သိုၵ်း TNLA တင်း RCSS ပဵၼ်ပၢင်တိုၵ်းႁၢဝ်ႈႁႅင်း ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ ႁၢဝ်ႈႁႅင်းသေ ၵူၼ်းမိူင်း 673 ၵေႃႉ ဢွၼ်ၵၼ်ပၢႆႈၽေးမႃးသွၼ်ႈဝႆႉတီႈသီႇပေႃႉ ဝႃႈၼႆ။
တႄႇဢဝ် ဝၼ်းတီႈ 16-18/07/2018 ၶၢဝ်းတၢင်း 3 ဝၼ်းမႃးၼႆႉ ၵူၼ်းဝၢၼ်ႈ ဢိူင်ႇပၢင်လူင် တင်းဢိူင်ႇဝၢၼ်ႈၸၢမ် လႄႈ မိူင်းမူႉ ဢွၼ်ၵၼ်ပၢႆႈၽေးမႃးသွၼ်ႈသဝ်းဝႆႉ တီႈဝတ်ႉဢွင်ႇမင်ႇၵလႃႇၽူဝ်းတေႃႇ တင်း ဢိူင်ႇတႃႈတေႈ ၸႄႈ ဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။
ၸၢႆးလၢဝ်သႅင် ၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်း 3 ဝၼ်းမႃးၼႆႉ ၵူၼ်း ပၢႆႈၽေးႁွတ်ႈတီႈသီႇပေႃႉၼႆႉ မီးဝႆႉယူႇ 2 တီႈ။ ပဵၼ်တီႈဝတ်ႉၽူဝ်းတေႃႇတင်း တီႈဢိူင်ႇတႃႈတေႈ ။ ၵူၼ်းမိူင်းဢၼ် ပၢႆႈမႃးသွၼ်ႈသဝ်းဝႆႉတီႈ ဝတ်ႉၽူဝ်းတေႃႇသမ်ႉ ပဵၼ်ၵူၼ်းဝၢၼ်ႈပၢင်လူင်။ တီႈဢိူင်ႇတႃႈတေႈသမ်ႉ ပဵၼ်ၵူၼ်း ၼႂ်း ဢိူင်ႇဝၢၼ်ႈၸၢမ်လႄႈ မိူင်းမူႉ” ဝႃႈၼႆ။
ၵူၼ်းပၢႆႈၽေး ဢၼ်ဢွၼ်ၵၼ်ပၢႆႈႁွတ်ႈၽႅဝ်ဝႆႉတီႈဝတ်ႉဢွင်ႇမင်ႇၵလႃႇၽူဝ်းတေႃႇ တင်းမူတ်း 138 ၵေႃႉ။
လိူဝ်ၼၼ်ႉ တီႈဢိူင်ႇတႃႈတေႈ ၸႄႈဝဵင်းသီႇပေႃႉသမ်ႉ မီး 535 ၵေႃႉ ဝႃႈၼႆ။
