ၾႆးမႆႈ တႅၵ်ႇၽူင်ႉ ပၢမ်ႉၼမ်ႉမၼ်း တီႈဝၢၼ်ႈရီးၵူဝ်း ၸႄႈဝဵင်းမေႃႇလမျႅင်ႇ မိူင်းမွၼ်း မီးၵူၼ်းလူႉတၢႆ 1 ၵေႃႉ မၢတ်ႇၸဵပ်းထႅင်ႈ 22 ၵေႃႉ ဝႃႈၼႆ။
ဝၼ်းတီႈ 07/11/2024 ယၢမ်းၵၢင်ၶမ်ႈ 6 မူင်းပၢႆ ၽွင်းၵႃးတၢင်ႇၼမ်ႉမၼ်းၸိူဝ်ႉၾႆး မႃးထွၵ်ႇၼမ်ႉမၼ်းတီႈထင် ၼႂ်းဝၢင်းပၢမ်ႉၼမ်ႉမၼ်း မိၼ်းတၢၼ်ႉ ဢဝ်ပဵၼ်လွင်ႈၾႆးမႆႈ ၽွင်းမိူဝ်ႈၸွႆႈၶႄၾႆးယူႇၼၼ်ႉ ပဵၼ်လွင်ႈတႅၵ်ႇၽူင်ႉထႅင်ႈလႄႈ မီးၵူၼ်းမၢတ်ႇၸဵပ်းၼမ်ၵႂႃႇ။ ၼႂ်းၵူၼ်းမၢတ်ႇၸဵပ်းၼၼ်ႉ ၸဝ်ႈၵႃး လူႉတၢႆၵႂႃႇ ၼႂ်းဝၼ်းတီႈ 8 ယၢမ်းၵၢင်ၼႂ်သေ ၸဝ်ႈပၢမ်ႉၼမ်ႉမၼ်းလႄႈ ၽူႈၶဝ်ႈၸုမ်းၶႄၾႆး 2 ၵေႃႉၵေႃႈ လႆႈမႆႈၸႂ် သၢႆၸႂ်ဝႆႉ ဝႃႈၼႆ။
ၼႂ်းၵူၼ်းမၢတ်ႇၸဵပ်း 20 ပၢႆၼၼ်ႉ လုၵ်ႈၸုမ်းႁွင်ႈၵၢၼ်ၾၢႆႇၶႄၾႆး ပႃး 9 ၵေႃႉ ၊ ၸုမ်းၸွႆႈတူင်ႇဝူင်းပႃး 12 ၵေႃႉ ဢိၵ်ႇပႃး ၸဝ်ႈၵႃးလႄႈ ၸဝ်ႈပၢမ်ႉၼမ်ႉမၼ်း။ ယၢမ်းလဵဝ် လႆႈသူင်ႇတူဝ် ယူတ်းယႃဝႆႉတီႈ ႁူင်းယႃ မေႃႇလမျႅင်ႇယဝ်ႉ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။
