သၢႆလူမ်းမႆႈ (အပူလှိုင်း) ၼႂ်းပိုၼ်ႉတီႈၵမ်ႈၼမ် ၼႂ်းၵုၼ်ယူႊရူပ်ႊ ပုင်ႈၶိုၼ်ႈသုင်ႁႅင်းလႄႈ ၽူႈမီးပုၼ်ႈၽွၼ်း လၢႆၸိုင်ႈမိူင်း ဢွၼ်ၵၼ်ပိုၼ်ၽၢဝ်ႇပၼ်ၾၢင်ႉဝႆႉ ၵဵဝ်ႇလူၺ်ႈႁႅင်းလူမ်ႈမႆႈ။

တီႈၼႂ်းမိူင်းသပဵၼ်ႇပွတ်းၸၢၼ်းၼၼ်ႉ ႁႅင်းလူမ်းမႆႈၶိုၼ်ႈထိုင် 40 တီႊၵရီႊၸိၼ်ႊတီႊၵရိတ်ႊ၊ ပိုၼ်ႉတီႈဢၼ်ႁႅင်းလူမ်းမႆႈ ၶိုၼ်ႈသုင်လိူဝ်ပိူၼ်ႈသုတ်းသမ်ႉ ပဵၼ်ႁိမ်းသႃႊပီႊလႃႊ။ လိူၼ်ၵျုၼ်ႊ ပီၼႆႉ ပဵၼ်လိူၼ်ဢၼ်မႆႈႁႅင်းလိူဝ်ပိူၼ်ႈသုတ်း ၼႂ်းမိူင်းသပဵၼ်ႇ – ႁွင်ႈၵၢၼ် ၾၢႆႇၾိင်ႈၾႃႉရႃႇသီႇ မိူင်းသပဵၼ်ႇ ပိုၼ်ၽၢဝ်ႇဝႆႉၼင်ႇၼႆ။

သၢႆလူမ်းမႆႈၼႆႉ လိူဝ်သေတီႈၼႂ်းမိူင်းသပဵၼ်ႇယဝ်ႉ မိူၼ်ၼင်ႇ တီႈမိူင်းၾရင်ႇသဵတ်ႈ၊ မိူင်းဢေႃႊသတြေႊလီႊယိူဝ်ႊ၊ ပႄႊၵျီႊယမ်ႊ၊ ပွတ်ႉသ်သၼီးယႃး၊ ႁႃႊသီႊၵူဝ်ႊပီႊၼႃႊ၊ ႁၢၼ်ႊ ၵေႊရီႊ၊ သႃႊပီႊယိူဝ်ႊ၊ သလူဝ်ႊပေႊၼီႊယိူဝ်ႊ၊ သုၺ်ႊၸႃႊလၼ်ႊ ၸိူဝ်းၼႆႉၵေႃႈ ပဵၼ်ဢၼ်ၶိုၼ်ႈသုင်ဝႆႉ။ မိူၼ်ၼင်ႇ တီႈမိူင်းပေႃႊတူႊၵီႊ၊ ဢီႇတလီႇလႄႈ ပိုၼ်ႉတီႈၵမ်ႈၽွင်း ၼႂ်းၶရူဝ်ႇဢေးသျႃးၸိူဝ်းၼႆႉ လႆႈပိုၼ်ၽၢဝ်ႇမၵ်းမၼ်ႈ ပဵၼ်ၸၼ်ႉသီလႅင်ဝႆႉ။

တီႈဝဵင်းလူင်ပႃႇသီႇလူဝ်ႇၼႃႇ မိူင်းသပဵၼ်ႇၼၼ်ႉ ယွၼ်ႉႁႅင်းလူမ်းမႆႈၶိုၼ်ႈသုင်လႄႈ မိူဝ်ႈဝၼ်းတီႈ 28 လိူၼ်ၵျုၼ်ႊၼၼ်ႉ ၼၢင်းယိင်း ဢၼ်ႁဵတ်းလွင်ႈမူတ်းသႂ်ၸွမ်းသဵၼ်ႈတၢင်း လူႉတၢႆၵႂႃႇ ၵေႃႉၼိုင်ႈ။

ၸုမ်းမေႃယႃၶဝ်လၢတ်ႈဝႃႈ – ၵူၼ်းၸိူဝ်းဢႃယုယႂ်ႇ၊ ၵူၼ်းပဵၼ်ၵႅၼ်ႊသိူဝ်ႊလႄႈ ၵူၼ်းႁၢမ်းတီႈယူႇႁိူၼ်းယေး ၸိူဝ်းၼႆႉ လႆႈၶၢမ်ႇတၢမ်ႇသၢႆလူမ်းမႆႈ ၼမ်လိူဝ်ပိူၼ်ႈ။ ၵွပ်ႈၼၼ် ၽွင်းႁႅင်းလူမ်းမႆႈ ၶိုၼ်ႈႁႅင်းၼၼ်ႉ ထုၵ်ႇလီငိူင်ႉဝႄႈ လွင်ႈဢွၵ်ႇၼွၵ်ႈႁိူၼ်း ဝႃႈၼႆ။