သိုၵ်းရၶႅင်ႇၼႆႉ ယိုတ်းလႆႈဝဵင်းတၢၼ်ႇတွႆး ၸဵမ်မိူဝ်ႈဝၼ်းတီႈ 16 လိူၼ်ၵျူႊလၢႆႊၼႆႉ သိုၵ်းမၢၼ်ႈ ၶမယ 566 လႄႈ ၶ လယ 55  ဢၼ်ဢဝ်တီႈယူႇဝႆႉၼႂ်းဝဵင်းၼၼ်ႉ ထွႆထွၼ်ၵႂႃႇပၵ်းတီႈတပ်ႉၼမ်ႉသေ ႁၢင်ႈႁႅၼ်းသိုၵ်းဝႆႉတႃႇပိုတ်းယိုဝ်း ၶိုၼ်း ၾၢႆႇသိုၵ်းရၶႅင်ႇ ပိုၼ်ၽၢဝ်ႇဝႆႉၼင်ႇၼႆ။

ၵူၼ်းပၵ်းတႃၵၢၼ်မိူင်း မိူင်းရၶႅင်ႇထတ်းသၢင်ဝႃႈ – “သိုၵ်းမၢၼ်ႈ ၵူဝ်လႆႈပွႆႇဝဵင်းတၢၼ်ႇတွႆး တီႈဢၼ်မီးငိုၼ်းၶဝ်ႈၸိုင်ႈမိူင်းၼမ် တီႈဢၼ်မီးပိုၼ်ႉတီႈဢႅဝ်ႇယဵမ်ႈတွင်ႈတဵဝ်း၊ လိူဝ်ၼၼ်ႉ မီးပႃးၶူင်းၵၢၼ်ပၢႆးမၢၵ်ႈ မီးၼႂ်း ၽူႈၼမ်းၵူၼ်းသိုၵ်းၶဝ် ၵွပ်ႈၼႆ ၸင်ႇလႆႈသႂ်ႇႁႅင်း ၵႅတ်ႇၶႄႁႄႉၵင်ႈ ဢမ်ႇယွမ်းပွႆႇ” – ဝႃႈၼႆ။

သိုၵ်းရၶႅင်ႇၼႆႉ တႄႇယိုဝ်းဝဵင်းတၢၼ်ႇတွႆး ၸဵမ်မိူဝ်ႈလိူၼ်ဢေႊပရိူဝ်ႊပူၼ်ႉမႃး။ သိုၵ်းမၢၼ်ႈ ၸႂ်ႉႁႅင်းသိုၵ်း တင်းၼမ်၊ တပ်ႉၵွင်ၼႂ်းပိုၼ်ႉတီႈ 2 ၵွင်၊ တပ်ႉၵွင်ႈတႂ်ႈတပ်ႉမ 101 သမ်ႉ 10 ၵွင်၊ လိူဝ်ၼၼ်ႉ ႁွင်ႉဢဝ် တပ်ႉၵွင်တၢင်းတိူင်းၼမ်ႉ ၵဵဝ် ၸိူဝ်းၼႆႉမႃးၸွႆႈ၊ ၸႂ်ႉႁိူဝ်းသိုၵ်း 5 လမ်း၊ ၸႂ်ႉပႃးတပ်ႉၼမ်ႉမၢၼ်ႈ Myanmar Navy SEALs သေ ပိုတ်းယိုဝ်းၶိုၼ်း ဢမ်ႇထၢတ်ႇ။

သိုၵ်း AA ပိုတ်းယိုဝ်း သိုၵ်းမၢၼ်ႈတီႈ မိူင်းရၶႅင်ႇၶၢဝ်းတၢင်း 8 လိူၼ်ၼႆႉ သိုၵ်းရၶႅင်ႇ ယိုတ်းလႆႈ10 ၸႄႈဝဵင်းယဝ်ႉသေ ၵိုတ်း 2 ၸႄႈဝဵင်းၼႆႉ တိုၵ်ႉသႂ်ႇႁႅင်းပိုတ်းယိုဝ်းယူႇ ဢမ်ႇထၢတ်ႇ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။