ဝၼ်းတီႈ 07/04/2025 ယၢမ်းၵၢင်ၼႂ် တပ်ႉပႂ်ႉၾင်ႇၼမ်ႉပၢင်ႇလၢႆႇ မိူင်းၵျပၼ်ႊ ပိုၼ်ၽၢဝ်ႇဝႃႈ ၶိူင်ႈမိၼ် ၾၢႆႇၸွႆႈထႅမ်ၵူၼ်းပဵၼ် လမ်းၼိုင်ႈ ယၢတ်ႇတူၵ်းၼႂ်းပၢင်ႇလၢႆႇ ၸဵင်ႇၸၢၼ်းဝၼ်းတူၵ်း မိူင်းၵျပၼ်ႊ မီးၵူၼ်းလူႉတၢႆ 3 ၵေႃႉ ဝႃႈၼႆ။

ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉဝႃႈ ထူပ်းႁၼ်တူဝ်တၢႆ ၵူၼ်းသၢမ်ၵေႃႉ။ ၸိူဝ်းၶဝ်ပဵၼ် မေႃယႃလူင်၊ ၵူၼ်းပဵၼ်လႄႈ ၵူၼ်းပႂ်ႉလုမ်းလႃးၵူၼ်းပဵၼ် ဝႃႈၼႆ။

လိူဝ်ၼၼ်ႉ လႆႈၸွႆႈထႅမ် ၽူႈၶပ်းၶိူင်ႈမိၼ်၊ ၼၢင်းမေႃယႃလႄႈ ၽူႈႁၢပ်ႇၵၢၼ်ၾၢႆႇမႄးၶိူင်ႈၸၢၵ်ႈ ၶိူင်ႈမိၼ် ႁူမ်ႈသဵၼ်ႈတင်းမူတ်း 3 ၵေႃႉ။ မိူဝ်ႈၽွင်းလႆႈၶၢဝ်ႇဝႃႈ ၶိူင်ႈမိၼ်တူၵ်းၼႂ်းပၢင်ႇလၢႆႇၼၼ်ႉ တပ်ႉပႂ်ႉၾင်ႇ ၼမ်ႉပၢင်ႇလၢႆႇၵျပၼ်ႊ လႆႈသူင်ႇၶိူင်ႈမိၼ် 2 လမ်းတင်း ႁိူဝ်း 3 လမ်း ၵႂႃႇၸွႆႈထႅမ်။

ယွၼ်ႉသင်သေ ၶိူင်ႈမိၼ်ယၢတ်ႇတူၵ်းၼႆတႄႉ ပႆႇလႆႈႁူႉတႅတ်ႈတေႃး၊ တိုၵ်ႉသိုပ်ႇၵူတ်းထတ်းဝႆႉယူႇ ဝႃႈၼႆ။

ၶိူင်ႈမိၼ်လမ်းၼႆႉ တၢင်ႇၵူၼ်းပဵၼ် ၼၢင်းယိင်းဢႃယု 86 ပီ လုၵ်ႉတီႈၼႃႇၵႃႇသႃႇၵီႇသေ တေဢၢၼ်းၵႂႃႇ တီႈႁူင်းယႃဢၼ်ၼိုင်ႈ တီႈၽူႇဢူႇဢူဝ်ႇၵႃႇ၊ လႆႈယၢတ်ႇတူၵ်းၵႂႃႇပွတ်းတၢင်းၼႆ – ယူႇတီႈ People’s Spring ဢွၵ်ႇဝႆႉၼင်ႇၼႆ။