ဝၼ်းတီႈ 03/03/2025 ယၢမ်းၵၢင်ၼႂ် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ လုၵ်ႉတီႈဝၢင်းၶိူင်ႈမိၼ် ၼေႇပျီႇတေႃႇ ဢွၵ်ႇၶၢဝ်းတၢင်းၵႂႃႇမိူင်းရတ်ႉသျႃး ၸွမ်းၼင်ႇ ၸွမ်ၸိုင်ႈမိူင်းရတ်ႉသျႃး မွၵ်ႇထိုင်မႃး လူၺ်ႈပဵၼ် တၢင်းၵၢၼ် ဝႃႈၼႆ။

လွင်ႈဢွၵ်ႇၶၢဝ်းတၢင်းပွၵ်ႈၼႆႉ ပဵၼ်ပွၵ်ႈၵမ်းႁႅၵ်ႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ ဝၢႆးၺႃးလုမ်းတြႃး မိူင်းဢႃႊၵျိၼ်ႊတီႊၼိူဝ်ႊ ပိုၼ်ၽၢဝ်ႇတီႉၺွပ်းတူဝ် လူၺ်ႈၽဵဝ်ႈမူၺ်ႉၶႃႈႁႅမ် ၵူၼ်းၶိူဝ်းရူဝ်ႊႁိၼ်ႊၵျႃႊ။

သိုဝ်ႇၶၢဝ်ႇ တႂ်ႈသိုၵ်းမၢၼ်ႈ ၵုမ်းၵမ် Global News Light of Myanmar ႁၢႆးငၢၼ်းဝႆႉ ၼႂ်းဝၼ်းတီႈ 2 ၼႆႉဝႃႈ – ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ တေႁူပ်ႉထူပ်းၵၼ်တင်း ၸွမ်ၸိုင်ႈမိူင်းရတ်ႉသျႃး ပလႃႊတီႊမီႊယႃႊ ပူႊတိၼ်ႊလႄႈ ၽူႈမီးၸၼ်ႉသုင် ၼႂ်းၸုမ်းလူင်ပွင်ၸိုင်ႈမိူင်းရတ်ႉသျႃး တေဢုပ်ႇၵုမ်ၵၼ်လွင်ႈ ၵၢၼ်ပၢႆးမၢၵ်ႈမီး၊ လွင်ႈႁူမ်ႇလူမ်ႈလႄႈ လွင်ႈၵပ်းသိုပ်ႇၼႂ်းၵႄႈၵၢင် သွင်ၸိုင်ႈမိူင်း ဝႃႈၼႆ။

မိူဝ်ႈဝၼ်းတီႈ 23 လိူၼ်ၾႅပ်ႊပိဝ်ႊရီႊၼၼ်ႉ ႁွင်ႈၵၢၼ်ၽွင်းလူင်ၾၢႆႇႁုၼ်ႈမုၼ်းၶိုၼ်းယႂ်ႇ ၵၢၼ်ပၢႆးမၢၵ်ႈမီး မိူင်းရၢတ်ႉသျႃး ပိုၼ်ၽၢဝ်ႇဝႆႉဝႃႈ – ရတ်ႉသျႃး လႆႈလူင်းလၢႆးမိုဝ်းၵၼ်တင်းသိုၵ်းမၢၼ်ႈ တႃႇတေလူင်းတိုၼ်း လၢင်း ၼႂ်းၶူင်းၵၢၼ်ပၢႆးမၢၵ်ႈမီးၶိုၵ်ႉတွၼ်း တႃႈဝၢႆ (ထားဝယ်)၊ တႃႇတေၵေႃႇသၢင်ႈ ႁူင်းႁုင်ၼမ်ႉမၼ်းမဵၼ်လႄႈ တႃႈႁိူဝ်းၼမ်ႉလိုၵ်ႉ မိူင်းမၢၼ်ႈ ၸိူဝ်းၼႆႉ။

ဝၢႆးလင်လူင်းလၢႆးမိုဝ်းယဝ်ႉ မိူင်းရတ်ႉသျႃး ၸင်ႇမွၵ်ႇထိုင် ၸွမ်ၸိၵ်းသိုၵ်းမၢၼ်ႈ မႃးၼင်ႇၼႆ။

ၽူႈလဵပ်ႈႁဵၼ်းၵၢၼ်မိူင်း ဢူးတၢၼ်းၸူဝ်းၼႅင်ႇ လၢတ်ႈဝႃႈ – မိူဝ်ႈၽွင်းလွင်ႈၵမ်ႉထႅမ်မိူင်းၶႄႇ တူၵ်းလူင်း ယူႇၼႆႉ သိုၵ်းမၢၼ်ႈ ၸင်ႇၶတ်းၸႂ် ၶဝ်ႈဢွၵ်ႇမိူင်းရတ်ႉသျႃး – ဝႃႈၼႆ။

ၵၢၼ်ဢွၵ်ႇၶၢဝ်းတၢင်း ႁူဝ်ၼႃႈသိုၵ်းမၢၼ်ႈ ၵႂႃႇမိူင်းရတ်ႉသျႃးပွၵ်ႈၼႆႉ ပဵၼ်ပွၵ်ႈၵမ်း 4 ။ ၸွမ်ၸိၵ်း သိုၵ်း မၢၼ်ႈၼႆႉ လႆႈႁူပ်ႉၵၼ်တင်း ၸွမ်ၸိုင်ႈမိူင်းရတ်ႉသျႃး ၵမ်းဢွၼ်တၢင်းသုတ်း မိူဝ်ႈလိူၼ်သႅပ်ႊထႅမ်ႊပိူဝ်ႊ ပီ 2022 ပူၼ်ႉမႃးၼၼ်ႉ။

တႄႇမႃးၸဵမ်မိူဝ်ႈပၢၼ် ဢူးၼေႇဝိၼ်း ပဵၼ်လူင်ပွင်ၸိုင်ႈသိုၵ်းၼၼ်ႉ လူင်ပွင်ၸိုင်ႈမိူင်းရတ်ႉသျႃး ပဵၼ်ဢူၺ်းလီၵၼ်တင်း လူင်ပွင်ၸိုင်ႈသိုၵ်းမၢၼ်ႈ ပၢၼ်သိုပ်ႇပၢၼ်။ ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇ ထႅင်ႈၵမ်းၼႆႉ လွင်ႈၶဝ်ႈဢွၵ်ႇၵပ်းသိုပ်ႇ သွင်ၸိုင်ႈမိူင်း ယိင်ႈၶႅၼ်းတိူဝ်းၸမ်ၸႂ်ၵၼ် မႃးလိူဝ်သေၵဝ်ႇ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။