ၽွင်းလူင် ၾၢႆႇဢဵၼ်ႁႅင်းၵူၼ်းႁဵတ်းၵၢၼ် မိူင်းၶိဝ်းပႃး (Cuba) လႆႈထွၼ်တူဝ်ဢွၵ်ႇတၼ်းႁဵင်း ယွၼ်ႉမၼ်းၼၢင်းလၢတ်ႈဝႃႈ မိူင်းၶိဝ်းပႃး ဢၼ်ၸႂ်ႉတိုဝ်းပိူင်ၶွမ်ႊမိဝ်ႊၼိတ်ႉသေ ဢုပ်ႉပိူင်ႇၽွင်းငမ်းဝၢၼ်ႈမိူင်းၼႆႉ ဢမ်ႇမီးၵူၼ်းယွၼ်း ဝႃႈၼႆ။
မၼ်းၼၢင်းလၢတ်ႈၵႂႃႇ တီႈၼႂ်းပၢင်ၵုမ်သၽႃး (ပႃႊလီႊမၢၼ်ႇ) ဝႃႈ – ၼႂ်းမိူင်းၶိဝ်းပႃးၼႆႉ ဢမ်ႇမီးၵူၼ်းယွၼ်း။ မီးၵူၼ်းၸိူဝ်းၶႂ်ႈႁႃငိုၼ်း လူၺ်ႈလၢႆးငၢႆႈသေ ဢွၼ်ၵၼ်ၵႂႃႇၵဵပ်းဢဝ်ၶူဝ်းၶွင် ၸွမ်းၵွင်ယုၵ်းယၢၵ်းၵူၺ်း ဝႃႈၼႆ။
လွင်ႈၼႆႉ ႁဵတ်းႁႂ်ႈၵူၼ်းမိူင်းၶိဝ်းပႃး ၸိူဝ်းယူႇသဝ်းၼႂ်းမိူင်းၼွၵ်ႈမိူင်း ဢွၼ်ၵၼ်ထတ်းသၢင်ၼိူဝ် မၼ်းၼၢင်းႁၢဝ်ႈႁႅင်း၊ ၶေႃႈၵႂၢမ်းလၢတ်ႈၽွင်းလူင်ၼႆႉ ပဵၼ်ဢၼ်လူလၢႆၼိူဝ်ၵူၼ်းမိူင်းၼႆသေ ၵူၼ်းၸိူဝ်းတူင်ႉၼိုင် ၼႂ်းတူင်ႇဝူင်းၵူၼ်းလႄႈ ၵူၼ်းၼုမ်ႇ ၸိူဝ်းမီးပၺ်ႇၺႃႇတၢင်းႁူႉၶဝ်ႁူမ်ႈၵၼ်သေ တႅမ်ႈလိၵ်ႈတုၵ်းယွၼ်း ႁႂ်ႈမၼ်းၼၢင်းထွၼ်တူဝ်ဢွၵ်ႇတၼ်းႁဵင်း။ ဝၢႆးလင်ၼၼ်ႉ မၼ်းၼၢင်း ပိုၼ်ၽၢဝ်ႇထွၼ်တူဝ်ဢွၵ်ႇတၼ်းႁဵင်း ဝႃႈၼႆ။
ယၢမ်းလဵဝ် မိူင်းၶိဝ်းပႃးၼၼ်ႉ လႆႈႁူပ်ႉပၼ်ႁႃ ၵၢၼ်ပၢႆးမၢၵ်ႈမီးၵပ်ႉၵိၼ်း၊ လွင်ႈၵွတ်းၽၢၼ်လႄႈ ၶဝ်ႈၼမ်ႉတၢင်းၵိၼ်ၶၢတ်ႇ/ ဢမ်ႇၵုမ်ႇထူၼ်ႈၸိူဝ်းၼႆႉၵေႃႈ ႁၢဝ်ႈႁႅင်းဝႆႉ။
လူင်ပွင်ၸိုင်ႈ မိူင်းၶိဝ်းပႃး ဢမ်ႇယၢမ်ႈပိုၼ်ၽၢဝ်ႇ ႁူဝ်ၼပ်ႉၵူၼ်းယွၼ်းဝႆႉတႅတ်ႈတေႃးသေတႃႉ ယွၼ်ႉၵၢၼ်ပၢႆးမၢၵ်ႈမီး ဝၢၼ်ႈမိူင်းၵပ်ႉၵိၼ်းႁႅင်းလႄႈ ၸုမ်းပၵ်းတႃလဵပ်ႈႁဵၼ်းၶဝ်တႄႉ လၢတ်ႈဝႃႈႁူဝ်ၼပ်ႉၵူၼ်းယွၼ်း တေတိူဝ်းၼမ်ၶိုၼ်ႈမႃးယူႇ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ