ၾၢႆႇပႂ်ႉတူၺ်းလိူၼ်လၢဝ်လႄႈၵၢင်ႁၢဝ်မိူင်းထႆးပိုၼ်ၽၢဝ်ႇဝႃႈ ၶမ်ႈၶိုၼ်းဝၼ်းတီႈ 12/08/2025 ၼႆႉၾူၼ်လၢဝ် တေတူၵ်း (ၶီႈလၢဝ်ယွတ်ႇပဵၼ်မူႇ) ဝႃႈၼႆ။

သင်ဝႃႈ ဢမ်ႇမီးၽႃႈၾူၼ်ၸိုင် ၾူၼ်လၢဝ်တူၵ်း ၶီႈလၢဝ်ယွတ်ႇ ၶိုၼ်းၼႆႉ ၵူၼ်းယူႇမိူင်းထႆး တေၸၢင်ႈႁၼ် လႆႈလီလီ။ ၼိုင်ႈၸူဝ်ႈမူင်း တေယွတ်ႇထိုင် 200 လုၵ်ႈၸိူဝ်းၼႆႉ။ တေတႄႇ ယွတ်ႇယၢမ်းၵၢင်ၶိုၼ်း 11 မူင်း ၊ တေယွတ်ႇပဵၼ်ၸုပ်ႈ ပဵၼ်ၸုပ်ႈ တေႃႇထိုင်ယၢမ်းၵၢင်ၼႂ်ဢႃႇရုင်ႇၶိုၼ်ႈသၢႆလႅင်းပိူင်းၸိူဝ်းၼႆႉ။ သင်ဝႃႈ တင်ႈၸႂ်ပႂ်ႉတူၺ်း တေလႆႈႁၼ်လီငၢမ်းဝႃႈၼႆ။

ၾူၼ်လၢဝ်တူၵ်း Perseid ၽိူဝ်ႊသဵတ်ႉၼႆႉ တီႈတႄႉမၼ်းပဵၼ်သၢၵ်ႈၸၢၵ်ႇလၢဝ်ပွမ် Swift-Tuttle ၸိူဝ်းၶဝ်ႈမႃး ၼႂ်းဝူင်းလဵပ်ႈသဵၼ်ႈတၢင်းဢၼ် လုမ်ႈၾႃႉပၼ်ႇ တႃဝၼ်း – ၵႆႉႁူပ်ႉ ႁၼ်ၵၼ် ၼိုင်ႈပီၼိုင်ႈပွၵ်ႈ။ ၽွင်းလတ်းၽၢၼ်ႇၵၼ်ၼၼ်ႉ ယူႇတီႈလုမ်ႈၾႃႉသေႁၼ်မႅၼ်ႈ သၢၵ်ႈၸၢၵ်ႇလၢဝ်ပွမ်ၸိူဝ်းၼႆႉ သၢႆလႅင်းတႃဝၼ်းပိူင်းသႂ်ႇလႄႈ ယဵၼ်းပဵၼ်ၵွၼ်ႈၾႆး၊ ၸင်ႇလႆႈႁၼ် ပဵၼ်ၶီႈလၢဝ်ယွတ်ႇ ဢမ်ႇထၢတ်ႇ ၼိုင်ႈၵမ်းတေလႆႈႁၼ် 4-5 လုၵ်ႈ – တႅမ်ႈတၢင်ႇဝႆႉၼင်ႇၼႆ။

ၾူၼ်လၢဝ် Perseid ၼႆႉ တူၵ်းၼိုင်ႈပီ ၼိုင်ႈပွၵ်ႈ- ၵူႈပီ ဝၢႆးလင်လိူၼ်ၵဝ်ႈမူၼ်း ဝၼ်းသွင်ဝၼ်း။ ၵမ်ႈၼမ်တေပဵၼ်ၼႂ်းဝၼ်းတီႈ 17 လိူၼ်ၵျူႊလၢႆႊၼႆႉ တေတူၵ်းၼမ်သုတ်း။ မၢင်ပီ သင်ဝႃႈမီးၼမ် တေၵႆႉလႆႈႁၼ် ၶိုၼ်းဢိတ်းဢိတ်း တူၵ်းဢမ်ႇထၢတ်ႇ တေႃႇထိုင်ဝၼ်းတီႈ 24 လိူၼ်ဢေႃႊၵတ်ႉသ် ၸိူဝ်းၼႆႉ ၸင်ႇႁၢႆ ဝႃႈၼႆ။ 

ၾၢႆႇလူင်ႉလႅၼ်ႇၵၢင်ႁၢဝ်လႄႈလိူၼ်လၢဝ်ၶဝ်တႄႉတႅမ်ႈဝႆႉဝႃႈ – ၾူၼ်လၢဝ်တူၵ်းၼႆႉ ဢမ်ႇမီးလွင်ႈတုမ်ႉတိူဝ်ႉတေႃႇလုမ်ႈၾႃႉမိူင်းၵူၼ်းသင်။ တေပဵၼ်တၢင်းႁၢင်ႈလီသၽႃႇဝ တႃႇ ၵူၼ်းလႆႈႁၼ် မဵဝ်းၼိုင်ႈၵူၺ်း။ မၼ်းဢမ်ႇၶဝ်ႈမႃးၼႂ်းသဵၼ်ႈတၢင်းလုမ်ႈၾႃႉပၼ်ႇမုၼ်လႄႈ ဢမ်ႇၸၢင်ႈတူၵ်းမႃးထိုင်မိူင်းၵူၼ်းလႆႈ ၵွပ်ႈၼႆ ဢမ်ႇမီးၽေးတေႃႇၵူၼ်း။ တၢင်းဝႆးမၼ်းတႄႉ တေပဵၼ် 37 လၵ်း (59 ၵီႊလူဝ်ႊမီႊတႃႊ) တေႃႇၸႅၵ်ႊၵၢၼ်ႉ – ဝႃႈၼႆ။