သိုၵ်းရၶႅင်ႇ ယိုၼ်ယၼ်လၢတ်ႈဝႃႈ ယိုတ်းၵုမ်းလႆႈ ၸႄႈဝဵင်းတွင်ႇၵူၵ်ႉထႅင်ႈ တင်းဝဵင်းယဝ်ႉ ဝႃႈၼႆ။

ပူၼ်ႉမႃး ဝၼ်းတီႈ 14/12/2024 ယၢမ်းႁူဝ်ၶမ်ႈ သိုၵ်းရၶႅင်ႇ AA လေႃႇတိုၵ်း သိုၵ်းမၢၼ်ႈ ၸၵၶ 5 ဢၼ် ၵိုတ်းဝႆႉတပ်ႉလဵဝ် တီႈၸႄႈဝဵင်းတွင်ႇၵူၵ်ႉ ၸႄႈမိူင်းရၶႅင်ႇ ဝၢႆးၼၼ်ႉ သိုပ်ႇလမ်းတိုၵ်း သိုၵ်းမၢၼ်ႈ ၸိူဝ်းပၢႆႈဢွၵ်ႇၵႂႃႇၵူႈယွမ်ႇၵူႈတၢင်းထႅင်ႈ ဝႃႈၼႆ။

မိူဝ်ႈဝူင်ႈပူၼ်ႉမႃးၼႆႉ သိုၵ်းရၶႅင်ႇ ယိုတ်းၵုမ်းလႆႈ ဝဵင်းမွင်ႇတေႃးသေ တီႉၺွပ်းလႆႈပႃး ႁၢႆးသိုၵ်းလႄႈ မၢၵ်ႇမိုဝ်ႈၸိုၼ်းယၢမ်း သိုၵ်းမၢၼ်ႈ တင်းၼမ်၊ ၼႂ်းၶၢဝ်းတၢင်း ဢမ်ႇပေႃးႁိုင် သိုၵ်းမၢၼ်ႈ လႆႈပွႆႇၽႃႈထႅင်ႈ ၸႄႈဝဵင်းတွင်ႇၵူၵ်ႉ။

လိူဝ်ၼၼ်ႉ သိုၵ်းရၶႅင်ႇ AA တိုၵ်ႉသိုပ်ႇလေႃႇတိုၵ်းတပ်ႉသိုၵ်းမၢၼ်ႈ တီႈၸႄႈဝဵင်းဢမ်းလႄႈ ၸႄႈဝဵင်းၵႂႃႉ၊ ၾၢႆႇသိုၵ်းမၢၼ်ႈ ၸႂ်ႉပႃးတပ်ႉၼမ်ႉ ယိုဝ်းၸွႆႈ၊ သွင်ၾၢႆႇသိုပ်ႇပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်း ဝႃႈၼႆ။

ၼႂ်းမိူင်းရၶႅင်ႇၼႆႉ သိုၵ်းမၢၼ်ႈတင်း သိုၵ်းရၶႅင်ႇ AA တႄႇပဵၼ်ပၢင်တိုၵ်းမႃးၶိုၼ်း ၼႂ်းလိူၼ်ၼူဝ်ႊဝႅမ်ႊပိူဝ်ႊ ပီ 2023 ။ ၶၢဝ်းတၢင်းပၢင်တိုၵ်း ပီပၢႆၼႆႉ ၼႂ်းမိူင်းရၶႅင်ႇ သိုၵ်း AA ယိုတ်းၵုမ်းလႆႈ 12 ဝဵင်းယဝ်ႉ။ ၼႂ်းမိူင်းၶျၢင်းသမ်ႉ ယိုတ်းလႆႈဝႆႉ ၸႄႈဝဵင်းပလႅတ်ႉဝႃႉ။

ၵဵဝ်ႇၵပ်းလွင်ႈ သိုၵ်းရၶႅင်ႇ ယိုတ်းၵုမ်းလႆႈၸႄႈဝဵင်းတင်းၼမ်ၼႆႉ ၾၢႆႇသိုၵ်းမၢၼ်ႈတႄႉ ဢမ်ႇႁၼ်ပိုၼ် ၽၢဝ်ႇဢွၵ်ႇမႃးသင် – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။