ၵူၼ်းမိူင်း ၸိူဝ်းယူႇၼႂ်းၵႄႈသီႇပေႃႉ – ၼမ်ႉတူႈ ဢွၼ်ၵၼ်ပၢႆႈႁွတ်ႈ ၽႅဝ်တီႈဝဵင်းသီႇပေႃႉ 120 ၵေႃႉ ယွၼ်ႉသိုၵ်း ၸုမ်းယိပ်းၵွင်ႈၵၢင်ႇတႆး၊ လွႆ၊ မၢၼ်ႈ ၶဵင်ႈၶႅင်ၵၢၼ်သိုၵ်းတေႃႇၵၼ်လႄႈ ႁဵတ်းႁႂ်ႈ ၵူၼ်းမိူင်းမႆႈၸႂ် ၵူဝ်ပဵၼ်ပၢင် တိုၵ်းၼႆသေ ဢွၼ်ၵၼ်ပၢႆႈဢွၵ်ႇမႃး ဝႃႈၼႆ။
ဝၼ်းတီႈ 01/08/2018 ယၢမ်းၵၢင်ၶမ်ႈ 9:15 မူင်း ၵူၼ်းမိူင်းဢိူင်ႇပၢင်လူင် ၸႄႈဝဵင်းၼမ်ႉတူႈ ဢွၼ်ၵၼ်ပၢႆႈမႃး သွၼ်ႈဝႆႉတီႈ ဝတ်ႉဢွင်ႇမင်ႇၵလႃႇၽူဝ်းတေႃႇ ၸႄႈဝဵင်းသီႇပေႃႉ ႁူဝ်ၵူၼ်း 120 ၵေႃႉ၊ တီႈဢိူင်ႇတႃႈတေႈသမ်ႉ 20 ၵေႃႉ လႄႈ တီႈမၢၼ်ႈၸၢမ် ၸႄႈဝဵင်းၼမ်ႉတူႈသမ်ႉ 100 ပၢႆ ႁူမ်ႈၵၼ်တင်းမူတ်း ဢွၼ်ၵၼ် ပၢႆႈဢွၵ်ႇမႃး ႁိမ်း 250 ၵေႃႉ ဝႃႈၼႆ။
ၵူၼ်းပၢႆႈၽေးသိုၵ်း ၼႂ်းဢိူင်ႇပၢင်လူင် ဢၼ်ႁွတ်ႈၽႅဝ်မႃးတီႈဝတ်ႉဢွင်ႇမင်ႇၵလႃႇၽူဝ်းတေႃႇ လၢတ်ႈတီႈ ၽူႈတွႆႇ ႁွၵ်ႈဝႃႈ “ ပၢင်တိုၵ်းတႄႉ ပႆႇပဵၼ် ယွၼ်ႉ သိုၵ်းတႆး သွင်ၸုမ်း သိုၵ်းတဢၢင်း၊ သိုၵ်းမၢၼ်ႈ တူင်ႉၼိုင်ၵႂႃႇမႃးႁၢဝ်ႈႁႅင်း။ မိူဝ်ႈ ဝႃးၼႆႉ ၵူၼ်းဝၢၼ်ႈႁဝ်းၶႃႈ ၵႂႃႇသွမ်ႈၼႃးပွၵ်ႈမႃး မႃးၺႃးသႂ်ႇသိုၵ်းတဢၢင်းႁဵတ်းၼၼ်သေ ၵူၼ်းဝၢၼ်ႈႁဝ်းၶႃႈ ဢွၼ် ၵၼ်ၵူဝ်ပဵၼ်ပၢင်တိုၵ်းၼႆလႄႈ ၸင်ႇဢွၼ်ၵၼ်ႁၢင်ႈႁႅၼ်း ပၢႆႈဢွၵ်ႇမႃးဝႆႉဢွၼ်တၢင်း” ဝႃႈၼႆ။
တၢင်းပွတ်းဢိူင်ႇပၢင်လူင် ၸႄႈဝဵင်းၼမ်ႉတူႈၼၼ်ႉ ၵမ်ႈၼမ် သိုၵ်းဢၼ်တူင်ႉၼိုင်ၵႂႃႇမႃးသမ်ႉ ပဵၼ်သိုၵ်းလူင်ပွင် ၸိုင်ႈမၢၼ်ႈ၊ သိုၵ်း TNLA လႄႈ သိုၵ်း RCSS ၸဵမ်ၸိူဝ်းၼႆႉ ဝႃႈၼႆ။
ဢိူင်ႇပၢင်လူင်ၼႆႉ ယၢၼ်ၵႆဝဵင်းၼမ်ႉတူႈ 24 လၵ်း မီးၾၢႆႇၸၢၼ်းၼမ်ႉတူႈ။ တင်းမူတ်း မီး 8 ဝၢၼ်ႈ မိူၼ်ၼင်ႇ ဝၢၼ်ႈၼမ်ႉသီႇလိၼ်း၊ ဝၢၼ်ႈပၢင်ႁၢတ်ႇ၊ ဝၢၼ်ႈသႃႇ၊ ဝၢၼ်ႈၶႄႇ၊ ဝၢၼ်ႈပၢင်လူင်၊ ဝၢၼ်ႈၼႃးၶူဝ် လႅင်လႄႈ ဝၢၼ်ႈ ပၢင်သပေႇ ၸိူဝ်းၼႆႉ ဝႃႈၼႆ။
