ၶွင်ႊသီႊၵိူဝ်းၵုမ်ႇၵဵဝ်ႇလူၺ်ႈမိူင်းမၢၼ်ႈ SAC-M ဢွၵ်ႇၽိုၼ်ႁၢႆးငၢၼ်းဝႃႈ – ၶွမ်ႊမၼီႊ China South မိူင်းၶႄႇ ၸွႆထႅမ်ပၼ်ႁူင်းၸၢၵ်ႈႁဵတ်းဢွၵ်ႇၶိူင်ႈၾၢႆႇၵႅတ်ႇၶႄ ၶွင်ၸုမ်းသိုၵ်းမၢၼ်ႈ (ကပစ ၂၁) တႃႇႁႂ်ႈသိုၵ်းမၢၼ်ႈမီးမၢၵ်ႇလူင်တႃႇႁိူဝ်းမိၼ်လူင်းၼႂ်းဝၢၼ်ႈၼႂ်းဝဵင်း ဝႃႈၼႆ။

ၽိုၼ်လိၵ်ႈႁၢႆးငၢၼ်းၼႆႉဢွၵ်ႇမႃးဝၼ်းတီႈ 16/07/2025 ၼၼ်ႉမီးႁူဝ်ၶေႃႈဝႃႈ – ႁူင်းၸၢၵ်ႈ မရၼ- မိူင်းၶႄႇၸွႆႈထႅမ်သိုၵ်းမၢၼ်ႈ တႃႁဵတ်းၶိူင်ႈမၢၵ်ႇဢၼ်ဢဝ်ႁိူဝ်းမိၼ်သိုၵ်းယိုဝ်း – ၼႆသေ မီးပႃးသၢၵ်ႈသေႇလၵ်းထၢၼ်ၵူႈၸိူဝ်ႉၵူႈလွင်ႈ။

ဢၼ်မႃးၵမ်ႉၸွႆႈသိုၵ်းမၢၼ်ႈတႃႇႁႂ်ႈပူၼ်ႉပႅၼ်သုၼ်ႇလႆႈၵူၼ်းႁၢႆႉႁႅင်းယူႇမိူင်းမၢၼ်ႈၼႆႉပဵၼ်ၶွမ်ႊပၼီႊ China South လႄႈ ၶွမ်ႊပၼီႊ Hunan Vanguard ဢိၵ်ႇ ၶွမ်ႊပၼီႊ Chongqing Changan ။ ၸိူဝ်းၶဝ်ၼႆႉမႃးၸွႆႈပၼ်ၾၢႆႇထႅၵ်ႊၼီႊၶိူဝ်ႊတႃႇႁဵတ်းဢွၵ်ႇမၢၵ်ႇလႄႈမႃးသွၼ်ပၼ်ပႃးၵူၼ်းၼႂ်းႁူင်းၸၢၵ်ႈသိုၵ်းမၢၼ်ႈၼၼ်ႉ ၵူႈၸိူဝ်ႉၵူႈလွင်ႈဝႃႈၼႆ။

ႁူင်းၸၢၵ်ႈႁဵတ်းဢွၵ်ႇမၢၵ်ႇမိုဝ်ႈၸိုၼ်းယၢမ်းမၢၵ်ႇၵွင်ႈလူင် (ကပစ ၂၁) ၼႆႉ မီးၼႂ်းၸႄႈဝဵင်းသဵၵ်ႉၽိဝ်ႇ တိူင်းမၵူၺ်း။ ႁူင်းၸၢၵ်ႈၼၼ်ႉႁဵတ်းဢွၵ်ႇ မၢၵ်ႇလူင်သႅၼ်း 500 ပွင်ႇ (250 Kg FAE) ၸိူဝ်းၼႆႉ ၼႂ်းၽိုၼ်ႁၢႆးငၢၼ်းၼၼ်ႉပႃးဝႆႉၼင်ႇၼႆ။

တီႈႁူင်းၸၢၵ်ႈၼႆႉ ၸဵမ်မိူဝ်ႈပီၵၢႆပီဢွၼ် မီးၽူႈလူင်ႉလႅၼ်ႇတၢင်းႁူႉလွင်ႈမၢၵ်ႇၵွင်ႈၸိုၼ်းယၢမ်း ၸၢဝ်းၶႄႇၶဝ် မႃးၵုမ်းသေၸွႆႈႁဵတ်းပၼ်ယူႇၼႆၵူၼ်းပိုၼ်ႉတီႈလၢတ်ႈဝႆႉတီႈသိုဝ်ႇၶၢဝ်ႇမၢၼ်ႈ ပီႇပီႇသီႇ ၼင်ႇၼႆ။

သိုၵ်းမၢၼ်ႈၼႆႉ မီးႁူင်းၸၢၵ်ႈႁဵတ်းဢွၵ်ႇမၢၵ်ႇၵွင်ႈၸိုၼ်းယၢမ်းတင်းမူတ်းမီး 25 ႁူင်း။ မီးတၢင်းဢွၵ်ႇၵေးၼမ်ႉၵဵဝ် 9 ဢၼ် မီးတၢင်းတူၵ်းၵေးၼမ်ႉၵဵဝ် 16 ဢၼ်။ ႁူင်းၸၢၵ်ႈ (ကပစ ၂၁ )ၼႆႉ ပဵၼ်ႁူင်းၸၢၵ်ႈယႂ်ႇ ဢၼ်ႁဵတ်းပၼ်မၢၵ်ႇၵွင်ႈလူင် တႃႇၶိူင်ႈၵွင်ႈလူင်လႄႈႁိူဝ်းမိၼ်သိုၵ်း ၸဵမ်ၸိူဝ်းၼႆႉ ၼႆ သိုၵ်းမၢၼ်ႈ CDM လၢတ်ႈတီႈသိုဝ်ႇၶၢဝ်ႇပီႇပီႇသီႇဝႆႉၼင်ႇၼႆ။