ။
တၢင်းပွတ်းၼႂ်းဢိူင်ႇပၢင်လူင် ၸႄႈဝဵင်းၼမ်ႉတူႈၼႆႉ ၵူၼ်းဝၢၼ်ႈၵူၼ်းသူၼ်မႆႈၸႂ်ၵၢၼ်ၼႃႇလႄႈ ၸူဝ်းၵၼ်ပွၵ်ႈ တီႈတႄႉပၼ်ႁႃသိုၵ်းသိူဝ်ထုင်ႉၼၼ်ႉယင်းပႆႇယဝ်ႉ ယင်းတိုၵ်ႉယိုဝ်းၵၼ်ဝႆႉယူႇလႄႈ တင်းပွၵ်ႈတင်းၵူဝ်ယဝ်ႉ ဝႃႈၼႆ။
ၽူႈယႂ်ႇၵူၼ်းလူင် ၵေႃႉၼိုင်ႈ ၼႂ်းဝၢၼ်ႈပၢင်လူင် ဢၼ်မႃးႁပ်ႉၵူၼ်းပၢႆႈၽေးသိုၵ်းတီႈသီႇပေႃႉ လၢတ်ႈတီႈၽူႈတွႆႇ ႁွၵ်ႈဝႃႈ “ ႁဝ်းၶႃႈ မႃးႁပ်ႉၵူၼ်းဝၢၼ်ႈႁဝ်း ပွၵ်ႈမိူဝ်းၶိုၼ်း။ ယွၼ်ႉမႆႈၸႂ် ၵၢၼ်သူၼ်ႁႆႈၼႃးၵူၼ်းဝၢၼ်ႈႁဝ်း မၢင်ၵေႃႉ ၽုၵ်ႇသွမ်ႈၼႃးဝႆႉ ပႆႇလႆႈသႂ်ႇၾုၼ်ႇၵေႃႈမီး။ လိူဝ်ၼၼ်ႉ မႆႈၸႂ်လွင်ႈႁိူၼ်းယေး ၸိူဝ်းၼႆႉ။ ပၢင်တိုၵ်းယႂ်ႇလူင်ဢမ်ႇ ပဵၼ်သေတႃႉ မၢင်ပွၵ်ႈမၢင်လႂ် လႆႈငိၼ်းသဵင်ၵွင်ႈဢွၵ်ႇယူႇ” ဝႃႈၼႆ။
မိူဝ်ႈဝၼ်းတီႈ 15/08/2018 ယွၼ်ႉသိုၵ်းဢူၺ်းလီ ပွတ်းႁွင်ႇ တင်း သိုၵ်း RCSS ၶဵင်ႈၶႅင်ၵၢၼ်သိုၵ်းတေႃႇၵၼ် ၼႂ်းဢိူင်ႇ ပၢင်လူင် ၸႄႈဝဵင်းၼမ်ႉတူႈလႄႈ ၵူၼ်းဝၢၼ်ႈလႆႈဢွၼ်ၵၼ်ပၢႆႈ ဝႃႈၼႆ။
ၼၢင်းဢေး ၵူၼ်းဝၢၼ်ႈပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ၶႂ်ႈပွၵ်ႈမိူဝ်းၼႃႇယဝ်ႉ ဢၼ်ႁဝ်းၶႃႈပၢႆႈမႃးတီႈ သီႇပေႃႉၼႆႉ မီး 8 – 9 ဝၼ်းယဝ်ႉ။ ႁဝ်းၶႃႈမႆႈၸႂ် သူၼ်ႁႆႈၼႃးလႄႈ ႁိူၼ်းယေး ႁဝ်းၶႃႈဢေႃႈ။ ပဵၼ်ႁိုဝ်ၵေႃႈယဝ်ႉ မိူဝ်ႈၼႆႉ ႁဝ်းၶႃႈဢွၼ်ၵၼ်ပွၵ်ႈၶႃႈယဝ်ႉ။ မိူဝ်းယူႇလႆႈလၢႆဝၼ်းၵေႃႈယူႇ သင်ငဝ်းလၢႆးမၼ်းဢမ်ႇၶႅမ်ႉ ဢမ်ႇလီၼႆ ၸင်ႇပၢႆႈထႅင်ႈ ၵမ်းၼိုင်ႈ၊ ဢဝ်ၵၢမ်ႇမၼ်းဝႃႈၵူၺ်းၶႃႈ” ဝႃႈၼႆ။
ၼႂ်းၸႄႈဝဵင်းၼမ်ႉတူႈၼႆႉ သိုၵ်းလူင်ပွင်ၸိုင်ႈမၢၼ်ႈ သိုၵ်း TNLA (လွႆ)၊ သိုၵ်းတႆး RCSS – SSPP ၵႂႃႇမႃးတူင်ႉၼိုင် ဢမ်ႇၸုမ်းၼိုင်ႈၵေႃႈ ၸုမ်းၼိုင်ႈ ယူႇယူႇၵႆႉယိုဝ်းၵၼ်တႃႇသေႇ ဝႃႈၼႆ။
