ၼႂ်းဝၼ်းၵေႃႇတင်ႈ ၵၢၼ်ၽွင်းတၢင် ၵႄႈၵၢင်သွင်ၸိုင်ႈမိူင်း တဵမ်ၶၢဝ်းတၢင်း (25) ပီၼၼ်ႉ လူင်ပွင်ၸိုင်ႈ မိူင်းပႄႊလႃႊရူပ်ႊ တႅမ်ႈလိၵ်ႈသူင်ႇယိုၼ်ႈထိုင် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ – ၶၢဝ်ႇ Belta News ႁၢႆးငၢၼ်းဝႆႉၼင်ႇၼႆ။

ၼႂ်းၽိုၼ်လိၵ်ႈၼၼ်ႉ ပႃးဝႆႉဝႃႈ – ၼႂ်းၶၢဝ်းတၢင်း လၢႆပီပူၼ်ႉမႃးၼႆႉ သွင်ၸိုင်ႈမိူင်း လႆႈၶတ်းၸႂ်ႁဵတ်းသၢင်ႈ၊  ႁႂ်ႈလွင်ႈၵပ်းသိုပ်ႇမၼ်ႈၵိုမ်းၼႅၼ်ႈၼႃ။ တႃႇတေသိုပ်ႇဢုပ်ႇၵုမ် ဝၢင်းၽႅၼ်ၵၢၼ်ငၢၼ်းၵႂႃႇမိူဝ်းၼႃႈထႅင်ႈ ၼၼ်ႉၵေႃႈ မိူင်းပႄႊလႃႊရူပ်ႊ ႁူမ်ၸူမ်းႁပ်ႉတွၼ်ႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဝႆႉယူႇ – ဝႃႈၼႆ။

မိူင်းပႄႊလႃႊရူပ်ႊၼႆႉ ပဵၼ်မိူင်းဢၼ်ဢမ်ႇတိတ်းၸွမ်း ၾင်ႇၼမ်ႉပၢင်ႇလၢႆႇ၊ လႅၼ်လိၼ်တိတ်းၸပ်း မိူင်းရတ်ႉသျႃႊလႄႈ မိူင်းယူႊၶရဵၼ်ႊ။ ၵွၼ်ႇပႆႇထိုင်ပီ 1991 ၼၼ်ႉ ပဵၼ်မိူင်းဢၼ်ယူႇဝႆႉ ၼႂ်းမိူင်းႁူမ်ႈတုမ် သူဝ်ႊပီႊယႅတ်ႊ မိူင်းၼိုင်ႈ။

ဢလႅတ်ႉသႅၼ်းတႃႊ လူႊၵႃႊသျႅၼ်ႊၵူဝ်ႊ ၽူႈဢွၼ်ႁူဝ် မိူင်းပႄႊလႃႊရူပ်ႊၼႆႉ ဢွၼ်ႁူဝ်ဝၢၼ်ႈမိူင်းမႃး တႄႇဢဝ်ပီ 1994 တေႃႇထိုင်ယၢမ်းလဵဝ်သေ ပဵၼ်မိူင်းၸဝ်ႈဢႃႇၼႃႇ ဢၼ်ၵိုတ်းဝႆႉ လိုၼ်းသုတ်းပိူၼ်ႈ မိူင်းၼိုင်ႈ တီႈၼႂ်းၵုၼ်ယူႊရူပ်ႊ။

ၾၢႆႇၼိုင်ႈၵေႃႈ လူင်ပွင်ၸိုင်ႈ မိူင်းပႄႊလႃႊရူပ်ႊၼႆႉ မီးလွင်ႈတဵၵ်းတဵင်သုၼ်ႇလႆႈသုၼ်ႇပဵၼ် ၵူၼ်းမိူင်း၊ ပိၵ်ႉဢိုတ်းႁႄႉႁၢမ်ႈ ၵၢၼ်သိုဝ်ႇၶၢဝ်ႇဝႆႉႁၢဝ်ႈႁႅင်းလႄႈ ၺႃးလၢႆမိူင်းထတ်းသၢင်ဝႆႉယူႇ – ၼႆယဝ်ႉ။

မိူဝ်ႈၼႂ်းပီ 2023 ၼၼ်ႉ သိုၵ်းမၢၼ်ႈ တိူဝ်းၶႂၢၵ်ႈပိုတ်ႇၽုၺ်ႇလုမ်းငဝ်ႈငုၼ်း ၽွင်းတၢင်မၢၼ်ႈ တီႈမိူင်းပႄႊလႃႊရူပ်ႊ။ လိူဝ်ၼၼ်ႉ မိူဝ်ႈၸၢတ်ႈၸိုင်ႈလုမ်ႈၾႃႉ သႄႉသွမ်းလွင်ႈသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း ၼၼ်ႉၵေႃႈ မိူင်းပႄႊလႃႊရူပ်ႊ ဢမ်ႇၵမ်ႉထႅမ်ၸွမ်း – ဝႃႈၼႆ။ ၸွမ်းၼင်ႇ ၽူႈပၵ်းတႃပႂ်ႉတူၺ်းၶဝ်သေ လႆႈႁူႉဝႃႈ မိူင်းပႄႊလႃႊရူပ်ႊၼႆႉ ပဵၼ်မိူင်းဢၼ်ၶၢႆၶိူင်ႈယိပ်းၵွင်ႈၵၢင်ႇပၼ် သိုၵ်းမၢၼ်ႈ မိူင်းၼိုင်ႈ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။